নতুন বছৰটোৰ প্ৰথম দিনটোতে দেশবাসীৰ ওপৰত বৰ্ধিত ৰেইল ভাড়াৰ বোজা জাপি দিলে মোদী চৰকাৰে।
ৰেইলৱেই ঘোষণা কৰিছে যে ২০২০ চনৰ ১ জানুৱাৰিৰ পৰা কাৰ্য্যকৰী হোৱাকৈ ছাব-আৰবান ৰেইলবোৰৰ বাদে সকলো ৰেইলৰ ভাড়া বৃদ্ধি হ’ব।
“ৰেইল মন্ত্ৰ্যালয়ে বুনিয়াদী যাত্ৰীভাড়াত সালসলনি কৰিবলৈ সিদ্ধান্ত কৰিছে… যিটো ২০২০-ৰ ১ জানুৱাৰিৰ পৰা কাৰ্য্যকৰী হ’ব”, ৰেইলৱেইৰ এখন জাননীত কোৱা হয়।
নতুন সালসলনি মতে, এই বৃদ্ধি প্ৰতি কিলোমিটাৰত ১ পইচাৰ পৰা ৪ পইচা পৰ্য্যন্ত হৈছে।
সাধাৰণ নন-এ চি শ্ৰেণীবোৰৰ বৃদ্ধি প্ৰতি কিলোমিটাৰত ১ পইচাকৈ, মেইল/এক্সপ্ৰেছ নন-এ চি শ্ৰেণীবোৰত প্ৰতি কিলোমিটাৰত ২ পইচাকৈ আৰু এ চি শ্ৰেণীবোৰত প্ৰতি কিলোমিটাৰত ৪ পইচাকৈ বৃদ্ধি কৰা হৈছে।
এই ভাড়া বৃদ্ধিয়ে বিশেষকৈ অধিক দূৰত্বৰ যাত্ৰীসকলক প্ৰভাৱিত কৰিব। ৰাজধানী, শতাব্দী, দুৰন্ত, বন্দে ভাৰত, তেজচ, হাম ছফৰ, গতিমান আৰু গৰীৱ ৰথৰ টিকটত ইয়াৰ প্ৰতিফলন স্পষ্ট দেখা যাব।
ছাব-আৰবান আৰু ছিজন টিকটত ভাড়া বৃদ্ধি কৰা হোৱা নাই।
মন্ত্ৰ্যালয়টোৰ এটা সূত্ৰই কয় যে শেষবাৰৰ বাবে যাত্ৰীভাড়া বৃদ্ধি কৰা হৈছিল ২০১৪-২০১৫ চনত।
