উচ্চ শিক্ষাৰ বাবে ব্ৰিটেইনলৈ যোৱা হাৰিয়ানাৰ এজন ভাৰতীয় যুৱকৰ সন্দেহজনক মৃত্যুৱে উদ্বেগৰ সৃষ্টি কৰিছে। মৃত যুৱকজনৰ নাম বিজয় কুমাৰ শ্বেৱৰণ। তেওঁ হাৰিয়ানাৰ চৰখী দাদ্ৰীৰ বাসিন্দা আছিল আৰু ব্ৰিটেইনৰ ৱৰ্চেষ্টাৰ চহৰত এই ঘটনা সংঘটিত হৈছে বুলি জানিব পৰা গৈছে।
উল্লেখযোগ্য যে, বিজয়ে আগতে ভাৰতীয় শুল্ক বিভাগত (Customs Department) কৰ্মৰত আছিল। কিন্তু উচ্চ শিক্ষা লাভৰ লক্ষ্যৰে সেই চৰকাৰী চাকৰি এৰি তেওঁ ব্ৰিটেইনলৈ গৈছিল।
বৰ্তমানলৈকে এই ঘটনা সন্দৰ্ভত ব্ৰিটিছ আৰক্ষীয়ে কোনো আনুষ্ঠানিক বিবৃতি প্ৰকাশ কৰা নাই। অৱশ্যে বিজয়ৰ পৰিয়ালে তেওঁক হত্যা কৰা হৈছে বুলি দাবী কৰিছে। পৰিয়ালৰ সদস্যসকলৰ মতে, হাৰিয়ানাৰ কোনো লোকেই এই অপৰাধ সংঘটিত কৰিছে বুলি তেওঁলোকে সন্দেহ প্ৰকাশ কৰিছে।
এই ঘটনাৰ পিছত বিজয়ৰ মৃতদেহ ভাৰতলৈ ঘূৰাই অনাৰ দাবীত পৰিয়ালে বৈদেশিক পৰিক্ৰমা মন্ত্ৰালয়ৰ কাষ চপিছে। মৃতকৰ ভাতৃ ৰবি কুমাৰে মৃতদেহটো দেশলৈ ঘূৰাই অনাৰ বাবে বৈদেশিক পৰিক্ৰমা মন্ত্ৰালয়লৈ এখন পত্ৰ প্ৰেৰণ কৰিছে।
ৰবিয়ে তেওঁৰ চিঠিত উল্লেখ কৰিছে যে, বিদেশৰ পৰা মৃতদেহ ঘৰলৈ অনাৰ প্ৰক্ৰিয়া জটিল আৰু অকল পৰিয়ালৰ পক্ষে এই কাম কৰা সম্ভৱ নহয়। সেইবাবে তেওঁ লণ্ডনত অৱস্থিত ভাৰতীয় উচ্চায়ুক্তৰ পৰাও সহায় বিচাৰিছে। লগতে কেন্দ্ৰীয় মন্ত্ৰী মনোহৰ লাল খট্টৰলৈও তেওঁ সাহায্য বিচাৰি আবেদন জনাইছে।
ইফালে, বিজয়ৰ মৃত্যুত গভীৰ শোক প্ৰকাশ কৰিছে চৰখী দাদ্ৰীৰ বিধায়ক সুনীল সাতপল সাংৱানে। তেওঁ এই ঘটনাক গুৰুত্বসহকাৰে লৈ প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহক মৃতদেহটো শীঘ্ৰে ভাৰতলৈ ঘূৰাই অনাৰ ব্যৱস্থা কৰিবলৈ আহ্বান জনাইছে।
বৰ্তমান এই ঘটনাৰ প্ৰকৃত কাৰণ স্পষ্ট হোৱা নাই। ব্ৰিটেইনৰ আৰক্ষীৰ তদন্তৰ অন্তত বিজয়ৰ মৃত্যুৰ ৰহস্য উন্মোচন হ’ব বুলি আশা কৰা হৈছে।
