মাৰ্কিন বিমান আক্ৰমণত ইৰানৰ শীৰ্ষ সেনা বিষয়াৰ মৃত্যুৰ পাছত মধ্য প্ৰাচ্যত যুদ্ধৰ ডাৱৰ নামিছে। এই মৃত্যুৰ আঁত ধৰি এইবাৰ আমেৰিকাক ধমক দিছে ইৰানৰ প্ৰধান নেতা আয়াতুল্লা আলি খামেইনিয়ে।
শুকুৰবাৰে ৰাতিপুৱাই বাগদাদ বিমানবন্দৰত মাৰ্কিন বিমান আক্ৰমণত ইৰানৰ কাডছ ফোৰ্ছৰ কমাণ্ডাৰ জেনেৰেল কাছেম চোলেমানিকে ধৰি ৮জন নিহত হয়।
এই ঘটনাৰ পাছতে আমেৰিকাৰ বিৰুদ্ধে টুইটত চৰম সাৱধানবাণী শুনাইছে ইৰানৰ নেতা খামেইনিয়ে।
তেওঁ লিখিছে: ‘’তেওঁলোকৰ নিৰৱিছিন্ন চেষ্টাৰ ফলত চোলেমানি চহিদ হ’ল। তেওঁলোকে দেখুওৱা পথেৰে জেহাদ চলিব আৰু এই ধৰ্মযুদ্ধত আমিয়েই জয়ী হ’ম। যিয়ে চোলেমানিৰ তেজেৰে হাত ৰাঙলী কৰিছে তেওঁলোকৰ বিৰুদ্ধে চৰম প্ৰতিশোধ লোৱা হ’ব।‘’
ইপিনে, ইৰানৰ বিদেশ মন্ত্ৰী জাভেদ জাৰিফেও স্পষ্ট কৰি দিছে যে এই আক্ৰমণৰ পাছত সৃষ্টি হ’ব পৰা পৰিস্থিতিৰ বাবে আমেৰিকাই দায়ী হ’ব।
ইৰানৰ দাবীক পাত্তা দিব খোজা নাই আমেৰিকাই। চোলেমানিৰ মৃত্যুত ইৰাকৰ নাগৰিকে আনন্দ প্ৰকাশ কৰা ছবি সংলগ্ন কৰি টুইট কৰিছে আমেৰিকাৰ ছেক্ৰেটাৰী অফ ষ্টেট মাইক পম্পে।
যোৱা কেইমাহমান ধৰি আমেৰিকা আৰু ইৰানৰ মাজত চলি থকা উত্তেজনাময় পৰিস্থিতিৰ হঠাতে চৰম অৱনতি ঘটিছে।
যোৱা দেওবাৰে বাগদাদৰ মাৰ্কিন দূতাবাসত ইৰানৰ বিদ্ৰোহীয়ে আক্ৰমণ চলাইছিল। ইয়াৰ পাছতে শুকুৰবাৰে পুৱা হঠাতে আমেৰিকাই বাগদাদ বিমানবন্দৰত তিনিটা ৰকেটেৰে আক্ৰমণ চলায়।
উক্ত আক্ৰমণত ইৰানৰ এলিট গাৰ্ড ফোৰ্ছৰ শীৰ্ষ কমাণ্ডাৰ কাছেম চোলেমানি, পি এমএফ-ৰ ডেপুটি কমাণ্ডাৰ আবু মেহদি আল মুহানদিছ তথা বিমানবন্দৰৰ প্ৰট’কল বিষয়া মহম্মদ ৰেদাকে ধৰি আঠজন লোক নিহত হয়।
আমেৰিকাৰ এই আক্ৰমণৰ প্ৰতিশোধ লোৱাৰ বাবে ইৰানত কুচকাৱাজ চলিছে। ইপিনে, আমেৰিকাইয়ো অধিক আক্ৰমণাত্মক ৰূপ লোৱাৰ বাবে ইৰানৰ প্ৰতিক্ৰিয়ালৈ অপেক্ষা কৰিছে।
অচিৰেই হয়তো মধ্য প্ৰাচ্যত আন এখন যুদ্ধৰ আতংকই শান্তি বিঘ্নিত কৰিবলৈ ৰৈ আছে।