কানাডাৰ অন্টাৰিঅ’ত এগৰাকী পাঞ্জাবী ইউটিউবাৰক ছুৰীকাঘাত কৰি হত্যা কৰাৰ অভিযোগ উঠিছে। আন এগৰাকী ভাৰতীয়ৰ হত্যাকাণ্ডই স্তম্ভিত কৰি তুলিছে। আৰক্ষীয়ে নিহত মহিলাগৰাকীক নেন্সি গ্ৰেৱাল (৪৫) বুলি চিনাক্ত কৰিছে। তেওঁ এগৰাকী ইউটিউবাৰ।
আৰক্ষী সূত্ৰই জনোৱা মতে, মঙলবাৰে স্থানীয় সময় অনুসৰি নিশা ৯:৩০ বজাত অন্টাৰিঅ’ৰ টড লেনৰ সমীপত পথচাৰীয়ে এগৰাকী মহিলাক ৰক্তাক্ত অৱস্থাত পৰি থকা দেখি আৰক্ষীক খবৰ দিয়ে।
তথ্য লাভ কৰাৰ লগে লগে ঘটনাস্থলীত উপস্থিত হয় আৰক্ষী। গুৰুতৰভাৱে আঘাতপ্ৰাপ্ত নেন্সিক উদ্ধাৰ কৰি চিকিৎসালয়লৈ লৈ যোৱা হয়। কিন্তু চিকিৎসকে তেওঁক মৃত বুলি ঘোষণা কৰে।
আৰক্ষীয়ে জনোৱা মতে, নেন্সি উইণ্ডচৰত বাস কৰিছিল। তেওঁৰ ওপৰত কোনে আক্ৰমণ কৰিলে তাৰ তদন্ত চলি আছে। টড লেনৰ আশে-পাশে চিচিটিভিৰ ফুটেজ পৰীক্ষা কৰা হৈছে। অৱশ্যে আৰক্ষীৰ এক সূত্ৰই ধাৰণা কৰে যে নেন্সিক আন ঠাইত ছুৰীৰে আঘাত কৰাৰ পিছত টড লেনৰ ওচৰত পেলাই দিয়া হৈছিল।
ছ’চিয়েল মিডিয়াত নেন্সি আছিল অতি সক্ৰিয়। ইউটিউব চেনেলত পঞ্জাৱৰ উন্নয়ন সন্দৰ্ভত বিভিন্ন মতামত প্ৰকাশ কৰিছিল। কাৰাগাৰত থকা সাংসদ অমৃতপাল সিং, আকালি নেতা বিক্ৰম সিং, আৰু ডেৰা বিয়াছৰ গুৰিন্দৰ সিঙৰ বিৰুদ্ধে সৰৱ হৈ পৰিছিল নেন্সিয়ে। খালিস্তানৰ সন্দৰ্ভতো কিছুমান মন্তব্য কৰিছিল।
ইয়াৰ উপৰিও ভাৰত আৰু কানাডাৰ মাজত শেহতীয়াকৈ সৃষ্টি হোৱা উত্তেজনা সন্দৰ্ভতো মতামত প্ৰকাশ কৰিছিল। যোৱা বছৰৰ জুন মাহত পঞ্জাৱৰ এই ইউটিউবাৰগৰাকীয়ে ছ’চিয়েল মিডিয়াৰ ইনফ্লুৱেন্সাৰ কাঞ্চন কুমাৰীৰ মৃত্যুক লৈ সৰৱ হৈছিল।
উল্লেখ্য যে যোৱা বছৰৰ জানুৱাৰী মাহত কানাডাৰ বাৰ্নাবিত ভাৰতীয় মূলৰ এজন যুৱকৰ গুলীবিদ্ধ মৃতদেহ উদ্ধাৰ হৈছিল। মৃত যুৱকজনৰ নাম দিলৰাজ সিং গিল।
