চিবিএছই (চেণ্ট্ৰেল বৰ্ড অৱ চেকেণ্ডাৰী এডুকেশ্যন)ৰ অধ্যক্ষ ৰাহুল সিং আৰু সচিব হিমাংশু গুপ্তাক শেহতীয়াকৈ বদলি কৰা হৈছে। দ্বাদশ শ্ৰেণীৰ উত্তৰবহী পৰীক্ষা কৰাৰ বাবে ব্যৱহাৰ কৰা অন-স্ক্ৰীণ মাৰ্কিং (অ’এছএম) ব্যৱস্থাটোৰ ক্ৰয় প্ৰক্ৰিয়াত হোৱা বিসংগতিৰ অভিযোগৰ মাজতে এই চৰকাৰী পদক্ষেপ গ্ৰহণ কৰা হৈছে। অৱশ্যে তেওঁলোকক নতুনকৈ ক’ত নিযুক্তি দিয়া হৈছে সেই বিষয়ে এতিয়াও জানিব পৰা হোৱা নাই।
এই অ’এছএম সেৱা ক্ৰয়ৰ ক্ষেত্ৰত হোৱা বিসংগতিৰ তদন্তৰ বাবে কেন্দ্ৰীয় চৰকাৰে এখন এজনীয়া সমিতি গঠন কৰিছে। অৱসৰপ্ৰাপ্ত আইএএছ বিষয়া এছ. ৰাধা চৌহানক এই তদন্তৰ দায়িত্ব দিয়া হৈছে, যি বৰ্তমান কেপাচিটি বিল্ডিং কমিশ্যনৰ অধ্যক্ষা হিচাপে কাৰ্যনিৰ্বাহ কৰি আছে। কেবিনেট সচিবালয়ে জাৰি কৰা নিৰ্দেশনা অনুসৰি, এই সমিতিখনে এমাহৰ ভিতৰত কৰ্মচাৰী আৰু প্ৰশিক্ষণ বিভাগত (ডিপিঅ’টি) নিজৰ প্ৰতিবেদন দাখিল কৰিব লাগিব। প্ৰয়োজন অনুসৰি এই সমিতিয়ে আন কাৰ্যালয়ৰ বিষয়াৰো সহায় ল’ব পাৰিব।
শেহতীয়াকৈ চিবিএছইৰ দ্বাদশ শ্ৰেণীৰ ফলাফলক লৈ ছাত্ৰ-ছাত্ৰীসকলে যথেষ্ট উদ্বেগ প্ৰকাশ কৰিছিল। প্ৰায় এক কোটি উত্তৰবহী মূল্যাংকনৰ বাবে খৰখেদাকৈ এই নতুন ব্যৱস্থাটো প্ৰৱৰ্তন কৰাক লৈ অভিভাৱক আৰু শিক্ষকসকলৰ মাজতো ক্ষোভৰ সৃষ্টি হৈছিল। ইয়াৰ পাছতে কেন্দ্ৰীয় শিক্ষা মন্ত্ৰালয়ে চিবিএছইৰ নিবিদা প্ৰক্ৰিয়া আৰু চাইবাৰ সুৰক্ষাৰ দুৰ্বলতাৰ ওপৰত তীক্ষ্ণ নজৰ ৰাখিছিল।
আনহাতে, চিবিএছইৰ বিষয়াসকলে কোনো ধৰণৰ অনিয়ম হোৱা নাই বুলি দাবী কৰিছে। তেওঁলোকৰ মতে, চৰকাৰী বিত্তীয় নিয়ম আৰু নিৰ্ধাৰিত ক্ৰয় প্ৰক্ৰিয়া মানিহে এই প্ৰক্ৰিয়াটো সম্পন্ন কৰা হৈছিল। উল্লেখযোগ্য যে, ১৭ ফেব্ৰুৱাৰীত ব’ৰ্ডৰ পৰীক্ষা আৰম্ভ হোৱাৰ মাত্ৰ ৭৪ দিন পূৰ্বে অৰ্থাৎ ৫ ডিচেম্বৰত ‘ক’এম্পট এডু টেক’ নামৰ প্ৰতিষ্ঠানটোক এই ঠিকা প্ৰদান কৰা হৈছিল।
