ৰে’ল, তথ্য আৰু সম্প্ৰচাৰ তথা ইলেক্ট্ৰনিক্স আৰু তথ্য প্ৰযুক্তি বিভাগৰ কেন্দ্ৰীয় মন্ত্ৰী অশ্বিনী বৈষ্ণৱে বৃহস্পতিবাৰে ৰে’ল ভৱনত অনুষ্ঠিত এখন বৈঠকত জনায় যে ভাৰতৰ প্ৰথম বন্দে ভাৰত শ্লীপাৰ ট্ৰেইন অসমৰ কামাখ্যা আৰু পশ্চিমবঙ্গৰ হাওড়াৰ মাজত চলাচল কৰিব। তেওঁ জনায় যে ৰে’লখনৰ সকলো পৰীক্ষা-নিৰীক্ষা আৰু চাৰ্টিফিকেচন সফলভাৱে সম্পূৰ্ণ হৈছে আৰু প্ৰধানমন্ত্ৰী নৰেন্দ্ৰ মোদীয়ে জানুৱাৰী মাহতে এই সেৱাৰ ফ্লেগ অফ কৰিব।
বন্দে ভাৰত শ্লীপাৰ ট্ৰেইনৰ উদ্বোধন ভাৰতীয় ৰে’লৱেৰ বাবে এক ঐতিহাসিক মাইলফলক, যিয়ে আধুনিক, ছেমি-হাই-স্পীড ৰাত্ৰিকালীন যাত্ৰী সেৱাৰ এক নতুন যুগৰ সূচনা কৰিছে। ঘণ্টাত সৰ্বাধিক ১৮০ কিলোমিটাৰ গতিৰে চলাচল কৰিবলৈ ডিজাইন কৰা এই ৰে’লখনত বিশ্বমানৰ শ্লীপাৰসুবিধাসমূহ আগবঢ়োৱা হৈছে, যাৰ ফলত দীৰ্ঘ দূৰত্বৰ ৰাত্ৰিকালীন যাত্ৰাত আৰাম, সুৰক্ষা আৰু পৰিচালনগত দক্ষতা উল্লেখযোগ্যভাৱে বৃদ্ধি কৰিছে।
ভৱিষ্যৎ পৰিকল্পনাৰ কথা উল্লেখ কৰি মন্ত্ৰীগৰাকীয়ে জনায় যে ২০২৬ বৰ্ষটো ভাৰতীয় ৰে’লৱেৰ বাবে বৃহৎ সংস্কাৰৰ বছৰ হ’ব আৰু কেইবাটাও যাত্ৰী-কেন্দ্ৰিক পদক্ষেপ প্ৰক্ৰিয়াধীন আছে। তেওঁ ৰে’লখনৰ আৰামদায়ক অভ্যন্তৰীণ নক্সা, উন্নত সুৰক্ষা বৈশিষ্ট্য আৰু অঞ্চলভিত্তিক অন-ব’ৰ্ড কেটাৰিঙৰ ওপৰত গুৰুত্ব আৰোপ কৰে।
যাত্ৰীসকলক এক সাংস্কৃতিকভাৱে সমৃদ্ধ আৰু স্মৰণীয় ভ্ৰমণ অভিজ্ঞতা প্ৰদান কৰিবলৈ খাঁটি অসমীয়া আৰু বঙালী খাদ্য পৰিবেশন কৰা হ’ব বুলিও তেওঁ উল্লেখ কৰে। তেওঁ লগতে কয় যে বন্দে ভাৰত শ্লীপাৰট্ৰেইনৰ ভাড়া একে ৰুটৰ বিমান ভাড়াৰ তুলনাত উল্লেখযোগ্যভাৱে কম হ’ব আৰু ইয়াত খাদ্যো অন্তৰ্ভুক্ত থাকিব, যাৰ ফলত ৰাত্ৰিকালীন যাত্ৰাৰ বাবে ই এক সাশ্ৰয়ী আৰু সুবিধাজনক বিকল্প হিচাপে পৰিগণিত হ’ব।
