ইণ্ডিগ’ৰ সমস্যা ক্ৰমান্বয়ে বৃদ্ধি পাইছে আৰু এতিয়া বিমান সংস্থাটোৱে চৰকাৰৰ ফালৰ পৰা এক বৃহৎ আৰ্থিক প্ৰত্যাহ্বানৰ সন্মুখীন হৈছে। ইণ্ডিগ’ৰ বাবে বছৰটোৰ শেষৰ সময়ছোৱা একেবাৰেই সুখকৰ নহ’ল। শেহতীয়াকৈ দিল্লী চৰকাৰে জি এছ টি পৰিশোধ নকৰাৰ অভিযোগত বিমান সংস্থাটোক ৪৫৮ কোটি টকাৰ জৰিমনা বিহি এক জাননী প্ৰেৰণ কৰিছে। ২০২২-২৩ বিত্তীয় বৰ্ষত নিৰ্ধাৰিত কৰ সঠিকভাৱে নিদিয়াৰ বাবেই দিল্লীৰ চিজিএছটি আয়োগে এই কঠোৰ পদক্ষেপ গ্ৰহণ কৰিছে। কেৱল দিল্লীয়েই নহয়, উত্তৰ প্ৰদেশৰ চিজিএছটি আয়োগেও প্ৰায় ১৫ লাখ টকাৰ আন এখন জাননী বিমান সংস্থাটোলৈ পঠিয়াইছে।
এই জাননী লাভ কৰাৰ পাছতে ইণ্ডিগ’ কৰ্তৃপক্ষই বুধবাৰে শ্বেয়াৰ বজাৰক এই সন্দৰ্ভত অৱগত কৰে। অৱশ্যে বিমান সংস্থাটোৱে তেওঁলোকৰ ওপৰত লগোৱা সকলো অভিযোগ অস্বীকাৰ কৰিছে। ইণ্ডিগ’ৰ তৰফৰ পৰা জনোৱা হৈছে যে তেওঁলোকে কোনো ধৰণৰ চৰকাৰী নিয়ম ভংগ কৰা নাই আৰু সকলো কৰ সঠিক সময়ত পৰিশোধ কৰি আহিছে। তেওঁলোকে এই জাননীৰ উপযুক্ত উত্তৰ দিয়াৰ লগতে প্ৰয়োজন হ’লে আদালতৰ দ্বাৰস্থ হৈ আইনীভাৱে ইয়াক প্ৰত্যাহ্বান জনাব বুলিও স্পষ্ট কৰি দিছে।
উল্লেখ্য যে ডিচেম্বৰ মাহৰ আৰম্ভণিতে দেশৰ বিভিন্ন প্ৰান্তত ইণ্ডিগ’ৰ বিমান সেৱা চৰম বিসংগতিৰ সন্মুখীন হৈছিল। ইয়াৰ ফলত যাত্ৰীসকলে যথেষ্ট অসুবিধা ভোগ কৰিছিল আৰু কেন্দ্ৰীয় চৰকাৰেও বিমান সংস্থাটোৰ ওপৰত অসন্তুষ্টি প্ৰকাশ কৰিছিল। এই ঘটনাৰ তদন্তৰ বাবে গঠন কৰা বিশেষ সমিতিয়ে ইতিমধ্যে তেওঁলোকৰ প্ৰতিবেদন দাখিল কৰিছে আৰু ইণ্ডিগ’ৰ বিৰুদ্ধে কঠোৰ ব্যৱস্থা লোৱাৰ পৰামৰ্শ দিছে। অসামৰিক বিমান পৰিবহণ মন্ত্ৰালয়ে ইতিমধ্যে সংস্থাটোক জৰিমনা আৰু সেৱা আংশিকভাৱে বন্ধ কৰাৰ নিৰ্দেশ দিছে। এনে এক জটিল পৰিস্থিতিৰ মাজতে এই বৃহৎ পৰিমাণৰ জি এছ টি জৰিমনাই ইণ্ডিগ’ক অধিক সংকটত পেলাইছে।
