মানহানিৰ গোচৰত শাস্তিৰ সন্মুখীন হৈ সাংসদ পদ হেৰুওৱা কংগ্ৰেছ নেতা ৰাহুল গান্ধীক কালি সকাহ প্ৰদান কৰিলে উচ্চতম ন্যায়ালয়ে। গুজৰাটৰ নিম্ন আদালতৰ পূৰ্বৰ আদেশত উচ্চতম ন্যায়ালয়ে স্থগিতাদেশ দিয়াৰ লগে লগে পুনৰ সাংসদ পদ ঘুৰাই পোৱাৰ পথ মুকলি হ’ল ৰাহুল গান্ধীৰ।
ৰাহুল গান্ধীৰ লগতে উচ্চতম ন্যায়ালয়ৰ এই ৰায় বিৰোধী মিত্ৰজোঁট INDIAৰ বাবেও সকাহ স্বৰূপ হৈ পৰিছে। ৰাহুল গান্ধীৰ পুনৰ আগমণ এতিয়া বিৰোধী শক্তিৰ মাজত ন উদ্যমৰ হোতা হৈ পৰিছে। আগন্তুক লোকসভা নিৰ্বাচনৰ বাবে ৰণকৌশল চৰ্চাত এতিয়া INDIA অধিক গতিশীল হৈ পৰিছে।
ইয়াৰ মাজতে আজি ঘোষণা কৰা হৈছে INDIA ৰ তৃতীয় বৈঠকৰ দিনাংক। আজি কংগ্ৰেছ আৰু উদ্ধৱ থাকৰে ফৈদৰ শিৱসেনাই ঘোষণা কৰা অনুসৰি, INDIA মিত্ৰজোঁটৰ তৃতীয়খন বৈঠক অহা ৩১ আগষ্ট আৰু ১ ছেপ্টেম্বৰত মুম্বাইত অনুষ্ঠিত হ’ব।
আজি মুম্বাইত অনুষ্ঠিত হোৱা বিৰোধী গোট মহা বিকাশ আঘাদীৰ বৈঠকৰ অন্তত শিৱসেনাৰ সাংসদ সঞ্জয় ৰাউটে কৰা ঘোষণা অনুসৰি, গ্ৰেণ্ড হায়াটত অনুষ্ঠিত হ’বলগীয়া INDIAৰ বৈঠকত কমেও পাঁচগৰাকী মুখ্যমন্ত্ৰীয়ে অংশগ্ৰহণ কৰিব। বৈঠকত ৰাহুল গান্ধীও উপস্থিত থাকিব।
উল্লেখ্য যে, বিজেপিক ৰোধ কৰাৰ স্বাৰ্থত ঐক্যবদ্ধভাৱে আগবঢ়া বিৰোধীৰ প্ৰথম বৈঠক ২৩ জুনত পাটনাত অনুষ্ঠিত হৈছিল আৰু এই বৈঠকত ১৬টা বিৰোধী দলে অংশ লৈছিল। তাৰ পিছত ১৭-১৮ জুলাইত বাংগালুৰুত ২৬টা দলৰ বৈঠক অনুষ্ঠিত হৈছিল।
বাংগালুৰুত অনুষ্ঠিত হোৱা এই দ্বিতীয়খন বৈঠকতে বিৰোধী এই মিত্ৰজোঁটৰ নাম Indian National Developmental Inclusive Alliance, চমুকৈ INDIA হিচাপে নামাকৰণ কৰা হৈছিল। এই বৈঠকতে কৰা ঘোষণা অনুসৰি আগন্তুক বৈঠকত মিত্ৰজোঁটৰ এগৰাকী আহ্বায়কৰ নাম ঘোষণা কৰা হ’ব।
লগতে পঢ়কঃ আপুনি আমাক যি নামেৰেই নামাতক লাগিলে, আমি মণিপুৰৰ চকুলো মচিম – মোদীক প্ৰতুত্তৰ ৰাহুলৰ
লগতে পঢ়কঃ শৰীৰৰ কোন অংশত তিল থাকিলে কি হয়? শৰীৰত থকা তিলৰ অৱস্থানে নিৰ্ণয় কৰিব আপোনাৰ ভাগ্য
লগতে পঢ়কঃ খানাপাৰাত জব্দ ৩০ কিলোগ্ৰাম ভাং : গ্ৰেপ্তাৰ তিনি সৰবৰাহকাৰী
