যোৰহাট জিলাৰ টিয়ক জাজীমুখত শ্রীমন্ত শঙ্কৰদেৱ সংঘৰ কেন্দ্ৰীয় বিষয়ববীয়াৰ লগতে যোৰহাট আৰু তিতাবৰ জিলা শাখাই বানাক্ৰান্ত ৰাইজৰ মাজত বিগত দুটা দিনত বান সাহায্য বিতৰণ কৰে।
যোৰহাট জিলাৰ টিয়ক জাজীমুখ প্লেটফ্মত জাজী-ব্ৰহ্মপুত্ৰৰ সঙ্গমস্থলী জাজীমুখৰ শগুনপাৰা, মিছামাৰি, আলিমুৰ, নামনি বৰমটাৰী, উজনী বৰমটাৰী, মিলি গাঁও আৰু বগৰীগুৰি আদি গাঁৱৰ প্রায় ১০ হাজাৰ লোকৰ মাজত বান সহায্য বিতৰণ কৰে শ্ৰীমন্ত শংকৰ সংঘৰ প্ৰতিনিধিসকলে ৷
সাহায্য বিতৰণত প্ৰধান সম্পাদক বাবুল বৰাৰ লগতে কেন্দ্ৰীয় বিষয়ববীয়া, যোৰহাট আৰু তিতাবৰ জিলা শাখাৰ ভকত-বৈষ্ণৱ, আইমাতৃ সকলে অংশগ্ৰহণ কৰি বানাক্ৰান্ত ৰাইজৰ মাজত বান সাহায্য বিতৰণ কৰে।
বান সাহায্য বিতৰণ কাৰ্য্যসূচীত অংশ গ্রহণ কৰি শ্রীমন্ত শঙ্কৰদেৱ সংঘৰ প্ৰধান সম্পাদক বাবুল বৰাই বানপানী আৰু গৰাখহনীয়াক ৰাষ্ট্রীয় সমস্যা হিচাপে ঘোষণা কৰিবৰ বাবে প্রধানমন্ত্রী আৰু ৰাষ্ট্রপতিলৈ শ্রীমন্ত শঙ্কৰদেৱ সংঘৰ ৫২ খন জিলাই স্মাৰক পত্র প্রদান কৰিব বুলি মন্তব্য কৰে।
তৰোপৰি, সংঘই সমগ্র অসমৰ বান অধ্যুষিত অঞ্চলৰ প্রায় ২ লাখ লোকক বান সাহায্য প্রদান কৰিব বুলি বৰাই উল্লেখ কৰে।
বান সাহায্যৰ বাবে কোটি টকাৰো অধিক সামগ্রী ইতিমধ্যে জমা হৈছে। বিগত ১১ দিনত প্ৰায় ১ লাখ ৭০ হাজাৰ বানাক্ৰান্ত লোকৰ মাজত বান সাহায্য সামগ্ৰী বিতৰণ কৰা হৈছে বুলিও প্ৰধান সম্পাদকগৰাকীয়ে জনায়।
বৰ্তমান উজনি অসমৰ বিভিন্ন স্থানত বান সাহায্য বিতৰণ কাৰ্য্যসূচী গ্ৰহণ কৰি থকা সংঘই পৰৱৰ্তী সময়ত নামনি অসমৰ বানাক্ৰান্তৰ মাজত সাহায্য বিতৰণ কৰিব।
ৰাজ্যৰ প্ৰাকৃতিক বিপৰ্যয়ৰ সময়ত অসমৰ সৰ্ববৃহ্ৎ সামাজিক অনুষ্ঠান শ্ৰীমন্ত শঙ্কৰদেৱ সংঘৰ এই পদক্ষেপক সকলোৱে আদৰণি জনাইছে।