আলী খামেনেইৰ শেষকৃত্যলৈ ভাৰতৰ প্ৰধানমন্ত্ৰী নৰেন্দ্ৰ মোদীক আমন্ত্ৰণ জনালে ইৰানৰ ৰাষ্ট্ৰপতিয়ে

ইৰানৰ ৰাষ্ট্ৰপতি মাছুদ পেজেছকিয়ানে ভাৰতৰ প্ৰধানমন্ত্ৰী নৰেন্দ্ৰ মোদীক ইৰানৰ প্ৰাক্তন সৰ্বোচ্চ নেতা আয়াতুল্লাহ আলী খামেনেইৰ শেষকৃত্য অনুষ্ঠানত উপস্থিত থাকিবলৈ আমন্ত্ৰণ জনাইছে। সূত্ৰৰ পৰা জানিব পৰা মতে, এই বিশেষ অনুষ্ঠানৰ বাবে ভাৰতৰ প্ৰধানমন্ত্ৰীগৰাকীলৈ এই নিমন্ত্ৰণ প্ৰেৰণ কৰা হৈছে।

খামেনেইৰ শেষকৃত্যৰ আনুষ্ঠানিকতা অহা ৪ জুলাইৰ পৰা আৰম্ভ হ’ব আৰু ৯ জুলাইত তেওঁৰ জন্মস্থান মাশ্বাদ চহৰত তেওঁক সমাধিস্থ কৰা হ’ব। ৮৬ বছৰ বয়সীয়া এইগৰাকী নেতাক যোৱা ২৮ ফেব্ৰুৱাৰীত ইজৰাইল আৰু আমেৰিকা যুক্তৰাষ্ট্ৰই তেহৰাণত চলোৱা প্ৰথম দিনৰ বিমান আক্ৰমণত হত্যা কৰিছিল। তেওঁ সুদীৰ্ঘ ৩৬ বছৰ ধৰি দেশখনৰ সৰ্বোচ্চ নেতা হিচাপে কাৰ্যনিৰ্বাহ কৰিছিল।

ৰাষ্ট্ৰীয় সংবাদ মাধ্যমৰ খবৰ অনুসৰি, অহা ৭ জুলাইত তেহৰাণৰ দক্ষিণত অৱস্থিত আন এখন পবিত্ৰ চহৰ কোমত প্ৰাক্তন সৰ্বোচ্চ নেতাগৰাকীৰ প্ৰতি শ্ৰদ্ধাঞ্জলি জনাবলৈ আন এক অনুষ্ঠান অনুষ্ঠিত হ’ব। ইছলামিক ধৰ্মীয় নিয়ম অনুসৰি মৃত্যুৰ পাছত যিমান সোনকালে সম্ভৱ, বিশেষকৈ এদিনৰ ভিতৰতে মৃতদেহ সমাধিস্থ কৰিব লাগে। কিন্তু যুদ্ধৰ সময়ত এই নিয়মৰ ব্যতিক্ৰম কৰাৰ অনুমতি দিয়া হয়। যোৱা ফেব্ৰুৱাৰী মাহত তেওঁৰ মৃত্যুৰ পিছৰে পৰা শেষকৃত্যৰ তাৰিখক লৈ বিভিন্ন জল্পনা-কল্পনা চলি আছিল। প্ৰথমতে এই অনুষ্ঠান জুন মাহৰ শেষৰ ফালে হ’ব বুলি খবৰ ওলাইছিল যদিও পিছলৈ ৰাষ্ট্ৰীয় সংবাদ মাধ্যমে জুলাই মাহত এই অনুষ্ঠান হ’ব বুলি নিশ্চিত কৰে।

তেহৰাণ, মাশ্বাদ আৰু কোমত অনুষ্ঠিত হ’বলগীয়া এই শেষকৃত্য অনুষ্ঠানত প্ৰায় ২ কোটি শোকাকুল লোকে অংশগ্ৰহণ কৰিব বুলি আশা কৰা হৈছে। পাকিস্তানৰ প্ৰধানমন্ত্ৰী শ্বেহবাজ শ্বৰীফকে ধৰি দেশখনৰ কেইবাগৰাকীও শীৰ্ষ বিষয়াই এই অনুষ্ঠানত অংশগ্ৰহণ কৰিব। যদিহে সঁচাকৈয়ে ইমান বৃহৎ সংখ্যক লোকে অংশগ্ৰহণ কৰে, তেন্তে ই ১৯৮৯ চনত ইৰানৰ প্ৰতিষ্ঠাপক আয়াতুল্লাহ ৰুহুল্লাহ খোমেইনীৰ শেষকৃত্যত গোট খোৱা ১ কোটি লোকৰ অভিলেখ ভংগ কৰিব।

খামেনেইৰ ৫৬ বছৰ বয়সীয়া পুত্ৰ মোজতাবা হোছেইনী খামেনেইয়ে যোৱা ৮ মাৰ্চৰ পৰা ইৰানৰ নতুন সৰ্বোচ্চ নেতা হিচাপে কাৰ্যনিৰ্বাহ কৰি আছে। পিছে তেওঁৰ স্বাস্থ্য আৰু বৰ্তমানৰ অৱস্থানক লৈ বিভিন্ন প্ৰশ্ন উত্থাপন হৈ আহিছে। মাৰ্কো ৰুবিঅ’ আৰু পিট হেগছেথকে ধৰি আমেৰিকা যুক্তৰাষ্ট্ৰৰ কেইবাগৰাকীও জ্যেষ্ঠ বিষয়াই দাবী কৰিছে যে তেওঁ বৰ্তমান গভীৰ সংজ্ঞাহীন অৱস্থাত আছে।

উল্লেখ্য যে, মাহৰ পিছত মাহ ধৰি চলা সংঘাতৰ অন্তত ইৰান আৰু আমেৰিকা যুক্তৰাষ্ট্ৰ এখন শান্তি চুক্তিত উপনীত হৈছে। এই সংঘাতে পশ্চিম এছিয়াক এক তীব্ৰ সংকটৰ মাজলৈ ঠেলি দিয়াৰ লগতে সমগ্ৰ বিশ্বতে ইন্ধন আৰু শক্তিৰ নাটনিৰ সৃষ্টি কৰিছিল। ইৰানৰ ৰাষ্ট্ৰপতি পেজেছকিয়ান আৰু আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পে পৃথকে পৃথকে ডিজিটেল মাধ্যমৰে বুজাবুজিৰ পত্ৰত স্বাক্ষৰ কৰিছে আৰু বৰ্তমান ছুইজাৰলেণ্ডত দুয়োপক্ষৰ মাজত দীৰ্ঘম্যাদী শান্তি আলোচনা চলি আছে।