গুৱাহাটী বিশ্ববিদ্যালয়ৰ আন্তঃমহাবিদ্যালয় যুৱ মহোৎসৱ ২০১৯ দেওবাৰে চাৰিদিনীয় কাৰ্যসূচীৰে জালুকবাৰীৰ বিশ্ববিদ্যালয় চৌহদত আৰম্ভ হৈছে।
গুৱাহাটী বিশ্ববিদ্যালয় ক্ৰীড়া পৰিষদৰ অধীনত স্নাতকোত্তৰ ছাত্ৰ সন্থাই এই মহোৎসৱৰ আয়োজন কৰিছে।
চাৰিটা বিভিন্ন মণ্ডলত মাণ্ডলিক মহোৎসৱ অনুষ্ঠিত কৰাৰ পাছত বিশ্ববিদ্যালয়খনত কেন্দ্ৰীয়ভাৱে যুৱ মহোৎসৱৰ আয়োজন কৰা হৈছে।
এই বছৰ ৬৩খন বিভিন্ন মহাবিদ্যালয়ৰ প্ৰায় ৭০০ ছাত্ৰ-ছাত্ৰীয়ে মাণ্ডলিক পৰ্যায়ত নিৰ্বাচিত হোৱাৰ পাছত মহোৎসৱত অংশগ্ৰহণ কৰিছে।
শুভাৰম্ভণি অনুষ্ঠানত মুখ্য অতিথি হিচাপে উপস্থিত থাকি বিশ্ববিদ্যালয়খনৰ উপাচাৰ্য অধ্যাপক প্ৰতাপজ্যোতি সন্দিকৈয়ে গুৱাহাটী বিশ্ববিদ্যালয়ৰ পতাকা উত্তোলন কৰে।
উপাচাৰ্য সন্দিকৈয়ে অংশগ্ৰহণকাৰীসকলক শুভেচ্ছা জ্ঞাপন কৰাৰ লগতে কয় যে অধ্যয়নৰ লগতে সহ পাঠ্যক্ৰমৰ অনুশীলন ছাত্ৰ-ছাত্ৰীৰ সৰ্বাত্মক বিকাশৰ বাবে সমানেই গুৰুত্বপূৰ্ণ।
অনুষ্ঠানত উপস্থিত থাকি সদৌ অসম ছাত্ৰ সন্থাৰ সাধাৰণ সম্পাদক লুৰিণজ্যোতি গগৈয়ে কয় যে গুৱাহাটী বিশ্ববিদ্যালয়ৰ আন্তঃমহাবিদ্যালয় যুৱ মহোৎসৱখন এখন বিশাল মঞ্চ য’ত ছাত্ৰ-ছাত্ৰীসকলে তেওঁলোকৰ প্ৰতিভা প্ৰদৰ্শন কৰিব পাৰে।
‘’সময়ে সময়ে, বিশ্ববিদ্যালয়খনৰ ছাত্ৰ-ছাত্ৰীয়ে ৰাষ্ট্ৰীয় তথা আন্তঃৰাষ্ট্ৰীয় ক্ষেত্ৰত তেওঁলোকৰ প্ৰতিভাৰ প্ৰদৰ্শন কৰি আহিছে,’’-গগৈয়ে কয়।
আছুৰ সভাপতি দীপাংক নাথে সাংস্কৃতিক শোভাযাত্ৰাৰ উদ্বোধন কৰে।
নাথে অসমৰ বিভিন্ন সাংস্কৃতিক পৰম্পৰা প্ৰদৰ্শন কৰা বৰ্ণাঢ্য সাস্কৃতিক শোভাযাত্ৰাৰ প্ৰশংসা কৰে।
অনুষ্ঠানত উপস্থিত থাকি বিশ্ব্যবিদ্যালয়খনৰ ছাত্ৰ কল্যাণ সঞ্চালক আৰু বিশ্ববিদ্যালয় ক্ৰীড়া পৰিষদৰ সচিব ড০ ৰঞ্জন কুমাৰ কাকতিয়ে অংশগ্ৰহণকাৰী তথা দল পৰিচালকসকলক আদৰণি জনায়।
অনুষ্ঠানত বিশ্ববিদ্যালয়ৰ শ্ৰেণীসমূহৰ সচিব ড০ এইচ কে নাথ আৰু স্নাতকোত্তৰ ছাত্ৰ সন্থাৰ সভাপতি লাকিমনি বৰুৱা, সাধাৰণ সম্পাদক নয়নজ্যোতি গগৈৰ লগতে আন বহুতো বিশিষ্ট ব্যক্তি উপস্থিত থাকে।
