পশ্চিম লণ্ডনৰ চাউথহলত ভাৰতীয় মূলৰ এজন যুৱকক ছুৰীৰে আঘাত কৰি হত্যা কৰা হৈছে। নিহত যুৱকজনৰ নাম গুৰৱেজ সিং (২৬)। ব্ৰিটেইনৰ মেট্ৰ’পলিটান আৰক্ষীয়ে হত্যাৰ গোচৰ ৰুজু কৰি তদন্ত আৰম্ভ কৰিছে।
ঘটনাৰ লগত জড়িত থকাৰ সন্দেহত ৭ জন লোকক গ্ৰেপ্তাৰ কৰা হয় যদিও পিছত ছয়জনক মুকলি কৰি দিয়া হয়। এজনক চৰ্তসাপেক্ষ জামিনত মুকলি কৰি দিয়া হৈছে।
আৰক্ষী সূত্ৰৰ মতে, যোৱা বুধবাৰে (১০ জুন) মাজ নিশা চাউথহলৰ নৰ্থ ৰোড আৰু ডৰ্মাৰ্ছ ওৱেলছ লেনৰ সংযোগস্থলৰ ওচৰৰ এখন দোকানৰ বাহিৰত সংঘটিত হয় এই ঘটনা। নিশা প্ৰায় ১২:৪১ বজাত আৰক্ষী আৰু চিকিৎসা কৰ্মী উপস্থিত হৈ গুৰৱেজ সিং আৰু গুৰুতৰভাৱে আহত আন এজন ব্যক্তিক উদ্ধাৰ কৰে। চিকিৎসালয়লৈ নিয়াৰ পূৰ্বেই গুৰৱেজৰ মৃত্যু হয়। আনজন আহত ব্যক্তিক চিকিৎসাৰ অন্তত চিকিৎসালয়ৰ পৰা যাবলৈ দিয়া হৈছে।
মেট্ৰ’পলিটান আৰক্ষীয়ে জনোৱা মতে, যিসকল ব্যক্তিয়ে ঘটনাটো প্ৰত্যক্ষ কৰিছে বা যিসকলৰ হাতত চিচিটিভি ফুটেজ বা আন তথ্য আছে তেওঁলোকক আগবাঢ়ি আহি তদন্তত সহায় কৰিবলৈ আহ্বান জনোৱা হৈছে। তদন্তকাৰীয়ে আক্ৰমণৰ প্ৰকৃত উদ্দেশ্য আৰু অভিযুক্তৰ ভূমিকা সম্পৰ্কে তদন্ত কৰি আছে।
মেট্ৰ’পলিটান আৰক্ষীৰ ‘স্পেচিয়েলিষ্ট ক্ৰাইম কমাণ্ড’ৰ ডিটেক্টিভ চিফ ইন্সপেক্টৰ এলিছন ফক্সৱেলে কয় যে তদন্তকাৰীয়ে হত্যাকাণ্ডৰ পৰিস্থিতিৰ তদন্ত কৰি আছে। তেওঁ কয়, ‘যিসকলৰ হাতত অঞ্চলটোৰ চিচিটিভি ফুটেজ আছে – বা যিসকল লোকে এই কাণ্ডৰ সময়ত সেই স্থানত উপস্থিত আছিল কিন্তু এতিয়াও আৰক্ষীৰ সৈতে কথা পতা নাই – তেওঁলোকক আগবাঢ়ি আহি আৰক্ষীৰ সৈতে যোগাযোগ কৰিবলৈ আহ্বান জনাইছো।’
ইংলেণ্ডৰ বিভিন্ন প্ৰান্তত অনুপ্ৰৱেশ আৰু জনসাধাৰণৰ সুৰক্ষাক লৈ প্ৰতিবাদ আৰু আন্দোলন চলি থকাৰ সময়তে সংঘটিত হৈছে এই হত্যাকাণ্ড। চলিত সপ্তাহৰ আৰম্ভণিতে উত্তৰ আয়াৰলেণ্ডৰ বেলফাষ্টত শ শ অনুপ্ৰৱেশ বিৰোধী প্ৰতিবাদকাৰীয়ে প্ৰতিবাদ সাব্যস্ত কৰিছিল। ইয়াৰ মাজতে ভাৰতীয় এজনৰ হত্যাকাণ্ডক লৈ ৰহস্যৰ সৃষ্টি হৈছে।
