শাৰজাহ-হায়দৰাবাদ যাত্ৰাৰত ইণ্ডিগ’ৰ এখন বিমানত যাত্ৰা পথতে কাৰিকৰী বিজুতিৰ বাবে পাকিস্তানৰ কৰাচী আন্তঃৰাষ্ট্ৰীয় বিমানবন্দৰত জৰুৰী অৱতৰণ কৰিবলৈ বাধ্য হয়।
বিমানৰ পাইলটজনে কাৰিকৰী বিজুতিৰ পিছতে সাধৱানতামূলক ব্যৱস্থা হিচাপে লগে লগে পাকিস্তানৰ কৰাচী বিমানবন্দৰ অভিমুখে বিমানখনৰ যাত্ৰাপথ সলনি কৰে।
আনহাতে হায়দৰাবাদ অভিমুখী যাত্ৰীসকল এনেদৰে আকস্মিকভাৱে কৰাচীত আৱদ্ধ হোৱাৰ পিছত তেওঁলোকৰ পৰিবহনৰ উদ্দেশ্যে আন এখন বিমান কৰাচীলৈ প্ৰেৰণ কৰা হ’ব বুলি ইণ্ডিগ’ই জানিবলৈ দিয়ে।
এই সন্দৰ্ভত ইণ্ডিগ’ এয়াৰলাইনছে এক বিবৃতিত কয়, “শাৰজাহ-হায়দৰাবাদ বিমানখনৰ পাইলটজনে বিমানখনত কাৰিকৰী ত্ৰুটি লক্ষ্য কৰি সতৰ্কতামূলক ব্যৱস্থা হিচাপে বিমানখন পাকিস্তানৰ কৰাচী অভিমুখে লৈ যায়।”
“যাত্ৰীসকলক হায়দৰাবাদলৈ অনাৰ উদ্দেশ্যে কৰাচীলৈ আন এখন বিমান প্ৰেৰণ কৰা হৈছে।”- বিবৃতিটোত লগতে ইণ্ডিগ’ই কয়।
উল্লেখ্য যে যোৱা দুসপ্তাহৰ ভিতৰত দ্বিতীয়বাৰৰ বাবে ভাৰতীয় এয়াৰলাইনৰ বিমানে পাকিস্তানৰ কৰাচী বিমানবন্দৰত এইদৰে জৰুৰী অৱতৰণ কৰিব লগা হৈছে।
যোৱা সপ্তাহত স্পাইচজেটৰ দিল্লী-ডুবাই অভিমুখী বিমানখন বিমানখনৰ এটা ইন্ধন টেংকত ইন্ধন হ্ৰাস হোৱাৰ পিছত কৰাচীত জৰুৰী অৱতৰণ কৰিব লগা হৈছিল।
