ইৰাণৰ সৰ্বোচ্চ নেতা আয়াতুল্লাহ আলী খামেনেই নিহত হৈছে। তেহৰানেও নিশ্চিত কৰিছে যে আমেৰিকা আৰু ইজৰাইলৰ যৌথ আক্ৰমণত তেওঁ নিহত হৈছে। ইৰাণৰ চৰকাৰী সংবাদ মাধ্যমে প্ৰকাশ কৰা অনুসৰি সমগ্ৰ দেশতে ৪০ দিনৰ ৰাষ্ট্ৰীয় শোক ঘোষণা কৰা হৈছে।
ইয়াৰ পূৰ্বে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে খামেনেইৰ মৃত্যুৰ কথা ঘোষণা কৰিছিল। তাৰপিছত আমেৰিকাৰ ৰাষ্ট্ৰপতি ড’নাল্ড ট্ৰাম্পেও ছ’চিয়েল মিডিয়াত একেই ঘোষণা কৰে। কিন্তু ইৰাণে এই খবৰ বাৰে বাৰে অস্বীকাৰ কৰি আহিছিল। তেওঁলোকৰ নেতা অক্ষত আৰু নিৰাপদ বুলি দাবী কৰিছিল।
দেওবাৰে পুৱা ইৰাণৰ চৰকাৰী সংবাদ মাধ্যমেও খামেনেইৰ মৃত্যুৰ কথা নিশ্চিত কৰে। যৌথ বাহিনীৰ আক্ৰমণক তেহৰানে ‘কাপুৰুষোচিত’ বুলি অভিহিত কৰে।
ইৰাণৰ সশস্ত্ৰ বাহিনী ৰিভল্যুচনেৰী গাৰ্ডেও খামেনেইৰ মৃত্যুত শোক প্ৰকাশ কৰে। তেওঁলোকে লিখিছে, “আমি এজন মহান নেতাক হেৰুৱাইছো। তেওঁ আছিল অনন্য।”
শনিবাৰে পুৱা ইৰাণৰ বিৰুদ্ধে ইজৰাইলে আক্ৰমণ আৰম্ভ কৰে। নেতানিয়াহুৱে দাবী কৰে যে এই আক্ৰমণত খামেনেই আৰু ইৰাণৰ ৰাষ্ট্ৰপতি মাছুদ পেছমেৰ্গাক লক্ষ্য কৰি লোৱা হৈছিল।
সেই আক্ৰমণত আমেৰিকাইও ইজৰাইলক সমৰ্থন কৰিছিল। ইজৰাইল আৰু আমেৰিকা বাহিনীৰ যৌথ আক্ৰমণত ড্ৰোন আৰু ক্ষেপণাস্ত্ৰই তেহৰাণকে ধৰি ইৰাণৰ ডাঙৰ ডাঙৰ চহৰত আঘাত হানে।
ইয়াৰ পিছত শনিবাৰে নিশা নেতানিয়াহুৱে খামেনেইৰ মৃত্যু হোৱা বুলি দাবী কৰে। তেওঁৰ বাহিনীয়ে তাৰ প্ৰমাণ পাইছে। কেৱল সেয়াই নহয়, খামেনেইৰ সমগ্ৰ অঞ্চলটো উৰুৱাই দিয়া বুলিও দাবী কৰে।
কেইঘণ্টামানৰ আগতে ট্ৰাম্পে ছ’চিয়েল মিডিয়াত লিখিছিল, “খামেনেই ইতিহাসৰ অন্যতম কুখ্যাত ব্যক্তি। তেওঁৰ বাহিনীয়ে অক্ষম বা হত্যা কৰাসকলৰ ন্যায় প্ৰদান কৰা হৈছে।” ইৰাণৰ বাসিন্দাসকলক এখন নতুন দেশ গঢ়াৰ বাৰ্তা দিলে ট্ৰাম্পে। তেওঁ বাহিৰত থকাসকলক সুৰক্ষিতভাৱে ঘৰলৈ উভতি যাবলৈ কয়।
একে সময়তে খামেনেই ইৰাণী সেনাক বিৰোধী প্ৰতিবাদকাৰীৰ সৈতে একেলগে কাম কৰিবলৈ আহ্বান জনায়। অৱশ্যে বৰ্তমান ইৰাণত শান্তি ঘূৰি অহা নাই। ট্ৰাম্পে কয় যে শান্তি প্ৰতিষ্ঠাৰ স্বাৰ্থত ইৰাণৰ ওপৰত অন্ততঃ আৰু এসপ্তাহ ধৰি বোমা আক্ৰমণ চলি থাকিব!
আমেৰিকা আৰু ইজৰাইলৰ আক্ৰমণৰ প্ৰতি সঁহাৰি জনাই শনিবাৰে ইৰানে প্ৰত্যাক্ৰমণ আৰম্ভ কৰে। কেৱল ইজৰাইলেই নহয়, পশ্চিম এছিয়াৰ আমেৰিকাৰ সামৰিক ঘাটি থকা দেশবোৰকো আক্ৰমণ কৰা হয়। তেহৰানে সংযুক্ত আৰব আমিৰশ্বাহীৰ ডুবাই আৰু আবুধাবিত বোমাবৰ্ষণ কৰে। বিশ্বৰ আটাইতকৈ ওখ অট্টালিকা বুৰ্জ খলিফা খালী কৰিব লগা হৈছিল।
খবৰ অনুসৰি কাটাৰৰ ডোহা আৰু চৌদি আৰৱৰ ৰিয়াদতো ইৰাণে আক্ৰমণ কৰিছে। সমগ্ৰ পশ্চিম এছিয়াত এতিয়াও যুদ্ধৰ পৰিৱেশ বিৰাজ কৰিছে। ইতিমধ্যে ইৰানে নিজৰ আকাশমাৰ্গ বন্ধ কৰি দিছে। পশ্চিম এছিয়াৰ এক বৃহৎ অঞ্চলত বিমান পৰিবহণ স্থগিত ৰখা হৈছে। ছাইৰেন বাজি আছে।
ট্ৰাম্পে অৱশ্যে দাবী কৰে যে ইৰাণে বুজাবুজি আৰু যুদ্ধবিৰতি বিচাৰিছে। খামেনেইৰ মৃত্যুৰ পিছত তেওঁলোকৰ আক্ৰমণ আৰু বৃদ্ধি পায় নেকি সেয়া নিৰীক্ষণ কৰি থকা হৈছে।
