হৰমুজ প্ৰণালীত মিছাইল আক্ৰমণ, জুই লাগিল ইউ এ ইৰ তেল টেংকাৰত; নিহত ভাৰতীয় নাৱিক
ইৰাণৰ বিৰুদ্ধে হৰমুজ প্ৰণালীত ইউ এ ইৰ দুখন তেল টেংকাৰত ক্ষেপণাস্ত্ৰ আক্ৰমণ কৰাৰ অভিযোগ উত্থাপন হৈছে। সোমবাৰৰ এই আক্ৰমণত এজন ভাৰতীয় নাৱিক নিহত হোৱা বুলি জানিব পৰা গৈছে। আহত হৈছে আন ৮ জন। ইয়াৰে চাৰিজনৰ অৱস্থা সংকটজনক। সংযুক্ত আৰব আমিৰশ্বাহীয়ে সঠিক সময়ত ইৰাণক প্ৰত্যুত্তৰ দিয়া হ’ব বুলি সকীয়াই দিছে।
হৰমুজ প্ৰণালীৰ এটা অংশ ওমানৰ ভূখণ্ডৰ জলসীমাৰ ভিতৰত পৰে। ইউ এ ইৰ প্ৰতিৰক্ষা মন্ত্ৰালয়ৰ মতে তেওঁলোকৰ দুখন তেল টেংকাৰ সেই জলপথৰ দক্ষিণ দিশৰ জাহাজ লেনৰ মাজেৰে পাৰ হৈ গৈছিল। হঠাৎ ইৰাণে ক্ৰুজ মিছাইলেৰে তেওঁলোকক আক্ৰমণ কৰে। দুয়োখন টেংকাৰতে জুই লাগে। পিছত উদ্ধাৰকাৰী দলে ক্ষীপ্ৰতাৰে সেই স্থানত উপস্থিত হৈ পৰিস্থিতি নিয়ন্ত্ৰণ কৰে। সেই আক্ৰমণত ভাৰতীয় নাৱিকজনৰ মৃত্যু হয়। অৱশ্যে তেওঁৰ পৰিচয় প্ৰকাশ কৰা হোৱা নাই।
ইউ এ ই চৰকাৰে এই ঘটনাক তীব্ৰ গৰিহণা দিছে। প্ৰতিৰক্ষা মন্ত্ৰালয়ে এক বিবৃতিত কয় যে এই আক্ৰমণ আন্তঃৰাষ্ট্ৰীয় আইনৰ গুৰুতৰ উলংঘা। দেশৰ সাৰ্বভৌমত্ব আৰু নিৰাপত্তা ৰক্ষাৰ বাবে সেনাই সকলো ধৰণৰ ব্যৱস্থা গ্ৰহণ কৰাৰ অধিকাৰ আছে বুলিও দাবী কৰা হৈছে। সংযুক্ত আৰব আমিৰশ্বাহীয়ে পৰিস্থিতি অনুসৰি উপযুক্ত প্ৰতিক্ৰিয়া প্ৰকাশ কৰিব বুলি সকীয়াই দিছে।
এই ঘটনাই হৰমুজ প্ৰণালীৰ আশে-পাশে পুনৰ উত্তেজনাৰ সৃষ্টি কৰিছে। বিশ্বৰ এই গুৰুত্বপূৰ্ণ সাগৰীয় পথেৰে প্ৰতিদিনে বৃহৎ পৰিমাণৰ খাৰুৱা তেল আৰু প্ৰাকৃতিক গেছ পৰিবহণ কৰা হয়। ফলত একাংশ বিশেষজ্ঞই আশংকা কৰিছে যে যদি এই অঞ্চলৰ নিৰাপত্তা পৰিস্থিতিৰ অৱনতি ঘটে তেন্তে ইয়াৰ প্ৰভাৱ আন্তঃৰাষ্ট্ৰীয় তেলৰ বজাৰতো পৰিব পাৰে।
ইৰাণে এই আক্ৰমণ সন্দৰ্ভত এতিয়াও কোনো মন্তব্য কৰা নাই যদিও ইয়াৰ ফলত ইৰাণ আৰু সংযুক্ত আৰব আমিৰশ্বাহীৰ মাজত পুনৰ উত্তেজনা সৃষ্টি হ’ব পাৰে বুলি ধাৰণা কৰা হৈছে। ইতিমধ্যে আমেৰিকাৰ ৰাষ্ট্ৰপতি ড’নাল্ড ট্ৰাম্পে হৰমুজ প্ৰণালীৰ মাজেৰে যাত্ৰা কৰা সকলো মালবাহী জাহাজৰ ওপৰত ২০ শতাংশ ‘নিৰাপত্তা মাচুল’ বা কৰ আৰোপ কৰাৰ কথা ঘোষণা কৰিছে। সোমবাৰে তেওঁ ট্ৰুথ ছ’চিয়েলত লিখিছে, ‘হৰমুজৰ সুৰক্ষা আৰু নিৰাপত্তা নিশ্চিত কৰাৰ খৰচ বহন কৰিবলৈ সকলো জাহাজে ২০ শতাংশ কৰ দিব লাগিব।’