যোৱা ৫ চেপ্তেম্বৰত ৰাজ্য কঁপাই যোৱা নাও দুৰ্ঘটনাৰ পাছতেই যেন তৎপৰ হৈ পৰিছে জল-পৰিবহন বিভাগৰ মন্ত্ৰী চন্দ্ৰমোহন পাটোৱাৰী। নাগৰিকত্ব সংশোধনী বিধেয়ক নহয়, এইবাৰ মন্ত্ৰীগৰাকীয়ে জল পৰিবহন বিভাগৰ সংশোধনী বিধেয়ক প্ৰস্তুত কৰাৰ বাবে উঠি-পৰি লগাটো দেখিবলৈ পোৱা গৈছে।
২০১৩ চনৰ খোচলা কমিটিৰ প্ৰতিবেদনৰ ভিত্তিত প্ৰস্তুত উক্ত বিধেয়কখন আগন্তুক বিধানসভাৰ অধিৱেশনত উত্থাপন কৰা হ’ব। এই কথা সংবাদ মাধ্যমৰ আগত জানিবলৈ দি পাটোৱাৰীয়ে কয়, ‘‘ইয়াৰ জৰিয়তে পৃথক স্বতন্ত্ৰ আয়োগ গঠন কৰা হ’ব। লগতে পৃথক বন্দৰ,জাহাজ চলাচলৰ বাবেও অনুমতি প্ৰদান কৰা হ’ব।‘’
উল্লেখ্য যে, জল পৰিবহন বিভাগৰ সৈতে হোৱা বৈঠকৰ অন্তত সংবাদ মাধ্যমৰ আগত অসমৰ সকলো নৈত যন্ত্ৰচালিত ভটভটীৰ চলাচলত নিষেধাজ্ঞা জাৰি কৰাৰ কথা সদৰী কৰি পৰিবহণ মন্ত্ৰী চন্দ্ৰমোহন পাটোৱাৰীয়ে কয় যে ন্যূনতম জীৱন ৰক্ষাৰ ব্যৱস্থা তথা লাইফ জেকেটৰো সু-ব্যৱস্থা ভটভটীসমূহত নাই।‘
আনহাতে, মাজুলী-কমলাবাৰীৰ মাজত দ্বিতীয় পৰ্যায়ৰ ৰ’ৰ’ সেৱা চলিব বুলি ঘোষণা কৰি মন্ত্ৰীগৰাকীয়ে লগতে কয় যে গুৱাহাটী-উত্তৰ গুৱাহাটীৰ মাজত তৃতীয় পৰ্যায়ৰ ৰ’ ৰ’ সেৱা চলিব ।
তেওঁ জানিবলৈ দিয়া মতে, ধুবুৰী-হাটশিঙিমাৰীৰ মাজত ৰ’ৰ’ সেৱাৰ কাম ইতিমধ্যে আৰম্ভ হৈছে। তাৰ পাছতে ৰাজ্যত দ্বিতীয়-তৃতীয় পৰ্যায়ৰ ৰ’ ৰ’ সেৱা আৰম্ভ হ’ব বুলিও তেওঁ প্ৰকাশ কৰে। তেওঁ লগতে গুৱাহাটীত ৩ খন নাও অচিৰেই চলাচল কৰিব বুলিও আশ্বাস দিয়ে।
উল্লেখ্য যে, পুৰণি নাওসমূহক আধুনিকীকৰণ কৰা হৈছে বুলি উল্লেখ কৰি তেওঁ কয়, ‘দুবছৰত ১৫খন ষ্টীলৰ, কাঠৰ ৩খন নাও চলাচলৰ ব্যৱস্থা কৰা হৈছে। ইয়াৰে ষ্টীলৰ ৪খন বৰাকত, এখন ষ্টীল আৰু ৩খন কাঠৰ নাও মাজুলীত চলাচল কৰি আছে। তেওঁ লগতে কয় যে ‘বাকী ৰোৱা ১০খন নাও চলিত বৰ্ষত সম্পূৰ্ণ হৈ উঠিব।‘
মন্ত্ৰী পাটোৱাৰীয়ে লগতে জানিবলৈ দিয়ে নতুনকৈ অন্তৰ্ভুক্ত কৰিবলগীয়া নাওসমূহত এটা ইঞ্জিণৰ পৰিৱৰ্তে দুটাকৈ ইঞ্জিণৰ ব্যৱস্থা ৰখা হ’ব আৰু লগতে প্ৰতিজন যাত্ৰীৰ বিপৰীতে একোটাকৈ লাইফ জেকেটৰ ব্যৱস্থা থাকিব।
আনহাতে, অচিৰে জল-পৰিবহন বিভাগে এক নতুন ৰূপ পাব বুলি সদৰী কৰি তেওঁ কয় যে যোৱা ডেৰ বছৰে বিশ্ব বেংকৰ সহযোগত আঁচনি ৰূপায়ণৰ কাম চলি আছে। INROS LACKNER নামৰ প্ৰতিষ্ঠানটোক এই কামৰ দায়িত্ব দিয়া হৈছে। জাৰ্মানীৰ প্ৰতিষ্ঠানটোৱে ইতিমধ্যে ইয়াৰ আৰ্হি প্ৰস্তুত কৰিছে।
তদুপৰি, যাত্ৰীৰ নিৰাপত্তাৰ ওপৰত সৰ্বাধিক গুৰুত্ব আৰোপ কৰাৰ বাবে জল পৰিবহণ বিভাগে এনে কেতবোৰ সিদ্ধান্ত গ্ৰহণ কৰা বুলিও মন্ত্ৰী চন্দ্ৰমোহন পাটোৱাৰীয়ে সংবাদ মাধ্যমৰ আগত কয়।
