হৰমনৰ তাৰতম্যৰ বাবে আজিকালি মহিলাসকলে বিভিন্ন ধৰণৰ শাৰীৰিক আৰু মানসিক সমস্যাৰ সন্মুখীন হবলগীয়া হয়। ইয়াৰ ফলত সঘনাই মুড সলনি হোৱা, ভোক নলগা, টোপনি ক্ষতি হোৱা আদি সমস্যাই দেখা দিয়ে। বহু সময়ত চালত দাগ পৰা, চুলি সৰা কিন্তু শৰীৰৰ অন্যান্য অংশত অবাঞ্ছিত নোম গজাৰ দৰে লক্ষণো প্ৰকাশ পায়। আটাইতকৈ চিন্তনীয় কথাটো হ’ল হৰমনৰ খেলিমেলিৰ বাবে সন্তান ধাৰণৰ ক্ষেত্ৰতো ডাঙৰ জটিলতা আহিব পাৰে। এই সকলোবোৰ কাৰণতে বহু মহিলাই মানসিকভাৱে হীনমন্যতাত ভোগে আৰু সমাজত সহজভাৱে মিলামিছা কৰাত বাধা অনুভৱ কৰে। কিন্তু এই সকলোবোৰ সমস্যাৰ বাবে সদায় চিকিৎসকৰ ওচৰলৈ যোৱাটোৱেই একমাত্ৰ উপায় নহয়। যদি আমি আমাৰ দৈনন্দিন খাদ্য গ্ৰহণৰ অভ্যাস অলপ সলনি কৰিব পাৰো, তেন্তে হৰমনৰ ক্ষৰণ বহুখিনি নিয়ন্ত্ৰণ কৰিব পৰা যায়। আহক জানো আমাৰ খাদ্য তালিকাত কোনবোৰ খাদ্য অন্তৰ্ভুক্ত কৰি এই হৰমনৰ সমতা ঘূৰাই আনিব পাৰি।
প্ৰথমতে তিল বা তিসি গুটিৰ কথা ক’ব পাৰি যিয়ে মহিলাৰ শৰীৰত ইষ্ট্ৰোজেন হৰমনৰ ক্ষৰণ বৃদ্ধি কৰাত সহায় কৰে। ইয়াত প্ৰচুৰ পৰিমাণে ওমেগা থ্ৰী ফেটি এচিড আৰু ফাইবাৰ থাকে বাবে ই আমাৰ হজম প্ৰক্ৰিয়াতো সহায় কৰে। ব্যৱহাৰৰ সুবিধাৰ বাবে তিসি গুটিখিনি গুড়ি কৰি ল’ব পাৰি আৰু দৈনিক এক চামুচ পৰিমাণে টক দই, ওটচ বা ঘৰত বনোৱা ৰুটীৰ আটাৰ সৈতে মিলাই খাব পাৰি। ইয়াৰ উপৰিও পুৰুষ মহিলা সকলোৰে বাবে সেউজীয়া শাক-পাচলি খোৱাটো অতি প্ৰয়োজনীয়। বিশেষকৈ মাহেকীয়াৰ ঠিক আগে আগে যিসকল মহিলাৰ টোপনিৰ সমস্যা হয় আৰু শৰীৰটো দুৰ্বল লাগে, তেওঁলোকৰ বাবে সেউজীয়া শাক-পাচলি খুবেই উপকাৰী। ইয়াত থকা মেগনেচিয়াম, আইৰণ আৰু এন্টি-অক্সিডেন্টে শৰীৰৰ ৰোগ প্ৰতিৰোধ ক্ষমতা বহুখিনি বৃদ্ধি কৰে।
দৈনন্দিন খাদ্য তালিকাত ড্ৰাই ফ্ৰুটছ আৰু বিভিন্ন প্ৰকাৰৰ বীজ ৰখাটো সমানেই গুৰুত্বপূৰ্ণ। কাজু, বাদাম আৰু আখৰোটৰ পৰা শৰীৰে প্ৰয়োজনীয় প্ৰটিন, খনিজ পদাৰ্থ আৰু উপকাৰী চৰ্বি লাভ কৰে, যিয়ে হৰমনৰ ক্ষৰণ স্বাভাৱিক কৰাৰ লগতে থাইৰয়ড গ্ৰন্থি সুস্থ ৰখাত সহায় কৰে। একেদৰে কোমোৰা আৰু সূৰ্যমুখী ফুলৰ বীজেও শৰীৰত গুৰুত্বপূৰ্ণ ভূমিকা পালন কৰে। কোমোৰাৰ বীজে চালখন কোমল কৰে আৰু সূৰ্যমুখীৰ বীজে প্ৰজেষ্টেৰন হৰমনৰ ক্ষৰণ বৃদ্ধি কৰে। ইয়াৰ লগতে দৈনিক আহাৰত টক দই অন্তৰ্ভুক্ত কৰিব পাৰি। টক দইত থকা প্ৰটিন আৰু কেলচিয়ামে শৰীৰৰ মেটাবলিজম বৃদ্ধি কৰাৰ লগতে হৰমনৰ ক্ষৰণত এক সুন্দৰ ভাৰসাম্য বজাই ৰাখে।
শেষত ডাইল আৰু বুট-মটৰ জাতীয় খাদ্যৰ বিষয়ে উল্লেখ কৰিব পাৰি যিবোৰে হৰমনৰ সমতা ৰক্ষা কৰাত বিশেষ সহায় কৰে। বুট, মটৰ বা গজালি ওলোৱা বুট আদি খাদ্যত প্ৰচুৰ পৰিমাণে ফাইবাৰ আৰু প্ৰটিন থাকে বাবে ই শৰীৰৰ অতিৰিক্ত মেদ কমোৱাত সহায় কৰে। প্ৰায়ে দেখা যায় যে শৰীৰৰ ওজন বাঢ়ি যোৱাৰ বাবেই মহিলাৰ মাহেকীয়া অনিয়মিত হৈ পৰে। গতিকে এই খাদ্যবোৰৰ সহায়ত যদি শৰীৰৰ অতিৰিক্ত মেদ বা ওজন কমাব পৰা যায়, তেন্তে বেছিভাগ ক্ষেত্ৰতে অন্যান্য সমস্যাবোৰ আপোনাআপুনি ঠিক হৈ পৰে। হৰমনৰ খেলিমেলি হ’লে চিকিৎসাৰ প্ৰয়োজন নিশ্চয় হ’ব পাৰে, কিন্তু খাদ্যৰ অভ্যাস সলনি কৰিলে ঔষধৰ প্ৰয়োজনীয়তা বহুখিনি কমাই আনিব পৰা যায়।
