ক’ৰ’না ভাইৰাছৰ আতংকই ভাৰতৰ বজাৰত বৃদ্ধি কৰিছে কঁঠালৰ চাহিদা; পিছে কেনেকৈ?
সমগ্ৰ বিশ্বতে মাহামাৰী ৰূপ ধাৰণ কৰা মাৰাত্মক ক’ৰ’না ভাইৰাছৰ আতংকই ভাৰতৰ বজাৰত বৃদ্ধি কৰিছে কঁঠালৰ চাহিদা।
ভাৰতত ক’ৰ’না ভাইৰাছত আক্ৰান্ত ৰোগীৰ সংখ্যা বৃদ্ধি পোৱাৰ লগে লগে ভাৰতৰ বজাৰত কুকুৰা আৰু খাহীৰ মাংসৰ চাহিদা দ্ৰুত গতিত হ্ৰাস পাইছে।
মাংসৰ পৰা ক’ৰ’না ভাইৰাছৰ বীজাণু সংক্ৰমণ ঘটিব বুলি শংকিত হৈ মাংসৰ পৰিৱৰ্তে মানুহে কঁঠাল খাবলৈ লোৱাত বজাৰত কঁঠালৰ চাহিদা অভাৱনীয় ভাৱে বৃদ্ধি পোৱা দেখা গৈছে।
আনকি গ্ৰাহকৰ চাহিদাৰ প্ৰতি লক্ষ্য ৰাখি হোটেল-ৰেষ্টোৰেন্টত চিকেন আৰু মটন বিৰিয়ানী ঠাইত কঁঠালৰ বিৰিয়ানীও প্ৰস্তুত কৰা দেখা গৈছে।
কঁঠালৰ বিৰিয়ানীৰ চাহিদা অত্যাধিক বৃদ্ধি পোৱাত এতিয়া কঁঠালৰ দামো অভাৱনীয় ভাৱে বৃদ্ধি পোৱা পৰিলক্ষিত হৈছে।
উল্লেখ্য যে কঁঠাল হৈছে বতৰৰ ফল। ফলত বজাৰত কঁঠালৰ নাটনিয়ে দেখা দিছে।
হোটেল-ৰেষ্টোৰেন্টৰ মালিকসকলে কঁঠালৰ যোগান সীমাৱদ্ধ হোৱাৰ বাবে বজাৰৰ পৰা অধিক মূল্যত ক্ৰয় কৰিবলৈ বাধ্য হৈছে।
বজাৰত এতিয়া কঁঠালৰ মূল্য ১২০% শতাংশ পৰ্যন্ত বৃদ্ধি পাইছে।
আনফালে চিকেনৰ প্ৰতি মানুহৰ মনত সোমোৱা শংকা দূৰ কৰিবলৈ প’লট্ৰী ফাৰ্মৰ মালিক পক্ষই বিভিন্ন পন্থা হাতত লোৱা দেখা গৈছে।
মানুহৰ মনত সোমোৱা ভ্ৰান্ত ধাৰণা তথা শংকা দূৰ কৰিবলৈ অলপতে প’লট্ৰী ফাৰ্মৰ মালিক পক্ষই ঠায়ে ঠায়ে চিকেন মেলাও আয়োজন কৰা দেখা গৈছে।