পশ্চিম এছিয়াত চলি থকা ভয়াবহ যুদ্ধৰ মাজতে ইৰানৰ ৰাষ্ট্ৰীয় সুৰক্ষা পৰিষদৰ সচিব আলী লাৰিজানিৰ নিধনক লৈ তীব্ৰ প্ৰতিক্ৰিয়া প্ৰকাশ কৰিছে দেশখনৰ নতুন সৰ্বোচ্চ নেতা মোজতবা খামেনেইয়ে। ইজৰাইলী সেনাৰ এক ভয়ংকৰ বিমান আক্ৰমণত লাৰিজানি নিহত হোৱাৰ পিছতে খামেনেইয়ে ইজৰাইল আৰু আমেৰিকা যুক্তৰাষ্ট্ৰক ইয়াৰ কঠোৰ প্ৰতিশোধ ল‘ব বুলি হুংকাৰ প্ৰদান কৰিছে। একে সময়তে ইৰানৰ ৰাষ্ট্ৰপতি মাছুদ পেজেস্কিয়ানে দেশখনৰ শক্তি আন্তঃগাঁথনিত, বিশেষকৈ ‘চাউথ পাৰ্ছ’ গেছ ক্ষেত্ৰত হোৱা আমেৰিকা আৰু ইজৰাইলৰ যুটীয়া আক্ৰমণক তীব্ৰ গৰিহণা দি ইয়াৰ ফলত সমগ্ৰ বিশ্বতে ভয়ানক আৰু অনিয়ন্ত্ৰিত পৰিণাম হ’ব পাৰে বুলি সকীয়াই দিছে।
চলিত বৰ্ষৰ ফেব্ৰুৱাৰী মাহৰ শেষৰ ফালে ইৰানৰ পূৰ্বৰ সৰ্বোচ্চ নেতা আয়াতোল্লাহ আলী খামেনেই ইজৰাইলৰ আক্ৰমণত নিহত হোৱাৰ পিছৰে পৰা মধ্যপ্ৰাচ্যৰ পৰিস্থিতিৰ ক্ৰমান্বয়ে অৱনতি ঘটিছে। এই যুদ্ধৰ মাজতে শেহতীয়াকৈ ইৰানৰ ৰাজধানী তেহৰাণৰ সমীপত ইজৰাইলৰ এক বিমান আক্ৰমণত দেশখনৰ অন্যতম প্ৰভাৱশালী নেতা আলী লাৰিজানি, তেওঁৰ পুত্ৰ আৰু কেইবাজনো নিৰাপত্তাৰক্ষী নিহত হয়। এই ঘটনাৰ প্ৰতিক্ৰিয়া প্ৰকাশ কৰি ইৰানৰ নতুন সৰ্বোচ্চ নেতা মোজতবা খামেনেইয়ে এক কঠোৰ বিবৃতিত কয় যে প্ৰতিটোপাল তেজৰ মূল্য শত্ৰুৱে পৰিশোধ কৰিব লাগিব আৰু অপৰাধীসকলে অতি সোনকালেই ইয়াৰ উচিত শাস্তি পাব।
সামৰিক ঘাটি আৰু নেতাসকলৰ উপৰিও ইৰানৰ গুৰুত্বপূৰ্ণ শক্তি খণ্ডসমূহো এতিয়া ইজৰাইল আৰু আমেৰিকাৰ আক্ৰমণৰ লক্ষ্য হৈ পৰিছে। ইৰানৰ দক্ষিণাঞ্চলত অৱস্থিত দেশখনৰ অন্যতম বৃহৎ গেছ প্ৰকল্প ‘চাউথ পাৰ্ছ’ত হোৱা বিমান আক্ৰমণৰ পাছতে ৰাষ্ট্ৰপতি মাছুদ পেজেস্কিয়ানে সামাজিক মাধ্যমৰ জৰিয়তে তীব্ৰ ক্ষোভ প্ৰকাশ কৰে। ৰাষ্ট্ৰপতিগৰাকীয়ে এই আক্ৰমণক শত্ৰুৰ কাপুৰুষালি আখ্যা দি কয় যে এনে আক্ৰমণাত্মক কাৰ্যই পৰিস্থিতি অধিক জটিল কৰি তুলিব। তেওঁ লগতে কয় যে এই সংঘাতৰ পৰিসৰে সমগ্ৰ বিশ্বকে আৱৰি ধৰাৰ সম্ভাৱনা প্ৰৱল হৈ পৰিছে আৰু ইয়াৰ পৰিণাম কোনেও নিয়ন্ত্ৰণ কৰিব নোৱাৰিব।
এই আক্ৰমণৰ প্ৰত্যুত্তৰস্বৰূপে ইৰানেও ইজৰাইলৰ লগতে উপসাগৰীয় অঞ্চলত থকা আমেৰিকাৰ বিভিন্ন ঘাটি আৰু মিত্ৰ দেশসমূহৰ শক্তি আন্তঃগাঁথনিত ক্ষেপণাস্ত্ৰ আৰু ড্ৰোণ আক্ৰমণ তীব্ৰতৰ কৰি তুলিছে। ইয়াৰ পৰিপ্ৰেক্ষিতত আমেৰিকাৰ ৰাষ্ট্ৰপতি ড‘নাল্ড ট্ৰাম্পে ইৰানক সকীয়াই দিছে যে যদিহে কাটাৰৰ দৰে আমেৰিকাৰ মিত্ৰ ৰাষ্ট্ৰৰ শক্তি প্ৰকল্পত আক্ৰমণ অব্যাহত থাকে, তেন্তে আমেৰিকাই ইৰানৰ গেছ ক্ষেত্ৰসমূহৰ ওপৰত অধিক ভয়াবহ আক্ৰমণ চলাব। ইৰান আৰু ইজৰাইলৰ মাজত হোৱা এই পাৰস্পৰিক প্ৰত্যাক্ৰমণৰ ফলত সমগ্ৰ উপসাগৰীয় অঞ্চলৰ নিৰাপত্তাৰ লগতে বিশ্বৰ তেল আৰু গেছৰ বজাৰখনলৈও এক বৃহৎ সংকট নামি আহিছে।
