প্ৰায় দুটা বছৰ ধৰি ৰাজ্যৰ ৰাজনীতি আৰু জনমানসত কম্পন সৃষ্টি কৰি থকা কুখ্যাত এ পি এছ চিৰ তদন্তৰ চূড়ান্ত অভিযোগনামা আজি দাখিল কৰা হয়।
তদন্ত আৰম্ভ হোৱা ২ বছৰ ৯ মাহৰ অন্তত এই চূড়ান্ত অভিযোগনামা আদালতত দাখিল কৰে তদন্তকাৰী বিষয়া সুৰজিত সিং পানেছাৰে।
‘‘তদন্ত সম্পূৰ্ণ হ’ল। যি যি প্ৰমাণ পালো সকলো আজি দাখিল কৰিলো। সকলো অভিযুক্তৰ বিৰুদ্ধে তদন্ত হৈ গ’ল’’, আদালত চৌহদ আৰক্ষী বিষয়া পানেছাৰে সংবাদ মাধ্যমৰ আগত কয়।
পূৰ্বৰ কংগ্ৰেছ চৰকাৰৰ দিনতে সংঘটিত হোৱা বৃহত কেলেংকাৰিটোৰ তদন্ত ২০১৬ চনৰ অক্টোবৰৰ পৰা আৰম্ভ হৈছিল।
দুটা বেচ্চৰ এ পি এছ চিৰ পৰীক্ষাত উত্তীৰ্ণ প্ৰাৰ্থীক সামৰি এই তদন্ত কৰা হৈছিল। এটা বেচ্চত ২৪১গৰাকী আৰু আনটো বেচ্চত ১৮০গৰাকী প্ৰাৰ্থী আছিল।
তদন্তত ইমান সময় লগাৰ কাৰণ হিচাপে পানেছাৰে ইয়াত সামৰি ল’ব লগীয়া বিশাল নথি-পত্ৰক আঙুলিয়াই দিয়ে।
“ডকুমেণ্ট বহুত আছিল। ফৰেনছিক পৰীক্ষাৰ বাবে আহমেদাবাদ, হায়দৰাবাদলৈ প্ৰেৰণ কৰিব লগীয়া হৈছিল”, বিষয়াজনে কয়।
প্ৰক্ৰিয়াটোত মুঠ এঘাৰখন অভিযোগনামা দাখিল কৰা হ’ল। এইবোৰৰ ওপৰত এতিয়া আদালতে বিচাৰ প্ৰক্ৰিয়াটো আগ বঢ়াই নিব বুলি আৰক্ষী বিষয়াজনে আশা ব্যক্ত কৰে।
উল্লেখযোগ্য যে এতিয়াও গোচৰটোৰ ৪জন অভিযুক্ত পলাতক হৈ আছে, তেওঁলোক হ’ল ৰাজীৱ পাল, সুদীপ দাস, মফিদুল ইচলাম আৰু ড০ মৃগেন শইকীয়া।