১৬টা কোচযুক্ত এই ৰেকটোৰ মুঠ যাত্ৰী বহনক্ষমতা ৮২৩ জন, য’ত ১১টা এচি থ্ৰী-টায়াৰ কোচ, ৪টা এচি টু-টায়াৰ কোচ আৰু ১টা ফাৰ্ষ্ট এচি কোচ অন্তৰ্ভুক্ত আছে। যাত্ৰী-কেন্দ্ৰিক বৈশিষ্ট্যসমূহৰ ভিতৰত আছে আধুনিকভাৱে ডিজাইন কৰা কুছনযুক্ত বার্থ, উন্নত যাত্ৰাৰ বাবে আধুনিক ছাছপেনশন, শব্দ কমোৱাৰ ব্যৱস্থা, ভেষ্টিবিউলসহ স্বয়ংক্ৰিয় দুৱাৰ আৰু আধুনিক যাত্ৰী তথ্য ব্যৱস্থা। দিব্যাংগ যাত্ৰীসকলৰ বাবে বিশেষ ব্যৱস্থা, আধুনিক শৌচাগাৰ আৰু উন্নত জীবাণুনাশক প্ৰযুক্তিয়ে স্বাস্থ্যবিধি, প্ৰৱেশযোগ্যতা আৰু যাত্ৰাৰ স্বাচ্ছন্দ্যক অধিক শক্তিশালী কৰে।
সুৰক্ষা হৈছে এই নতুন প্ৰজন্মৰ ৰে’লখনৰ এক প্ৰধান বৈশিষ্ট্য। বন্দে ভাৰত শ্লীপাৰট্ৰেইনখন কবচ সুৰক্ষা ব্যৱস্থা, জৰুৰীকালীন যাত্ৰী টক-বেক ইউনিট আৰু উন্নত নিয়ন্ত্ৰণ ব্যৱস্থাসহ অত্যাধুনিক ড্ৰাইভাৰ কেবিনেৰে সজ্জিত। ইয়াৰ এৰ’ডাইনামিক বহিৰ্ভাগ আৰু পৰিশোধিত অভ্যন্তৰীণ নক্সাই দেশীয় ৰে’ল ইঞ্জিনিয়াৰিং আৰু ডিজাইনৰ সৰ্বশেষ সাফল্য প্ৰতিফলিত কৰে।
এই সেৱা আৰম্ভ হ’লে অসম আৰু পশ্চিমবঙ্গৰ মাজত যোগাযোগ ব্যৱস্থা উল্লেখযোগ্যভাৱে উন্নত হ’ব। ইয়াৰ প্ৰধান সুবিধা লাভ কৰা জিলা সমূহৰ ভিতৰত আছে অসমৰ কামৰূপ মহানগৰ আৰু বঙাইগাঁও, লগতে পশ্চিমবঙ্গৰ কোচবিহাৰ, জলপাইগুড়ি, মালদহ, মুৰ্শিদাবাদ, পূৰ্ব বর্ধমান, হুগলি আৰু হাওড়া। এই উন্নত সংযোগে আঞ্চলিক গতিশীলতা, বাণিজ্য, পৰ্যটন আৰু আৰ্থ-সামাজিক উন্নয়নক সহায় কৰিব।
ভাৰতৰ প্ৰথম বন্দে ভাৰত শ্লীপাৰ ৰে’লৰ সূচনাই ভাৰতীয় ৰে’লৱেৰ উদ্ভাৱন, যাত্ৰী-কেন্দ্ৰিক সেৱা আৰু এখন আধুনিক, ভৱিষ্যৎ-প্ৰস্তুত ৰে’ল নেটৱৰ্ক গঢ়ি তোলাৰ প্ৰতি অটল অঙ্গীকাৰক পুনৰ নিশ্চিত কৰে।
