থাইলেণ্ডৰ ৰাজধানী চহৰ বেংককৰ পৰা মুম্বাই অভিমুখী ইণ্ডিগ’ৰ এখন বিমানত চিকিৎসাজনিত জৰুৰীকালীন অৱস্থাৰ বাবে ম্যানমাৰৰ ৰেঙ্গুনত জৰুৰী অৱতৰণ কৰা হয়। অৱশ্যে বিমান পৰিচালকসকলৰ এনে পদক্ষেপৰ পিছতো দুৰ্ভাগ্যৱশত: প্ৰাণ হেৰুৱাবলগীয়া হয় যাত্ৰীগৰাকীয়ে।
এক বিবৃতি যোগে ইণ্ডিগ’ই এই বিষয়ে সদৰী কৰিছে। ইণ্ডিগ’ৰ বিবৃতি অনুসৰি যোৱা দেওবাৰে সংঘটিত হয় এই শোকাৱহ ঘটনা। এনে আকস্মিক কাৰণত বিমানখন ৰেঙ্গুন বন্দৰত জৰুৰীকালীন অৱতৰণ কৰে যদিও যাত্ৰীগৰাকীক বিমানবন্দৰৰ চিকিৎসা দলে পৰীক্ষা কৰি মৃত ঘোষণা কৰে।
চমু বিবৃতিটোত ইণ্ডিগ’ই কয়, “বেংককৰ পৰা মুম্বাইলৈ পৰিচালিত ইণ্ডিগ’ৰ 6E-57 বিমানখন চিকিৎসাজনিত জৰুৰীকালীন অৱস্থাৰ বাবে ৰেঙ্গুনলৈ যাত্ৰাপথৰ পৰিৱৰ্তন কৰা হৈছিল। দুৰ্ভাগ্যবশতঃ অৱতৰণৰ পিছত যাত্ৰীগৰাকীক বিমানবন্দৰৰ চিকিৎসা দলে মৃত ঘোষণা কৰিছিল।”
অৱশ্যে এই সন্দৰ্ভত আন কোনো তথ্য প্ৰকাশ কৰা নাই বিমান পৰিবহণ সংস্থাটোৱে। লক্ষণীয়ভাৱে চলিত মাহত ইণ্ডিগ’ৰ বিমানত দ্বিতীয়বাৰৰ বাবে এনে পৰিস্থিতিৰ সৃষ্টি হৈছে।
ইয়াৰ পূৰ্বে ১৭ মাৰ্চতো এগৰাকী যাত্ৰীৰ চিকিৎসাজনিত জৰুৰীকালীন অৱস্থাৰ বাবে ৰাঁচীৰ পৰা পুনে অভিমুখী ইণ্ডিগ’ৰ এখন বিমান নাগপুৰ বিমানবন্দৰত জৰুৰী অৱতৰণ কৰিছিল।
নাগপুৰ বিমানবন্দৰৰ পৰা যাত্ৰীগৰাকীক তাৎক্ষণিকভাৱে এখন চিকিৎসালয়লৈ লৈ যোৱা হৈছিল যদিও চিকিৎসালয়ত তেওঁক মৃত ঘোষণা কৰা হৈছিল।