ইৰাণ আৰু আমেৰিকাৰ মাজত থকা পুৰণি সংঘাত এতিয়া এক নতুন পৰ্যায়ত উপনীত হৈছে। শেহতীয়াকৈ ইৰাণৰ এটা চৰকাৰী সংবাদ মাধ্যমে আমেৰিকাৰ ৰাষ্ট্ৰপতি ড’নাল্ড ট্ৰাম্পক মুকলিকৈ হত্যাৰ ভাবুকি দিয়াৰ গুৰুতৰ অভিযোগ উত্থাপন হৈছে। ২০২৪ চনত পেনচিলভেনিয়াৰ বাটলাৰত অনুষ্ঠিত এখন নিৰ্বাচনী সমাৱেশত ট্ৰাম্পৰ ওপৰত হোৱা সেই ভয়াৱহ আক্ৰমণৰ স্মৃতি সজীৱ কৰি তুলি ইৰাণৰ সংবাদ মাধ্যমে এক বিতৰ্কিত ছবি প্ৰকাশ কৰিছে। সেইবাৰ এজন বন্দুকধাৰীৰ গুলীয়ে ট্ৰাম্পৰ কাণ স্পৰ্শ কৰি গৈছিল আৰু তেওঁ কথমপি প্ৰাণৰক্ষা পৰিছিল। কিন্তু এইবাৰ ইৰাণৰ সংবাদ মাধ্যমে সেই ৰক্তাক্ত ছবিখন ব্যৱহাৰ কৰি লিখিছে যে এইবাৰ গুলীটোৱে লক্ষ্য হেৰুৱাব নোৱাৰে।
ইজৰাইলী-আমেৰিকান সাংবাদিক এমিলি শ্ৰেডাৰে ছ’চিয়েল মিডিয়াত এই সন্দৰ্ভত এক তথ্য শ্বেয়াৰ কৰিছে। তেওঁ প্ৰকাশ কৰা অনুসৰি ইৰাণৰ এটা টিভি চেনেলত ট্ৰাম্পৰ ৰক্তাক্ত মুখমণ্ডলৰ ফটো প্ৰদৰ্শন কৰা হৈছে আৰু তাৰ তলত পাৰ্চী ভাষাত লিখা আছে যে এইবাৰ গুলী লক্ষ্যভ্ৰষ্ট নহ’ব। এই ঘটনাই সমগ্ৰ বিশ্বৰ কূটনৈতিক মহলত তীব্ৰ চাঞ্চল্যৰ সৃষ্টি কৰিছে। বিশেষজ্ঞসকলৰ মতে ইৰাণে তেওঁলোকৰ চৰকাৰী সংবাদ মাধ্যমৰ জৰিয়তে আমেৰিকাৰ ৰাষ্ট্ৰপতিগৰাকীলৈ এক পৰোক্ষ কিন্তু অতি ভয়ংকৰ সতৰ্কবাণী প্ৰেৰণ কৰিছে। ইয়াৰ ফলত দুই দেশৰ মাজৰ সম্পৰ্ক অধিক তিক্ত হোৱাৰ সম্ভাৱনা বৃদ্ধি পাইছে।
বৰ্তমান সময়ত ইৰাণৰ অভ্যন্তৰীণ পৰিস্থিতিও অতিশয় অস্থিৰ হৈ পৰিছে। দেশখনৰ সাধাৰণ জনতা আকাশলংঘী মূল্যবৃদ্ধি, শিক্ষা আৰু স্বাস্থ্য খণ্ডৰ দুৰৱস্থাৰ লগতে কঠোৰ ধৰ্মীয় শাসনৰ বিৰুদ্ধে ৰাজপথলৈ ওলাই আহিছে। আনকি দেশখনৰ সৰ্বোচ্চ ধৰ্মগুৰু খামেনেইৰ বিৰুদ্ধেও তীব্ৰ বিদ্ৰোহ আৰম্ভ হৈছে। অভিযোগ উঠিছে যে এই জনসাধাৰণৰ প্ৰতিবাদ দমন কৰিবলৈ ইৰাণ চৰকাৰে নিৰাপত্তা বাহিনীৰ জৰিয়তে হিংসাত্মক পথ অৱলম্বন কৰিছে। আমেৰিকাৰ ৰাষ্ট্ৰপতিগৰাকীয়ে ইৰাণৰ এই দমনমূলক নীতিক তীব্ৰ সমালোচনা কৰিছে আৰু প্ৰয়োজন সাপেক্ষে সামৰিক অভিযানৰ হুংকাৰ দিছে। এনে এক উত্তেজনাপূৰ্ণ পৰিৱেশৰ মাজতে ইৰাণৰ সংবাদ মাধ্যমে ট্ৰাম্পক হত্যাৰ ভাবুকি দিয়াটোৱে পৰিস্থিতি অধিক জটিল কৰি তুলিছে। অৱশ্যে এই বিষয়ত এতিয়ালৈকে আমেৰিকা বা ইৰাণ চৰকাৰে কোনো আনুষ্ঠানিক মন্তব্য কৰা নাই।
