দেশত কৰ’নাত নতুনকৈ ৭ জনৰ মৃত্যু; কোভিড আক্ৰান্তৰ সংখ্যাই স্পৰ্শ কৰিলে প্ৰায় ৩ হাজাৰ
দেশত আৰু অধিক বৃদ্ধি পালে কৰ’না আক্ৰান্তৰ সংখ্যা। ভাৰতত কোভিড আক্ৰান্তৰ সংখ্যা ২,৭১০ জনলৈ বৃদ্ধি পাইছে। দেশৰ ভিতৰতে সৰ্বাধিক কৰ’না আক্ৰান্ত লোকৰ সংখ্যা কেৰালাত। তাত আক্ৰান্ত লোকৰ সংখ্যা ১১৪৭ জন। সংক্ৰমণৰ সমান্তৰালকৈ মৃত্যুৰ সংখ্যাও উদ্বেগজনক। যোৱা ২৪ ঘন্টাত দেশত কৰ’নাত ৭ জন লোকৰ মৃত্যু হৈছে।
কৰ’নাৰ নতুন ঢৌত যি হাৰত সংক্ৰমিত লোকৰ সংখ্যা বাঢ়িছে, সেই হাৰত উদ্বেগো বিয়পি পৰিছে। যদিও চৰকাৰে আতংকিত হোৱাৰ কোনো কাৰণ নাই বুলি আশ্বাস দিছে।
জানিব পৰা মতে, কেৰালাৰ পাছত দেশৰ ভিতৰতে সৰ্বাধিক কৰ’না আক্ৰান্তৰ সংখ্যা মহাৰাষ্ট্ৰত। সেই ৰাজ্যত কৰ’না আক্ৰান্তৰ সংখ্যা ৪২৪ জন। তাৰ পিছত দিল্লী। তাত আক্ৰান্ত লোকৰ সংখ্যা ২৯৪ জন।
গুজৰাটত ক’ৰ’না আক্ৰান্তৰ সংখ্যা ২২৩ জন। কৰ্ণাটক আৰু তামিলনাডুত ক’ৰ’না আক্ৰান্তৰ সংখ্যা ১৪৮ জন। পশ্চিম বংগত ক’ৰোনা আক্ৰান্তৰ সংখ্যা ১১৬ জন।
যোৱা ২৪ ঘন্টাত মহাৰাষ্ট্ৰত কৰ’নাৰ সংক্ৰমণৰ ফলত ২ জন লোকৰ মৃত্যু হৈছে, দিল্লী, গুজৰাট, কৰ্ণাটক, পঞ্জাৱ, তামিলনাডুত ১ জনকৈ লোকৰ মৃত্যু হৈছে।
কৰ’না সংক্ৰমণৰ পৰা হাত সাৰিবলৈ সকলোকে মাস্ক পৰিধান কৰাৰ লগতে ছেনিটাইজাৰ ব্যৱহাৰ কৰিবলৈ পৰামৰ্শ দিয়া হৈছে। অৱশ্যে কৰ’নাক কেন্দ্ৰ কৰি অপ্ৰয়োজনীয়ভাৱে আতংকিত হোৱাৰ কোনো কাৰণ নাই বুলি কৈছে প্ৰশাসনে।