বঙাইগাঁও জিলা প্ৰশাসনৰ উদ্যোগত আজি স্থানীয় গান্ধী ময়দানত আন্তঃৰাষ্ট্ৰীয় যোগ দিৱস পালন কৰা হয়।
জিলা পৰিষদৰ মুখ্য কাৰ্যবাহী বিষয়া নাদিৰা জেচমিন,আৰক্ষী অধীক্ষক স্বপ্ননীল ডেকাৰ উপস্থিতিত যোগাভ্যাসৰ শুভাৰম্ভ কৰে জিলা উন্নয়ন আয়ুক্ত ভাস্কৰ দাসে।
বঙাইগাঁও পতঞ্জলি যোগ সমিতিৰ পৰিচালনাত অনুলোম-বিলোম,কপালভাত্তি,বজ্ৰাসন,ভ্ৰমৰাসন আদি বিভিন্ন ধ্যান আৰু যোগাভ্যাস কৰা হয় ৷
এই আন্তঃৰাষ্ট্ৰীয় যোগ দিৱসত বঙাইগাঁও জিলা প্ৰশাসনৰ বিষয়া-কৰ্মচাৰীয়ে অংশগ্ৰহণ কৰে।
উল্লেখ্য যে যোগবিদ্যা বা যোগাভ্যাস হ’ল এবিধ দৈহিক,মানসিক আৰু আধ্যাত্মিক দিশক সাঙুৰি লোৱা ভাৰতীয় পৰম্পৰাগত ৰীতি।যোগ সাধনাই নিজৰ লগতে নিজৰ ওচৰ-পাঁজৰো নিৰ্মল আৰু শুদ্ধ কৰে।
আমাৰ অন্তৰ-বাহিৰো শুদ্ধ হয় যোগৰ দ্বাৰা।মন স্থিৰ হয়।ৰিপু দমন হয়৷ মানুহৰ দেহৰ পৰা ঋণাত্মক দৃষ্টিভংগীসমূহ লোপ পায় আৰু যোগাত্মক দৃষ্টিভংগীৰ প্ৰৱেশ ঘটে।
যোগাভ্যাসৰ এইসমূহ দিশৰ বাবে ২১ জুনৰ দিনটোক সমগ্ৰ বিশ্বজুৰি আন্তঃৰাষ্ট্ৰীয় যোগ দিৱস হিচাপে পালন কৰিবলৈ লোৱা হৈছে।
