পুনৰ বিমানত যান্ত্ৰিক বিজুতি! ১৮২ জন যাত্ৰীৰে দিল্লীত জৰুৰীকালীন অৱতৰণ ইণ্ডিগ’ৰ বিমান
এয়াৰ ইণ্ডিয়াৰ পিছতে এইবাৰ ইণ্ডিগ’ৰ বিমানত দেখা দিছে যান্ত্ৰিক বিজুতি। দিল্লীৰ পৰা লেহ অভিমুখী ইণ্ডিগ’ৰ ৬ই ২০০৬ বিমানখন লেহ পোৱাৰ কিছু সময়ৰ পাছতে কাৰিকৰী সমস্যাৰ বাবে দিল্লীলৈ উভতি আহি জৰুৰীকালীন অৱতৰণ কৰিবলগীয়া হয়। ক্ৰুসহ প্ৰায় ১৮০ জন যাত্ৰী কঢ়িয়াই অনা বিমানখন নিৰাপদে অৱতৰণ কৰা বুলি জানিব পৰা গৈছে। ইণ্ডিগোৱে এতিয়াও এই কাৰিকৰী সমস্যাৰ সবিশেষ প্ৰকাশ কৰা নাই।
প্ৰসংগ ক্ৰমে ১৬ জুনতো গোৱাৰ পৰা লক্ষ্ণৌ অভিমুখী ইণ্ডিগ’ৰ এখন বিমান উৰণৰ কিছু সময়ৰ পিছতে বেয়া বতৰৰ বাবে ভয়াৱহ অস্থিৰতাত আবদ্ধ হৈ পৰে। বিমানখন নিৰাপদে অৱতৰণ কৰিলেও যাত্ৰীসকলে এই অভিজ্ঞতাক ভয়ংকৰ বুলি অভিহিত কৰে।
একেদৰে ১৭ জুনত কোচিৰ পৰা দিল্লী অভিমুখী আন এখন ইণ্ডিগ’ বিমান ৬ই ২৭০৬ বিমানত বোমা বিস্ফোৰণৰ ভাবুকি দিয়াৰ পিছত নাগপুৰলৈ ডাইভাৰ্ট কৰা হয়।
শেহতীয়াকৈ আহমেদাবাদত এয়াৰ ইণ্ডিয়াৰ দুৰ্ঘটনা সংঘটিত হোৱাৰ পিছত এনে ধৰণৰ ঘটনাই যাত্ৰীসকলক আতংকিত কৰি তুলিছে।