আমেৰিকাৰ পিছত এইবাৰ অষ্ট্ৰেলিয়াৰ চিডনীত অধ্যয়ন কৰি থকা এজন ভাৰতীয় ছাত্ৰক ১১ বাৰ ছুৰিকাঘাত কৰাৰ ঘটনাই প্ৰতিক্ৰিয়াৰ সৃষ্টি কৰিছে । উত্তৰ প্ৰদেশৰ ছাত্ৰজনক গুৰুতৰভাৱে আঘাতপ্ৰাপ্ত অৱস্থাত চিকিৎসালয়ত ভৰ্তি কৰোৱা হৈছে। শুভম গাৰ্গ নামৰ ছাত্ৰ জনৰ পৰিয়ালৰ লোকে অভিযোগ কৰা অনুসৰি শুভম বৰ্ণ বৈষম্যৰ বলি হ’বলগীয়া হৈছে ।
আহত ছাত্ৰজনক শুভম গাৰ্গ বুলি চিনাক্ত কৰা হৈছে। আইআইটি মাদ্ৰাজৰ স্নাতক ছাত্ৰ জনে ১ ছেপ্টেম্বৰত অষ্ট্ৰেলিয়াৰ চিডনীলৈ গৈছিল। তাত ২৮ বছৰীয়া শুভমে নিউ চাউথ ৱেলছ বিশ্ববিদ্যালয়ত পিএইচডি কৰি আছে। তেওঁৰ পৰিয়ালৰ আন লোকসকলে উত্তৰ প্ৰদেশৰ আগ্ৰাত বাস কৰে।
তেওঁ ৬ অক্টোবৰৰ নিশা এটিএমৰ পৰা উভতি এহাৰ সময়তে এজন যুৱকে তেওঁক আক্ৰমণ কৰে। স্থানীয় যুৱকজনে শুভমৰ পৰা টকা দাবী কৰিছিল। যুৱকজনৰ হাতত এখন চুৰি আছিল। শুভমে টকা দিবলৈ অস্বীকাৰ কৰাত সেই চুৰিৰে যুৱকজনে শুভমক আঘাত কৰে। ফলত ছাত্ৰ জনে পেট আৰু বুকুত আঘাত পায়। আক্ৰমণকাৰী যুৱকজনে ঘটনাস্থলীৰ পৰা পলাই যায়। শুভমে কেনেবাকৈ ওচৰৰ ঘৰলৈ গৈ সহায় বিচাৰে। লগে লগে তেওঁক চিকিৎসালয়ত ভৰ্তি কৰোৱা হয়।
শুভমৰ পিতৃ ৰামনিৱাস গাৰ্গে কয়, “কেনেবাকৈ তেওঁৰ পুত্ৰ জীৱন ৰক্ষা পৰিছিছে। মই তেওঁক ৮ অক্টোবৰত ফোন কৰা নাছিলো। তাৰ পিছত, মই তেওঁৰ বন্ধুক ফোন কৰিছিলো আৰু সকলো জানিব পাৰিছিলো। তেওঁৰ পেটত ১১ ঘণ্টাৰ বাবে অস্ত্ৰোপচাৰ কৰা হৈছিল। মই মোৰ পুত্ৰৰ চিকিৎসাত ভাৰত চৰকাৰৰ সহায় বিচাৰিছো। । “শুভমক আক্ৰমণ কৰাৰ অভিযোগত চিডনীত এজন ২৭ বছৰীয়া যুৱকক গ্ৰেপ্তাৰ কৰা হৈছে।
শুভমৰ ভগ্নী কাব্য গাৰ্গে টুইট কৰিছে তেওঁ বিষয়টোত ভাৰত চৰকাৰৰ সহায় বিচাৰিছে। টুইটটোত প্ৰধানমন্ত্ৰীৰ কাৰ্যালয়, বৈদেশিক পৰিক্ৰমা মন্ত্ৰী এছ জয়শংকৰ আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথকো টেগ কৰা হৈছে। অষ্ট্ৰেলিয়ান হাই কমিছনৰ এজন মুখপাত্ৰই কয় যে চিডনীত থকা ভাৰতীয় কনচুলেটে যুৱকজনক সহায় কৰি আছে।
