ভাৰতীয় ৰে’লৱে যাত্ৰীসকলৰ বাবে কঢ়িয়াই আনিছে এক সুখবৰ! এতিয়াৰ পৰা টিকট বুকিং কৰাৰ পিছতো যাত্ৰাৰ তাৰিখ সলনি কৰাৰ সুবিধা প্ৰৱৰ্তন কৰিবলৈ ওলাইছে ৰে’লৱে বিভাগে। এই নতুন ব্যৱস্থাৰ জৰিয়তে যাত্ৰীসকলে কোনো অতিৰিক্ত মাচুল নিদিয়াকৈ নিজৰ যাত্ৰাৰ তাৰিখ সলনি কৰিব পাৰিব। এই সুবিধা পূৰ্বে উপলব্ধ নাছিল, আৰু ভাৰতীয় ৰে’লৱেই প্ৰথমবাৰৰ বাবে এনে ব্যৱস্থা কাৰ্যকৰী কৰিবলৈ সিদ্ধান্ত লৈছে।
বৰ্তমান যদি কোনো যাত্ৰীৰ পৰিকল্পনাত সূচী সলনি হয়, তেন্তে তেওঁলোকে পুৰণি টিকট বাতিল কৰি নতুন তাৰিখৰ বাবে টিকট বুকিং কৰিবলগীয়া হয়। এই প্ৰক্ৰিয়াত যাত্ৰীসকলে আৰ্থিক ক্ষতিৰ সন্মুখীন হ’বলগীয়া হয়, কাৰণ টিকট বাতিল কৰিলে ৰে’লৱেৰ নিৰ্দিষ্ট নিয়ম অনুসৰি কিছু পৰিমাণৰ ধন কৰ্তন কৰা হয়। এই সমস্যাৰ সমাধানৰ বাবে ৰে’লৱেৰ এই নতুন পদক্ষেপ ২০২৬ৰ জানুৱাৰী মাহৰ পৰা কাৰ্যকৰী হ’ব।
ৰেল মন্ত্ৰী অশ্বিনী বৈষ্ণৱে এই সন্দৰ্ভত কয় যে, “পুৰণি ব্যৱস্থা যাত্ৰীসকলৰ স্বাৰ্থৰ বিৰুদ্ধে আছিল। এতিয়াৰ পৰা যাত্ৰীসকলে অনলাইনৰ জৰিয়তে বিনামূলীয়াকৈ নিজৰ টিকটৰ যাত্ৰাৰ তাৰিখ সলনি কৰিব পাৰিব।”
ৰে’ল মন্ত্ৰীগৰাকীয়ে লগতে স্পষ্ট কৰি দিছ যে নতুন তাৰিখত টিকট নিশ্চিত হোৱাৰ কোনো নিশ্চয়তা নাই। নতুন তাৰিখত টিকটৰ উপলব্ধতা নিৰ্ভৰ কৰিব ৰে’লৰ পথ আৰু ট্ৰেইনৰ আসনৰ উপলব্ধতাৰ ওপৰত। লগতে, যদি নতুন তাৰিখৰ টিকটৰ ভাড়া পুৰণি টিকটৰ ভাড়াতকৈ বেছি হয়, তেন্তে যাত্ৰীয়ে সেই অতিৰিক্ত ধন পৰিশোধ কৰিব লাগিব।
যদিও ৰে’ল বিভাগৰ বিষয়াসকলে জানিব দিছে যে জানুৱাৰী ২০২৬ৰ পৰা এই সুবিধা সম্পূৰ্ণৰূপে কাৰ্যকৰী হ’ব, আৰু যাত্ৰীসকলে অনলাইন প্লেটফৰ্মৰ জৰিয়তে এই সেৱাৰ সুবিধা ল’ব পাৰিব। অৱশ্যে এই নতুন ব্যৱস্থা সন্দৰ্ভত এতিয়াও ৰে’ল মন্ত্ৰালয়ৰ পৰা কোনো আনুষ্ঠানিক অধিসূচনা জাৰি কৰা হোৱা নাই।
