বিফলতাৰ দিন দূৰ হোৱাৰ লগে লগে ভাৰতৰ বে়ডমিন্টনৰ ৰাণী পি ভি সিন্ধুৰ পৰিয়ালে প্ৰকাশ কৰিলে এই ভাল খবৰটো। অলিম্পিকত দুটা পদক লাভ কৰা ২৯ বছৰীয়া শ্বাটলাৰ পিভি সিন্ধুৱে চলিত মাহতে বিবাহপাশত আবদ্ধ হ’ব। পাত্ৰ এটা আই টি কোম্পানীৰ জ্যেষ্ঠ বিষয়া। হায়দৰাবাদৰ ভেংকট দত্ত ছাই প’চিডেস্ক টেকন’লজিছৰ কাৰ্যবাহী সঞ্চালক হিচাপে কাম কৰি আছে।
বিগত ২৮ মাহ ধৰি সিন্ধুৱে কোনো খিতাপ দখল কৰিব পৰা নাছিল। দেওবাৰে লক্ষ্ণৌত চৈয়দ মোদী আন্তঃৰাষ্ট্ৰীয় বেডমিণ্টনত চেম্পিয়ন হৈ তেওঁ সেই ব্যৰ্থ পৰিস্থিতিৰ অন্ত পেলায়।
সোমবাৰে নিশা সংবাদ সংস্থাৰ আগত সিন্ধুৰ পিতৃ পি ভি ৰমন্নাই কয় যে ‘’আমাৰ দুয়োটা পৰিয়াল বহুদিনৰ চিনাকি। কিন্তু বিয়াখন অতি সোনকালে ঠিক হৈ গ’ল। মাত্ৰ এমাহৰ ভিতৰতে। ডিচেম্বৰৰ ভিতৰত বিয়া নাপাতিলে সিন্ধুৱে বিয়া পাতিবলৈ আৰু সময় পোৱাটো সম্ভৱ নহ’লহেঁতেন৷ কাৰণ জানুৱাৰী মাহৰ পৰা তেওঁ ইখনৰ পিছত সিখন টুৰ্ণামেণ্ট খেলিব লাগিব।‘’
কম সময়ৰ ভিতৰতে সকলো ঠিক হৈ গ’লেও বিয়াখন ৰাজকীয়ভাৱে আয়োজন কৰা হ’ব। ২০ ডিচেম্বৰৰ পৰা আৰম্ভ হ’ব প্ৰি-ৱেডিং পৰ্ব। ২২ ডিচেম্বৰত ৰাজস্থানৰ উদয়পুৰত হ’ব বিবাহ অনুষ্ঠান। তাৰ পিছত ২৪ তাৰিখে দুয়োটা পৰিয়ালে একেলগে হায়দৰাবাদত অভ্যৰ্থনা অনুষ্ঠান অনুষ্ঠিত কৰিব।
