আফ্ৰিকান ৰাষ্ট্ৰ চুডানত সেনা আৰু অৰ্ধসামৰিক বাহিনীৰ মাজত ক্ষমতাৰ সংঘাতে ভয়াৱহ ৰূপ ধাৰণ কৰিছে। সেনা আৰু অৰ্ধসামৰিক বাহিনীৰ মাজত সৃষ্টি হোৱা এই সংঘৰ্ষত অৰ্ধশতাধিক লোকৰ মৃত্যু হোৱাৰ লগতে ৬ শতাধিক লোক আহত হৈছে।
শোকাৱহভাৱে এই সংঘৰ্ষত প্ৰাণ হেৰুৱাইছে চুদানত কৰ্মৰত এগৰাকী ভাৰতীয় লোকে। চুডানৰ ভাৰতীয় দূতাবাসে নিশ্চিত কৰিছে ভাৰতীয় নাগৰিকগৰাকীৰ মৃত্যুৰ খবৰ। এক টুইট যোগে দূতাবাসে এই বিষয়ে সদৰী কৰিছে।
ভাৰতীয় দূতাবাসে টুইটটোত উল্লেখ কৰা মতে, এলবাৰ্ট অগেষ্টিন নামৰ ভাৰতীয় নাগৰিকগৰাকী কালি এক লক্ষ্যভ্ৰষ্ট গুলীত আঘাতপ্ৰাপ্ত হৈছিল। চুদানৰ এটা দাল গ্ৰুপ কোম্পানীত কাম কৰা অগেষ্টিনৰ আজি এই আঘাতৰ ফলস্বৰূপেই মৃত্যু হয় বুলি দূতাবাসে কয়।
দূতাবাসে লগতে এই ক্ষেত্ৰত পৰৱৰ্তী ব্যৱস্থা গ্ৰহণৰ বাবে অগেষ্টিনৰ পৰিয়াল আৰু চিকিৎসা কৰ্তৃপক্ষৰ সৈতে যোগাযোগ কৰি আছে বুলি সদৰী কৰে।
Press Release
It has been reported that Mr Albert Augestine, an Indian National working in a Dal Group Company in Sudan who got hit by a stray bullet yesterday succumbed to his injuries.
Embassy is in touch with family and medical authorities to make further arrangements.
— India in Sudan (@EoI_Khartoum) April 16, 2023
উল্লেখ্য যে, দেশখনৰ ৰাজধানী খাৰ্টুমস্থিত ৰাষ্ট্ৰপতি ভৱন, ৰাজ্যিক টিভি আৰু সেনাৰ মুখ্য কাৰ্যালয়ৰ স্বত্ব দখলক লৈ সৃষ্টি হোৱা এই ভয়াৱহ সংঘাতে দেশখনৰ সাধাৰণ জনসাধাৰণৰ জীৱন সংকটৰ মুখলৈ ঠেলি দিছে।
চুডানৰ চিকিৎসক সংঘই জানিবলৈ দিয়া মতে, পশ্চিম দাৰফুৰ অঞ্চল আৰু উত্তৰ মেৰ’ৱে চহৰত সামৰিক আৰু আৰ এছ এফৰ জোৱানকে ধৰি বহু লোকৰ অগণন হতাহতি হৈছে।
সংবাদ সংস্থা ৰয়টাৰৰ প্ৰতিবেদন মতে, চুডানৰ সেনাই ৰাজধানীৰ ওচৰৰ অৰ্ধসামৰিক বাহিনীৰ ঘাটিত বিমান আক্ৰমণ চলাই দেশখনৰ ওপৰত পুনৰ নিয়ন্ত্ৰণ দখল কৰাৰ ভাবুকি প্ৰদান কৰিছে।
ৰয়টাৰে প্ৰত্যক্ষদৰ্শীৰ উদ্ধৃতিৰে প্ৰকাশ কৰা অনুসৰি এদিনীয়া তীব্ৰ যুদ্ধৰ শেষত সেনাই ৰাজধানী খাৰ্টুমৰ লগত সংলগ্ন ওমদুৰমান চহৰত চৰকাৰৰ অৰ্ধসামৰিক ৰেপিড চাপৰ্ট ফৰ্চৰ (আৰ এছ এফ) ঘাটিত আঘাত হানে।
উত্তৰ দিশৰ মেৰ’ৱে, এল ফাশ্বাৰ আৰু পশ্চিম দাৰফুৰ ৰাজ্যৰ খাৰ্টুমৰ ৰাষ্ট্ৰপতি ভৱন, সেনা প্ৰধানৰ বাসগৃহ, ৰাজ্যিক টেলিভিছন ষ্টেচন আৰু বিমানবন্দৰ জব্দ কৰা বুলি দাবী কৰে আৰ এছ এফে। অৱশ্যে সেনাই খাৰিজ কৰিছে সেই দাবী।
চুডানৰ বায়ুসেনাই আৰ এছ এফৰ কাৰ্যকলাপৰ আকাশী জৰীপ চলোৱাৰ সময়ত ঘৰৰ ভিতৰতে থাকিবলৈ পৰামৰ্শ দিছে আৰু খাৰ্টুম ৰাজ্যত আজি দিনটোৰ বাবে ছুটী ঘোষণা কৰি বিদ্যালয়, বেংক আৰু চৰকাৰী কাৰ্যালয় বন্ধ কৰি দিয়া হৈছে।
