বৰোদাৰ এটা ব্যৱসায়িক প্ৰতিষ্ঠানে ভাৰতৰ বজাৰত প্ৰথমবাৰৰ বাবে ৭০ বিধ প্ৰাকৃতিক মিনাৰেলেৰে সমৃদ্ধ বিশুদ্ধ খোৱা পানী মুকলি কৰিছে যাৰ ৰং হ’ব ক’লা।
ব্যৱসায়িক প্ৰতিষ্ঠানটোৱে বজাৰত মুকলি কৰা প্ৰাকৃতিক ক’লা ক্ষাৰকীয় খোৱা পানীৰ বটলে গ্ৰাহকক আকৰ্ষণ কৰিবলৈ সক্ষম হ’ব বুলি ধাৰণা কৰা হৈছে।
সাধাৰণ পানীৰ দৰে সোৱাদযুক্ত ‘Evocus H20’ নামৰ ক’লা পানী হ’ল দেশৰ প্ৰথম বটল ৰূপত বিক্ৰী হোৱা ক’লা ৰঙৰ খোৱা পানী।
‘এভোকাছ’ত বিশুদ্ধ নদীৰ পানীত ৭০ বিধ প্ৰাকৃতিক খনিজ সম্পদ মিহলোৱা হৈছে বুলি বৰোদাৰ প্ৰতিষ্ঠানটোৱে সদৰি কৰিছে।
বজাৰলৈ নতুনকৈ অহা ক’লা ক্ষাৰকীয় পানীবিধে সাধাৰণ পানীতকৈ বেছি পৰিমাণে মানুহৰ শৰীৰৰ বাবে প্ৰয়োজনীয় উপাদান সমূহ যোগান ধৰিব বুলি প্ৰতিষ্ঠানটোৱে জানিবলৈ দিছে।
‘‘আমি সকলো স্থানৰ পৰা উচ্চ সমাদৰ লাভ কৰিছো আৰু মাত্ৰ ছয় মাহৰ ভিতৰতে ৩ মিলিয়ন পানীৰ বটল বিক্ৰী কৰিবলৈ সক্ষম হৈছো,’’ প্ৰতিষ্ঠানটোৰ পৰিচালন সঞ্চালক আকাশ বাঘেলাই কয়।
ছয় মাহ পূৰ্বে বজাৰত মুকলি হোৱা এভোকাছ বৰ্তমান পুনে, চণ্ডীগড়, জয়পুৰ, দিল্লী আৰু গুৰগাঁৱত উপলব্ধ হৈছে।
নতুন ক’লা পানী বিধ বৰ্তমান ডিজিটেল মাৰ্কেট যেনে আমাজন, পেটিএম মল, স্নেপডিল আদিতো উপলব্ধ হৈছে বুলি পৰিচালন সঞ্চালক গৰাকীয়ে জানিবলৈ দিয়ে।
উল্লেখযোগ্য যে, ভাৰতীয় বজাৰত প্ৰথমবাৰৰ বাবে খোৱা ক’লা ৰঙৰ পানী উপলব্ধ কৰাৰ ক্ষেত্ৰত প্ৰতিষ্ঠানটোৱে প্ৰায় ৭ কোটি টকা বিনিয়োগ কৰিছিল যাৰ বছৰেকীয়া উৎপাদন ক্ষমতা ৪০ মিলিয়ন বটল।
ইয়াৰ পূৰ্বে আমেৰিকাকে ধৰি ইউৰোপৰ বিভিন্ন দেশত ক’লা ৰঙৰ খোৱা পানী উপলব্ধ হৈছিল।
