তীব্র পেটৰ বিষৰ যন্ত্ৰণাত কাতৰ এগৰাকী মহিলা বিষৰ উপশম বিচাৰি কাষ চাপিছিল চিকিৎসকৰ। পৰীক্ষা-নিৰীক্ষাৰ অন্তত চিকিৎসালয়ৰ চিকিৎসকসকলে বিচাৰি ওলিয়ালে পেটৰ বিষৰ কাৰণ আৰু মাৰাথান চিকিৎসাৰ অন্তত ৰোগীগৰাকীৰ পেটৰ পৰা উলিয়াই আনিলে ১৫ কেজি ওজনৰ টিউমাৰ।
এই চাঞ্চল্যকৰ খবৰ ভাৰতৰে ইন্দোৰৰ। ইনডেক্স হাস্পতাল নামৰ চিকিৎসালয়খনৰ চিকিৎসকসকলে অশেষ পাৰদৰ্শিতাৰে লাভ কৰিছে এই বৃহৎ সফলতা। ডজনৰো অধিক চিকিৎসক আৰু সহায়ক কৰ্মচাৰীৰ সৈতে জড়িত এটা দলে দুঘণ্টাৰ অধিক সময়ৰ অস্ত্ৰোপচাৰৰ অন্তত লাভ কৰে এই সফলতা।
৪১ বছৰীয়া মহিলাগৰাকীৰ পেটৰ পৰা এই বিশাল আকৃতিৰ টিউমাৰ উলিয়াই অনা অস্ত্ৰোপচাৰ বিশেষজ্ঞৰ দলটোৰ অন্যতম সদস্য ডাঃ অতুল ব্যাস নামৰ চিকিৎসকগৰাকীয়ে এই সন্দৰ্ভত কয় যে, টিউমাৰটো বিশাল হোৱাৰ বাবে খাদ্য খোৱাৰ সময়ত তদা খোজ কঢ়াৰ সময়তো ৰোগী যথেষ্ঠ অসুবিধাৰ সন্মুখীন হৈছিল।
তেওঁৰ এই সমস্যা দূৰ কৰাৰ বাবে এই কঠিন চিকিৎসা পদ্ধতি সম্পন্ন কৰাৰ সিদ্ধান্ত লোৱা হয় বুলি চিকিৎসক ব্যাসে লগতে উল্লেখ কৰে। তেওঁ কয় যে চিকিৎসাৰ সময়ত যিকোনো সৰু এটা ভুলেই মাৰাত্মক হৈ উঠিলহেঁতেন। সেয়েহে অস্ত্ৰোপচাৰ কৰাৰ সময়ত দলটো অত্যন্ত সাৱধান হ’বলগীয়া হৈছিল।
টিউমাৰটোৱে ৰোগীৰ দেহৰ বহু স্নায়ু আবৰি ধৰিছিল আৰু সেয়ে চিকিৎসকে পৰিস্থিতি অত্যন্ত সুক্ষ্মভাৱে চম্ভালিবলগীয়া হৈছিল বুলিও চিকিৎসকগৰাকীয়ে মন্তব্য কৰে। লক্ষণীয়ভাৱে, মহিলাগৰাকীৰ ওজন আছিল ৪৯ কিলোগ্ৰাম আৰু ভিতৰত তেওঁ কঢ়িয়াই ফুৰিছিল ১৫ কিলোগ্ৰাম ওজনৰ এই বৃহৎ টিউমাৰ।
এই বৃহদাকাৰ টিউমাৰটোৰ ফলত মহিলাগৰাকীৰ পেট ফুলি উঠিছিল। ইফালে চিকিৎসকৰ ভাষ্য মতে, টিউমাৰটো খুব সোনকালেই ফুটি যোৱাৰ সম্ভাৱনা আছিল। ই ৰোগীৰ জীৱনৰ বাবে বিপদজনক হ’লহেঁতেন বুলিও তেওঁলোকে লগতে কয়। অৱশ্যে অস্ত্ৰোপচাৰৰ অন্তত তেওঁ এতিয়া সংকটমুক্ত বুলি চিকিৎসকে লগতে জানিবলৈ দিয়ে।
