এগৰাকী আৰক্ষী অধীক্ষকৰ নিৰ্লজ্জকাণ্ডই পুনৰ অসম আৰক্ষীক লজ্জানত কৰিলে। সহকৰ্মী আৰক্ষী বিষয়াৰ এগৰাকী ১৩ বছৰীয়া কিশোৰীক যৌন নিৰ্যাতন চলোৱাৰ অভিযোগ উত্থাপন হৈছে কাৰ্বি আংলঙৰ আৰক্ষী অধীক্ষক গৌৰৱ উপাধ্যায়ৰ বিৰুদ্ধে।
কাৰ্বি আংলং জিলাৰ ডিফুত ৩১ ডিচেম্বৰৰ নিশাই এই ঘটনা সংঘটিত হয় যদিও আৰক্ষীয়ে ঘটনাটো গাপ দি ৰাখিবলৈ চেষ্টা কৰাৰ বাবে এই কথা শেহতীয়াকৈ পোহৰলৈ আহিছে।
ঘটনা অনুসৰি ৩১ ডিচেম্বৰৰ নিশা আৰক্ষী অধীক্ষক গৌৰৱে ডিফুত ৩১ ডিচেম্বৰৰ নিশা এক অনুষ্ঠানৰ আয়োজন কৰিছিল। আৰু তালৈ নিমন্ত্ৰণ জনাইছিল পূৰ্বৰ আৰু বৰ্তমানৰ বহুকেইগৰাকী সহকৰ্মীক। নিমন্ত্ৰণ অনুসৰি গুৱাহাটীৰ এগৰাকী আৰক্ষী বিষয়া নিজৰ কন্যা সন্তানসহ গৌৰৱৰ অনুষ্ঠানলৈ গৈছিল।
অভিযোগ অনুসৰি অনুষ্ঠানটোতে নিশা আৰক্ষী অধীক্ষক গৌৰৱে সহকৰ্মী গৰাকীৰ কন্যা সন্তান তথা ১৩ বছৰীয়া কিশোৰীগৰাকীক যৌন নিৰ্যাতন চলায়।
“৩১ ডিচেম্বৰৰ নিশাৰ ঘটনাৰ সন্দৰ্ভত আমি ৩ জানুৱাৰিত ভাৰতীয় দণ্ডবিধিৰ অধীনত ধাৰা ৩৫৪ আৰু পছক’ আইনৰ অধীনত ১০ ধাৰাত এটা গোচৰ ৰুজু কৰিছো।” সদৌ মহিলা আৰক্ষীৰ সহকাৰী আৰক্ষী আয়ুক্ত অৰুণিমা ভূঞাই কয়।
উল্লেখযোগ্য যে পূৰ্বতেও বহু বিতৰ্কত সাঙোৰ খাই পৰা গৌৰৱ উপাধ্যায়ৰ বিৰুদ্ধে এইবাৰ ৰাজ্য চৰকাৰে কি ব্যৱস্থা গ্ৰহণ কৰে সেয়া লক্ষণীয় হ’ব।
