ভিয়েটনামৰ ফু কুৱক দ্বীপৰ সমীপত যোৱা ১১ জুলাইত সংঘটিত হোৱা ভয়ংকৰ স্পীডব’ট দুৰ্ঘটনাত প্ৰাণ হেৰুওৱা ১৫ গৰাকী ভাৰতীয় পৰ্যটকৰ মৃতদেহ মঙলবাৰে মুম্বাইত আহি উপস্থিত হৈছে। ভিয়েটনাম এয়াৰলাইন্সৰ ভি এন ৯৭৯ নম্বৰৰ বিমানেৰে মৃতদেহসমূহ ছত্ৰপতি শিৱাজী মহাৰাজ আন্তঃৰাষ্ট্ৰীয় বিমানবন্দৰলৈ অনা হয়। সংশ্লিষ্ট ৰাজ্য চৰকাৰসমূহৰ সৈতে সমন্বয় ৰক্ষা কৰি মৃতদেহসমূহ অন্ত্যেষ্টিক্ৰিয়াৰ বাবে নিজ নিজ গৃহভূমিলৈ প্ৰেৰণ কৰাৰ ব্যৱস্থা কৰা হৈছে বুলি জানিব পৰা গৈছে।
উল্লেখযোগ্য যে এই দুৰ্ঘটনাত নিহত হোৱা পৰ্যটকসকলৰ ভিতৰত দহগৰাকী তামিলনাডুৰ, তিনিগৰাকী অন্ধ্ৰ প্ৰদেশৰ আৰু দুগৰাকী কেৰালাৰ বাসিন্দা। ইয়াৰ পূৰ্বে ১৩ জুলাইত ভিয়েটনামস্থিত ভাৰতীয় দূতাবাসে এই ১৫ গৰাকী ভাৰতীয়ৰ মৃতদেহ হো চি মিন চিটিৰ পৰা প্ৰেৰণ কৰাৰ বিষয়ে আনুষ্ঠানিকভাৱে অৱগত কৰিছিল আৰু মৃতদেহসমূহ পৰিয়ালৰ হাতত অৰ্পণ কৰাৰ ক্ষেত্ৰত প্ৰয়োজনীয় ব্যৱস্থা গ্ৰহণ কৰিবলৈ সংশ্লিষ্ট ৰাজ্য চৰকাৰসমূহক অনুৰোধ জনাইছিল।
যোৱা ১১ জুলাইত অ’চেন পাৰ্ল আইলেণ্ড কোম্পানীৰ দ্বাৰা পৰিচালিত স্পীডব’টখনে বতৰৰ প্ৰতিকূল অৱস্থাৰ সন্মুখীন হৈ হুন মে ৰুট দ্বীপৰ সমীপত বাগৰি পৰাৰ ফলত এই শোকাৱহ দুৰ্ঘটনাটো সংঘটিত হৈছিল। ভিয়েটনামৰ কৰ্তৃপক্ষই প্ৰকাশ কৰা অনুসৰি, নাওখনে পৰ্যটকসকলক লৈ ফু কুৱক বিমানবন্দৰৰ পৰা প্ৰায় ২৫ কিলোমিটাৰ দূৰত্বত অৱস্থিত আন থোই বন্দৰলৈ গৈ আছিল। নাওখনত ৩২ গৰাকী ভাৰতীয় পৰ্যটক আৰু চাৰিগৰাকী ভিয়েটনামৰ কৰ্মচাৰীসহ মুঠ ৩৬ গৰাকী যাত্ৰী আছিল। দুৰ্ঘটনা সংঘটিত হোৱাৰ লগে লগে ওচৰতে থকা আন পৰ্যটকৰ নাওসমূহ ঘটনাস্থলীলৈ গৈ উদ্ধাৰ অভিযান চলায়। উদ্ধাৰকাৰী দলে আটাইকেইগৰাকী যাত্ৰীক পাৰলৈ লৈ আনে যদিও ১৫ গৰাকী ভাৰতীয় পৰ্যটকৰ মৃত্যু হয় আৰু আন ২১ গৰাকী যাত্ৰী জীৱন্তে ৰক্ষা পৰে।
এই দুৰ্ঘটনাৰ পিছতে ভাৰতীয় দুতাবাসে ভিয়েটনামৰ কৰ্তৃপক্ষৰ সৈতে মিলি নিহতসকলৰ চিনাক্তকৰণ, নথিপত্ৰ প্ৰস্তুত কৰা আৰু অন্যান্য আইনী প্ৰক্ৰিয়াসমূহ সম্পূৰ্ণ কৰাৰ লগতে জীৱিত অৱস্থাত উদ্ধাৰ হোৱা লোকসকলক সহায় আগবঢ়ায়। গুৰুতৰভাৱে আহত হোৱা একমাত্ৰ ভাৰতীয় পৰ্যটকগৰাকীৰ এটা চিকিৎসা প্ৰক্ৰিয়া সফলতাৰে সম্পন্ন কৰাৰ পিছত উন্নত চিকিৎসাৰ বাবে তেওঁক হো চি মিন চিটিৰ এখন চিকিৎসালয়লৈ স্থানান্তৰ কৰা হৈছে বুলি দূতাবাসে জানিবলৈ দিছে। সমগ্ৰ প্ৰক্ৰিয়াটোত সহায় সহযোগ আগবঢ়োৱাৰ বাবে ভাৰতীয় দূতাবাস আৰু হো চি মিন চিটিত থকা কনছুলেট জেনেৰেলে ভিয়েটনামৰ বৈদেশিক পৰিক্ৰমা মন্ত্ৰালয়, ফু কুৱক বিশেষ অৰ্থনৈতিক মণ্ডল আৰু অন্যান্য সংশ্লিষ্ট সংস্থাসমূহক ধন্যবাদ জ্ঞাপন কৰিছে।
