পশ্চিম এছিয়াত চলি থকা যুদ্ধৰ মাজতে বিস্ফোৰক দাবী ইৰাণৰ। দাবী কৰা হৈছে যে আমেৰিকাত আন এক ৯/১১ৰ দৰে আক্ৰমণ সংঘটিত হ’ব পাৰে। এপষ্টেইন চক্ৰৰ ষড়যন্ত্ৰত এই আক্ৰমণ চলাই ইয়াৰ বাবে ইৰাণক দোষাৰোপ কৰা হ’ব পাৰে। ইৰাণৰ ৰাষ্ট্ৰীয় নিৰাপত্তা পৰিষদৰ মুৰব্বী আলী লাৰিজানীয়ে এই কথা সদৰী কৰিছে। এই তথ্য পোহৰলৈ অহাৰ পিছতে বিশ্বৰ ৰাজনীতিত চাঞ্চল্যৰ সৃষ্টি হয়।
প্ৰয়াত সৰ্বোচ্চ নেতাৰ উপদেষ্টা তথা নিৰাপত্তা পৰিষদৰ মুৰব্বী লাৰিজানীয়ে দেওবাৰে ছ’চিয়েল মিডিয়াত এই ষড়যন্ত্ৰৰ বিষয়টো সদৰী কৰে। তেওঁ লিখিছে, ‘মই শুনিছো যে এপষ্টেইন নেটৱৰ্কৰ জীৱিত সদস্যসকলে ৯/১১ৰ দৰে আক্ৰমণৰ পৰিকল্পনা কৰিছে। এই ষড়যন্ত্ৰৰ মূল উদ্দেশ্য হৈছে আক্ৰমণৰ দায়িত্ব ইৰাণৰ ওপৰত জাপি দিয়া। অৱশ্যে এনে সন্ত্ৰাসবাদী আক্ৰমণৰ তীব্ৰ বিৰোধী ইৰাণ। আৰু আমেৰিকাৰ জনসাধাৰণৰ সৈতে যুদ্ধ নহয়।’
উল্লেখ্য যে ২৮ ফেব্ৰুৱাৰীৰ পৰা আৰম্ভ হোৱা ইৰাণ যুদ্ধত এতিয়ালৈকে হাজাৰৰো অধিক লোকৰ মৃত্যু হৈছে। শনিবাৰে পুৱাই আমেৰিকাই খাৰ্গ দ্বীপত আক্ৰমণ চলায়। আমেৰিকাৰ ৰাষ্ট্ৰপতিয়ে দাবী কৰিছে যে এইটো ‘মধ্যপ্ৰাচ্যৰ ইতিহাসৰ অন্যতম ভয়ংকৰ বোমা আক্ৰমণ’। আমেৰিকাৰ আক্ৰমণত দ্বীপটো সম্পূৰ্ণৰূপে ধ্বংস হোৱা বুলিও তেওঁ দাবী কৰে।
দেওবাৰে আমেৰিকাৰ সংবাদ মাধ্যমক দিয়া এক সাক্ষাৎকাৰত ট্ৰাম্পে কয়, “আমি আকৌ ধেমালি কৰি খাৰ্গ দ্বীপত আক্ৰমণ কৰিব পাৰো।” আনহাতে, যুদ্ধত প্ৰতিশোধ লোৱাৰ উপৰিও ইৰাণৰ কৌশল হৈছে বিশ্বৰ তেলৰ ধমনী হৰমুজ বন্ধ কৰি আমেৰিকাৰ ওপৰত হেঁচা প্ৰয়োগ কৰা।
এই গুৰুতৰ পৰিস্থিতিৰ মাজতে লাৰিজানীয়ে ইৰাণক ধ্বংস কৰাৰ অজুহাত বিচাৰি আমেৰিকাৰ ভয়ংকৰ ষড়যন্ত্ৰৰ ইংগিত দিয়ে। প্ৰসংগক্ৰমে ইৰাণৰ বিৰুদ্ধে যুদ্ধ আৰম্ভ হোৱাৰ পিছৰে পৰা লাৰিজানীয়ে আমেৰিকা আৰু ৰাষ্ট্ৰপতি ট্ৰাম্পক অহৰহ আক্ৰমণ কৰি আহিছে। তেওঁ ট্ৰাম্পক এপষ্টেইনৰ ঘনিষ্ঠ বন্ধু বুলি অভিযোগ কৰে। তেওঁ কয় যে ইৰাণৰ নেতাসকলে দেশৰ জনসাধাৰণৰ সৈতে তেওঁলোকৰ হৃদয়ত বাস কৰে, আনহাতে আমেৰিকাৰ নেতাসকলে এপষ্টেইন দ্বীপত থাকে।
