মহানগৰবাসীৰ বাবে এক সু-খবৰ। কিয়নো অতি কম খচৰৰ লগতে কম সময়ৰ ভিতৰতে আপুনি এতিয়া গুৱাহাটীত এঠাইৰ পৰা আন ঠাইলৈ চাৰিচকীয়াৰ সলনি দুচকীয়া বাহনত যাত্ৰা কৰিব পাৰিব। বাংগালুৰুৰ এক প্ৰতিষ্ঠান ‘ৰেপিড’ই আজিৰ পৰা আৰম্ভ কৰিলে বাইক টেক্সী সেৱা।
আজি খানাপাৰাৰ পশু চিকিৎসা মহাবিদ্যালয় খেলপথাৰৰ সন্মুখৰ ৱাকিং জ’নত এই ৰেপিড’ সেৱাৰ শুভাৰম্ভণি কৰে শিক্ষা আৰু গুৱাহাটী উন্নয়ন দপ্তৰৰ মন্ত্ৰী সিদ্ধাৰ্থ ভট্টাচাৰ্য্যই।
এই ৰেপিড’ সেৱাৰ শুভাৰম্ভণি কৰি মন্ত্ৰী সিদ্ধাৰ্থ ভট্টাচাৰ্য্যই ৰেপিড’ৰ এই পদক্ষেপৰ শলাগ লোৱাৰ লগতে হেলমেট ব্যৱহাৰৰ ক্ষেত্ৰত কোনোধৰণৰ শিথিলতা নানিবৰ বাবে আহ্বান জনায়।
উল্লেখযোগ্য যে বাইক ৰাইডাৰ্ছে হেলমেট ব্যৱহাৰ নকৰিলে তথা বাইকত যাত্ৰা কৰা যাত্ৰীক যদি হেলমেট যোগান ধৰিব নোৱাৰে তেন্তে সেই ৰাইডাৰ্ছৰ অনুজ্ঞাপত্ৰ কৰ্তন কৰি দিয়া হ’ব বুলিও সকীয়াই দিয়ে মন্ত্ৰী ভট্টাচাৰ্য্যই।
মহানগৰবাসীয়ে অ’লা-ওবেৰৰ দৰেই মোবাইল এপৰ দ্বাৰা এই সুবিধা লাভ কৰিব পাৰিব। মটৰচাইকেলৰ দ্বাৰা উপলব্ধ হ’বলগীয়া এই সেৱাত এজন যাত্ৰীয়ে নিৰাপদে গুৱাহাটীৰ যিকোনো ঠাইলৈ যাত্ৰা কৰিব পাৰিব বুলি সংবাদ মাধ্যমৰ আগত জানিবলৈ দিয়ে ৰেপিড’ৰ অসম শাখাৰ অপাৰেশ্ব্যন এক্সিকিউটিভ সিদ্ধাৰ্থ সোণোৱালে।
ইয়াৰোপৰি, অসমত দ্বৈত হেলমেটৰ সুবিধাটো বৰ্তমানলৈকে হৈ উঠা নাই। গতিকে এক সামাজিক সচেতনতা সৃষ্টিৰ বাবে ৰেপিড’ই পোন প্ৰথমবাৰলৈ বাইকসমূহত দ্বৈত হেলমেটৰ ব্যৱস্থা কৰিছে। বাইকত যাত্ৰা কৰা যাত্ৰীসকলৰ নিৰাপত্তাৰ প্ৰতি লক্ষ্য ৰাখি ৰেপিড’ই একোটাকৈ হেলমেটৰো ব্যৱস্থা কৰিছে বুলি সিদ্ধাৰ্থ সোণোৱালে জানিবলৈ দিয়ে।
লগতে কোনো যাত্ৰীয়ে হয়তো ৰেপিড’ই যোগান ধৰা হেলমেটটো পৰিধান কৰিবলৈ আপত্তি কৰিব পাৰে, তাৰ প্ৰতি লক্ষ্য ৰাখি একোখনকৈ এবাৰ ব্যৱহাৰ কৰিব পৰাকৈ কটনৰ কাপোৰ ৰখা হৈছে। কটনৰ কাপোৰখন পিন্ধি তাৰ ওপৰত হেলমেটটো পৰিধান কৰিব পাৰিব বুলি সোণোৱালে কয়।
আনহাতে খুব কম খৰচতে যাত্ৰীসকলে যাত্ৰা কৰাৰ সুবিধা লাভ কৰিব বুলি জানিবলৈ দি সোণোৱালে কয়, ‘দৈনিক হিচাপত ১৫ টকাকৈ তথা প্ৰতি কিল’মিটাৰত ৩ টকাকৈ নাইবা প্ৰতি মিনিটত ১টকাকৈ যাত্ৰা কৰিব পাৰিব।‘
কাৰ্য্যালয়লৈ যোৱাৰ সময়ছোৱাত গুৱাহাটীত যান-জঁটৰ সৃষ্টি হোৱাটো নতুন কথা নহয়। কিন্তু এতিয়া চিটী বাছ অথবা অলা-ওবেৰত অহা-যোৱা কৰা যাত্ৰীসকলৰ বাবে চিন্তাৰ প্ৰয়োজন নাই। তেওঁলোকে চমু পথেৰে বাইকৰ জৰিয়তে গন্তব্য স্থানত কম সময়তে উপস্থিত হ’ব পাৰিব বুলি জানিব দিছে ৰেপিড’ই।
বৰ্তমানলৈকে কামৰূপ মেট্ৰ’ৰ স্থানীয় শতাধিক ৰাইডাৰছে নাম পঞ্জীয়ন কৰিছে তথা প্ৰথম অৱস্থাত ১০০ খন বাইকেৰে এই সেৱা আৰম্ভ কৰিব। বৰ্তমান মহিলা ৰাইডাৰছ ৰখা নাই যদিও দেশৰ অন্য মহানগৰসমূহত মহিলা ৰাইডাৰছো এই ৰেপিড’ৰ সৈতে জড়িত হৈ আছে বুলি জানিব পৰা গৈছে।
