সমগ্ৰ ভাৰতবৰ্ষতে এতিয়া তীব্ৰ গৰম আৰু খৰাঙে দেখা দিছে। শেহতীয়া এক খবৰ অনুসৰি শুকুৰবাৰে পুৱা বিশ্বৰ আটাইতকৈ গৰম ৫০ খন চহৰৰ আটাইকেইখনেই ভাৰতত আছিল। উত্তৰ, মধ্য আৰু পূব ভাৰতত এইবাৰ গৰমে এনেদৰে প্ৰকোপ ধাৰণ কৰিছে যে দুপৰীয়া হোৱাৰ আগতেই তাপমাত্ৰা ৪০ ডিগ্ৰী চেলচিয়াছৰ ওপৰলৈ গুচি গৈছে। বতৰ নিৰীক্ষণকাৰী সংস্থা একিউআই ডট ইনৰ তথ্য অনুসৰি শুকুৰবাৰে পুৱা ১০ বাজি ৫০ মিনিটত বিশ্বৰ আটাইতকৈ গৰম চহৰৰ তালিকাখনত কেৱল ভাৰতৰে চহৰসমূহ আছিল। ইয়াৰ ভিতৰত ওড়িশাৰ বলাংগীৰ নামৰ চহৰখন আটাইতকৈ গৰম হিচাপে পৰিগণিত হৈছে, য’ত তাপমাত্ৰা আছিল ৪৫ ডিগ্ৰী চেলচিয়াছ।
এই তালিকাখনত বলাংগীৰৰ পাছতেই আছিল মহাৰাষ্ট্ৰৰ চন্দ্ৰপুৰ আৰু উত্তৰ প্ৰদেশৰ প্ৰয়াগৰাজ। এই দুয়োখন চহৰতে তাপমাত্ৰা আছিল ৪৪ ডিগ্ৰী চেলচিয়াছ। ইয়াৰ উপৰিও ছত্তীশগড়, বিহাৰ, তেলেংগানা, হাৰিয়ানা আৰু মধ্য প্ৰদেশৰ কেইবাখনো চহৰত প্ৰচণ্ড গৰম পৰিছে। আচৰিত কথাটো হৈছে যে বিশ্বৰ এই আটাইতকৈ গৰম ৫০ খন চহৰৰ ভিতৰত আধাতকৈও অধিক চহৰ কেৱল উত্তৰ প্ৰদেশৰে আছিল। উত্তৰ প্ৰদেশৰ বাৰাণসী, বান্দা, বাৰেলী আৰু অযোধ্যা আদি ঠাইত দুপৰীয়া নৌহওতেই তাপমাত্ৰা ৪২ ৰ পৰা ৪৩ ডিগ্ৰী চেলচিয়াছ স্পৰ্শ কৰিছিল। ভাৰতীয় বতৰ বিজ্ঞান বিভাগে সতৰ্ক কৰি দিছে যে উত্তৰ-পশ্চিম আৰু মধ্য ভাৰতত এই তীব্ৰ গৰমৰ প্ৰকোপ আৰু কিছুদিনলৈ অব্যাহত থাকিব। ইয়াৰ বাবে কেইবাখনো ৰাজ্যত ইতিমধ্যে ৰেড আৰু অৰেঞ্জ এলাৰ্ট জাৰি কৰা হৈছে।
বতৰ বিজ্ঞানীসকলৰ মতে আকাশ পৰিষ্কাৰ হৈ থকা আৰু উত্তৰ-পশ্চিম দিশৰ পৰা অহা শুকান বতাহৰ বাবেই এইবাৰ দেশত গৰমৰ মাত্ৰা ইমান বৃদ্ধি পাইছে। সমগ্ৰ অঞ্চলটোত যেন এক প্ৰকাৰৰ গৰমৰ আৱৰণ বা হিট ডোম সৃষ্টি হৈছে। আনকি দেশৰ ৰাজধানী দিল্লী আৰু ইয়াৰ আশে-পাশে থকা অঞ্চলসমূহতো অহা কেইটামান দিনত তাপমাত্ৰা ৪৫ ডিগ্ৰী চেলচিয়াছ পৰ্যন্ত হোৱাৰ সম্ভাৱনা আছে। এই অসহ্যকৰ গৰমৰ বাবে বিভিন্ন হাস্পতালত ৰোগীৰ সংখ্যাও বাঢ়িবলৈ ধৰিছে। বিশেষকৈ ৰ’দত কাম কৰা শ্ৰমিক, শিশু আৰু বৃদ্ধসকলৰ মাজত শৰীৰৰ পানী শুকাই যোৱা আৰু হিট ষ্ট্ৰোক হোৱাৰ দৰে সমস্যা দেখা গৈছে। প্ৰশাসনে সাধাৰণ ৰাইজক দুপৰীয়াৰ সময়ছোৱাত প্ৰয়োজন নহ’লে ঘৰৰ বাহিৰলৈ নোলাবলৈ আৰু শৰীৰ সুস্থ ৰাখিবলৈ পৰ্যাপ্ত পৰিমাণে পানী খাবলৈ পৰামৰ্শ দিছে।
