চিকিৎসা সেৱাৰ জৰিয়তে সমাজলৈ আগবঢ়াই অহা অৱদানৰ বাবে অসমৰ চকুৰোগ বিশেষজ্ঞ ডাঃ বিজুলী গোস্বামীক ইণ্ডিয়ান মেডিকেল এছ’চিয়েশ্যনে মহিলা সবলীকৰণ বঁটাৰে সন্মানিত কৰে।
অলপতে মেডিকেল এছ’চিয়েশ্যনৰ উদ্যোগত গোৱাত অনুষ্ঠিত বাৰ্ষিক অধিৱেশনত বিশিষ্ট চিকিৎসকগৰাকীক এই সন্মান প্ৰদান কৰা হয়।
উল্লেখযোগ্য যে এছ’চিয়েশ্যনে প্ৰতি বছৰে চিকিৎসা সেৱাৰ জৰিয়তে সমাজলৈ বিশেষ অৱদান আগবঢ়াই অহা দেশৰ মুঠ ১০ গৰাকী মহিলা চিকিৎকক এইদৰে সন্মানিত কৰি আহিছে।
গুৱাহাটী চিকিৎসা মহাবিদ্যালয়ৰ পৰা শিক্ষা গ্ৰহণ কৰা ডাঃ বিজুলী গোস্বামীৰ ঘৰ গুৱাহাটী মহানগৰীৰ গান্ধীবস্তিত। উল্লেখযোগ্য যে চিকিৎসা সেৱাৰ উপৰি গোস্বামী সাহিত্য চৰ্চাৰ সৈতেও জড়িত, তেওঁ লিখা বহু গল্প বিভিন্ন কাকত আলোচনীৰ লগতে কিতাপ আকাৰেও প্ৰকাশ পাইছে।
ভাৰতৰ বহু আগশাৰীৰ চিকিৎসকৰ উপস্থিতিত আয়োজিত উক্ত অধিৱেশনত প্ৰদান কৰা এই বঁটাত আছে এখন মানপত্ৰ, স্মাৰক আৰু এখন চেলেং। ডাঃ গোস্বামীক সমগ্ৰ উত্ত-পূবৰ ভিতৰত চলিত বৰ্ষৰ বাবে উক্ত বঁটা আগবঢ়োৱা হয়।
