শিৰোনামটোলৈ চালে এনে লাগিব পাৰে যে এইটো নিশ্চয় ছপাৰ ভুল। সাধাৰণ লোকৰ ঘৰত ইমান সোণ মজুত থকাটো সম্ভৱনে? হয় পাৰে, আৰু আছেও। এইচ এছ বি চি গ্ল’বেল কৰ্তৃপক্ষই শেহতীয়াকৈ কৰা সমীক্ষাত প্ৰদান কৰা পৰিসংখ্যাই এই কথা প্ৰকাশ কৰিছে। আপুনি আচৰিত হৈছে নেকি?
পৰৱৰ্তী তথ্য শুনিলে আচৰিত হোৱাৰ মাত্ৰা আৰু বেছি শক্তিশালী হ’ব। বহুকাল ধৰি ভাৰতীয়সকলৰ এই ‘হালধীয়া ধাতু’ৰ প্ৰতি প্ৰেম ইমানেই বেছি যে তেওঁলোকে ঘৰত জমা কৰা মুঠ সোণৰ সম্পদ বিশ্বৰ ১০টা বৃহৎ কেন্দ্ৰীয় বেংকত মজুত থকা সোণতকৈ বহু বেছি।
উদাহৰণস্বৰূপে আমেৰিকাৰ কেন্দ্ৰীয় বেংকৰ ওচৰত জমা আছে ৮১৩ লাখ কিলোগ্ৰাম সোণ, আনহাতে জাৰ্মান কেন্দ্ৰীয় বেংকৰ হাতত আছে ৩৩ লাখ কিলোগ্ৰাম সোণ আছে। এই তালিকাত অষ্টম স্থানত আছে ভাৰতীয় ৰিজাৰ্ভ বেংক, ৮.৭৬ লাখ কেজি মজুত আছে। কেন্দ্ৰীয় বেংকৰ তালিকাত বাকী থকা দেশসমূহ হ’ল ইটালী, ফ্ৰান্স, ৰাছিয়া, চীন, ছুইজাৰলেণ্ড, জাপান আৰু তুৰস্ক।
আপুনি নিশ্চয় ভাবিছে যে ই এক বৃহৎ কৃতিত্ব। দেশৰ ১৪৬ কোটি জনসংখ্যাই মজুত কৰি ৰখা সোণৰ পৰিমাণটো কেলকুলেটৰত ভাগ কৰি চাওক। আপুনি দেখিব যে জনমূৰি জমা হোৱা সোণৰ পৰিমাণ ৫৮.৪২ গ্ৰামতকৈ অলপ বেছি।
যি হাৰত সোণৰ দাম বৃদ্ধি পাইছে সোণ কিনাটো দূৰৰে কথা, দাম হিচাপ কৰিলেও চক কপালত উঠি যায়। চলিত সপ্তাহটোতে চাই লওঁক। সপ্তাহৰ প্ৰথম দিনটোত প্ৰতি ১০ গ্ৰাম বিশুদ্ধ সোণৰ (২৪ কেৰেট, ৯৯৯ বিশুদ্ধতা) মূল্য আছিল ৮৭,৭৫০ টাকা (কৰ বাদ দি)। আৰু সপ্তাহটোৰ শেষলৈকে শনিবাৰে মূল্য ৮৯,৭০০ টাকা পালেগৈ। অৰ্থাৎ ১০ গ্ৰাম সোণৰ মূল্য কৰ বাদ দি ১৯৫০ টাকা বৃদ্ধি পাইছে। কৰ আৰু মজুৰি ধৰিলে সেয়া ক’লৈ যায় তাৰ এটা ধাৰণা আপোনাৰ আছে। ফলত ৫৮ গ্ৰামৰ চাপ আৰু নোলোৱাই ভাল। আপুনি যিখিনি ক্ৰয় কৰা ৰাখিছে, তাৰ সামগ্ৰিক মূল্য কিমান বৃদ্ধি পাইছে সেই কথা ভাবি সন্তুষ্টি লাভ কৰক।
বিয়াৰ বতৰ আহি আছে। নতুন মাহ ব’হাগত কাৰোবাক বিয়াৰ উপহাৰ দিবলৈ কিনিব বুলি ভাবি আছে। কিন্তু যি হাৰত দাম বৃদ্ধি পাইছে, সেইটোৱে আশাত পানী ঢালিব পাৰে। সেইবুলি সোণৰ দাম হ্ৰাস পোৱাৰ সম্ভাৱনা আছে বুলি আশা নাৰাখিব। আইচিআইচিআই বেংক গ্ল’বেল মাৰ্কেটছৰ অনুমান অনুসৰি আন্তঃৰাষ্ট্ৰীয় বজাৰত সোণৰ মূল্য চলিত বৰ্ষৰ শেষলৈকে প্ৰতি ট্ৰয় আউন্সত ৩২০০-৩৪০০ ডলাৰ হ’ব পাৰে।
ইপিনে, ইয়াৰ মাজতে যদি আমেৰিকাৰ ফেডাৰেল ৰিজাৰ্ভে সুতৰ হাৰ কমাবলৈ আগবাঢ়ি আহে তেন্তে দাম আৰু বৃদ্ধি পাব পাৰে। ফলত ভাৰতত চলিত বৰ্ষৰ প্ৰথমাৰ্ধত প্ৰায় ৯০ হাজাৰ আছিল যদিও ২০২৫ চনৰ দ্বিতীয়াৰ্ধত প্ৰতি ১০ গ্ৰামত ৯৪-৯৬ হাজাৰ টকা হোৱাৰ সম্ভাৱনা অতি বেছি।
অনাগত দিনত গহনা-অলংকা ক্ৰয় ক্ৰমান্বয়ে লেহেমীয়া হ’ব বুলি বিশেষজ্ঞসকলে আশংকা কৰিছে। যিটো দেশৰ সোণৰ আমদানিৰ ওপৰত ভিত্তি কৰি অনুমান কৰা হৈছে। সেয়া যোৱা ১১ মাহৰ ভিতৰত সৰ্বনিম্ন স্তৰত উপনীত হৈছে। পৰিসংখ্যা অনুসৰি যোৱা জানুৱাৰীৰ পৰা ফেব্ৰুৱাৰীলৈ ১৪% হ্ৰাস পাইছে আৰু যোৱা বছৰৰ ফেব্ৰুৱাৰীৰ তুলনাত ৬৩% হ্ৰাস পাইছে।
