বাক্সা জিলাৰ কাহিতামা পথাৰ আৰু লাবদাংগুৰী গাঁওত তান্ত্ৰিকৰ কথাৰ ওপৰত ভিত্তি কৰি চাৰিটা পৰিয়ালক সমাজৰ পৰা এঘৰীয়া কৰা কাৰ্যই চাঞ্চল্যৰ সৃষ্টি কৰিছে।
জুন মাহতে হোৱা এই ঘটনাই শেহতীয়াকৈ গুৰুতৰ ৰূপ লৈছে। অৱশ্যে ইলোৰা বিজ্ঞান মঞ্চ আৰু ডি ৱাই এফ আইৰ হস্তক্ষেপত ৰাইজে এঘৰীয়া কৰাৰ সিদ্ধান্ত প্ৰত্যাহাৰ কৰে।
ঘটনা অনুসৰি লাবদাংগুৰী গাওঁৰ ডালিম দাসৰ পত্নী উৰ্মিলা দাসে দীৰ্ঘদিন ধৰি বেমাৰত ভুগি আছিল।
তেওঁক ওচৰৰ তান্ত্ৰিক এজনে চাৰি বছৰ ধৰি চিকিৎসা কৰি আছিল যদিও বিশেষ কোনো উন্নতি নোহোৱাত তান্ত্ৰিকজনে বিশেষ মন্ত্ৰৰে পৰীক্ষা কৰি বেমাৰৰ কাৰণ হিচাপে ডাইনীৰ প্ৰভাবৰ কথা পৰিয়ালক জনায়।
তান্ত্ৰিকৰ মন্ত্ৰৰ বলত ৰোগী উৰ্মিলাই ডালিম দাসৰ মাক, দুই ককায়েক, বৌয়েক, সম্পৰ্কীয় বৌয়েক আৰু চুবুৰীয়া গাওঁৰ শৈনেল দাস নাম লোকজনক ডাইনী বুলি চিনাক্ত কৰি দিয়ে।
এই ডাইনী চিনাক্তকৰণ প্ৰক্ৰিয়া এজনে ভিডিও ৰেকৰ্ডিং কৰি প্ৰচাৰ কৰে।
ইয়াৰ ভিত্তিতে উক্ত পৰিয়াল কেইটাই শাস্তিৰ সন্মুখীন হ’বলগীয়া হয়।
এই ঘটনাক কেন্দ্ৰ কৰি আৰু সমগ্ৰ অঞ্চলটোতে বৃদ্ধি পোৱা ডাইনী-অন্ধবিশ্বাসৰ ঘটনাক লৈ আজি কাহিতামা পথাৰ আৰু লাবদাংগুৰী গাওঁৰ মধ্যস্থান পুব চেংমাৰীত ডাইনী-অন্ধবিশ্বাসৰ বিৰুদ্ধে এখন সজাগতা সভা অনুষ্ঠিত হয়।
স্থানীয় সমাজকৰ্মী ৰজনী দৈমাৰীৰ সভাপতিত্বত অনুষ্ঠিত সভাৰ উদ্দেশ্য ব্যাখ্যা কৰে কাৰ্তিক বড়োই।
সভাত ইলোৰা বিজ্ঞান মঞ্চৰ বৰপেটা ৰোড শাখাৰ পৰা সভাপতি ডাঃ নাৰায়ণ দাস, সম্পাদক জগন্নাথ ৰবিদাস আৰু ডি ৱাই এফ আইৰ ৰাজ্যিক যুটীয়া সম্পাদক ৰিতু ৰঞ্জন দাসে বক্তব্য ৰাখে।
বক্তসকলে লাবদাংগুৰী ৰাইজে ডাইনীৰ নামত কৰা বিচাৰৰ শাস্তি উঠাই লৈ সমিল মিলেৰে থকাৰ বাবে লোৱা সিদ্ধান্তক আঁদৰণি জনায় আৰু প্ৰশংসা কৰে।
আগন্তুক সময়তো ৰাইজে শান্তি-সম্প্ৰীতি আৰু একতা তথা যুক্তিবাদী চিন্তাৰে আগবাঢ়ি যাব বুলি আশা কৰে।
তাৎপৰ্যপূৰ্ব কথা হ’ল তান্ত্ৰিকৰ ভূৱা তন্ত্ৰ-মন্ত্ৰৰ বলি হৈ শাস্তিৰ সন্মুখীন হোৱা শৈলেন দাসে লাবদাংগুৰী উপ আৰক্ষী চকীত যোৱা ২৯ জুন তাৰিখে এখন এজাহাৰ দাখিল কৰিছে যদিও পুলিচ প্ৰশাসনে আজিলৈকে কোনো ব্যৱস্থা গ্ৰহণ কৰা নাই।
ডি ৱাই এফ আই আৰু ইলোৰা বিজ্ঞান মঞ্চই স্থানীয় পুলিচৰ ভুমিকাক গৰিহণা দিয়াৰ লগতে বাক্সা জিলাৰ আৰক্ষী অধীক্ষকলৈ দাবী সম্বলিত স্মাৰক পত্ৰ প্ৰদান কৰিছে।
চৰকাৰে ডাইনী কাণ্ড ৰোধৰ বাবে ডাইনী বিৰোধী আইন আনিছে যদিও ডাইনী ৰোধত পুলিচ প্ৰশাসনে কি ভুমিকা লৈছে এই ঘটনাই তাৰ জ্বলন্ত প্ৰমাণ।
আজিৰ সজাগতা সভাত অঞ্চলটোৰ পূৰুষ-মহিলা-যুৱককে ধৰি ডেৰ শতাধিক লোক উপস্থিত থাকে।
সভাত ৰাইজৰ পক্ষৰ পৰাও চাৰিজনে বক্তব্য ৰাখে।পুলিচ প্ৰশাসনক উপস্থিত থাকিবলৈ জনোৱা হৈছিল যদিও কোনো এজন বিষয়াই উপস্থিত নাথাকিল।
ডি ৱাই এফ আই আৰু ইলোৰা বিজ্ঞান মঞ্চৰ এই সজাগতা সভাক অঞ্চলটোৰ ৰাইজে প্ৰশংসা কৰিছে।