মুখ্যমন্ত্ৰী ডাঙৰ মানুহ গতিকে তেওঁ নীতি-নিয়ম ভৰিৰে মোহাৰি ঘূৰি ফুৰিলেও বিশেষ একো ক্ষতি নহয়। পূৰ্বতেও স্বাস্থ্যমন্ত্ৰী হিচাপে তেওঁ বিভিন্ন স্থানলৈ গৈ কোভিড পৰিস্থিতি মোকাবিলা কৰাৰ অভিজ্ঞতা আছে।
কিন্তু সকলো ফালৰ পৰা বিপদ সাধাৰণ জনতাৰ। কিয়নো কোভিডে অসমত ভয়াৱহ ৰূপ লৈছে। দৈনিক বহু লোকে মৃত্যুক আকোৱালি লৈছে তথা কোভিডত আক্ৰান্তৰ সংখ্যা দিনক দিনে বৃদ্ধি পাবলৈ ধৰিছে।
কালি মুখ্যমন্ত্ৰী হিমন্ত বিশ্ব শৰ্মাই নিজে কোভিডক লৈ প্ৰশাসনে জাৰি কৰা নিৰ্দেশনা উলংঘন কৰি সত্ৰত প্ৰৱেশ কৰিছিল তথা সামাজিক দুৰত্ব ধোঁৱাচাঙত তুলি মাজুলীৰ ভাগিনসকলৰ সৈতে গাত-গা লগাই সমদল কৰি গৈছিল।
আনকি সাংবাদিকক মিলাই তেওঁৰ সাঙ্গো-পাঙ্গোৰ সৈতে এটা কোঠাত ৩০ জনৰো অধিক লোকৰ উপস্থিতিত মাজুলীৰ ভাগিনসকলৰ সৈতে মাছৰে ভোজ-ভাতো খোৱা দেখিবলৈ পোৱা গৈছিল।
বাতৰিটোত এইখিনিতে আমি আৰক্ষী সঞ্চালক প্ৰধানে দিয়া হুংকাৰ পাঠক ৰাইজলৈ দাঙি ধৰিলো।
তেওঁ কৈছিল ‘অনুমতি দিয়াৰ সময়তো যদি ভিৰ কৰে তেন্তে আৰক্ষীয়ে লাঠীচালনা কৰিবই। কোনোবা ঠাইত অনুষ্ঠান যদি অনুষ্ঠিত কৰিলে বা ক’ৰৱাত যদি জনসাধাৰণ গোট খালে সেইখিনিক বিশ্বাসঘাতকতা বুলি ধৰা হ’ব। সমাজৰ প্ৰতি দেশৰ প্ৰতি বিশ্বাসঘাটকতা বুলি ধৰি লোৱা হ’ব। তেওঁলোকৰ বিৰুদ্ধে কেৱল দুৰ্য্যোগ প্ৰশমম আইনৰ অধীনতে গোচৰ ৰুজু নকৰো বা সাধাৰণ IPC ধাৰাত গোচৰ নলওঁ। আমি Attempt to murder ৰ গোচৰ ল’ম। যিমান ডাঙৰ মানুহ নহওঁক বা সাধাৰণ মানুহ নহওঁক তেওঁৰ বিৰুদ্ধে কঠোৰতম ব্যৱস্থা গ্ৰহণ কৰিম।‘
এতিয়া ডিজিপি মহোদয়লৈ আমাৰ প্ৰশ্ন ‘এটা কোঠাত ইমানখিনি মানুহ জুম বন্ধাটো সমাজ-দেশৰ প্ৰতি বিশ্বাসঘাতকতা নহয় নে? বিশ্বাসঘাতকতা কৰাৰ কাৰণে মুখ্যমন্ত্ৰীৰ বিৰুদ্ধে কঠোৰতম গোচৰ ৰুজু কৰিবলৈ আপোনাৰ সাহস হ’ব নে? Attempt to murder গোচৰ ৰুজু হ’ব নেকি মুখ্যমন্ত্ৰীৰ বিৰুদ্ধে?
এতিয়া আমি কৰা এই প্ৰশ্নই চ’ছিয়েল মেডিয়াতো বহু ফেচবুক ব্যৱহাৰকাৰীয়ে কৰা আৰম্ভ কৰিছে। আনকি এনে কিছুমান প্ৰশ্ন উত্থাপিত হৈছে —‘মুখ্যমন্ত্ৰীৰ লগতে বৰমূৰীয়াৰ বাবে পৃথক আইন, সাধাৰণ জনতাৰ বাবে আইন পৃথক নেকি?‘
আমি এনেবোৰ কথাত এতিয়া গুৰুত্ব নিদি সাধাৰণ জনতা নিজেই সাৱধানতা অৱলম্বন কৰিব লাগিব তথা মাস্ক পৰিধান কৰি আৰু সামাজিক দূৰত্ব মানি চলিব লাগিব।
কিয়নো সাধাৰণ জনতা কোভিডত আক্ৰান্ত হৈ উশাহ-নিশাহ লোৱাত অসুবিধা হ’লেও চিকিৎসালয়ত বিচনাৰ অভাৱ বা অক্সিজেনৰ অভাৱ ইত্যাদি বাতৰি প্ৰকাশ পাই আহিছে।
কিন্তু বৰমূৰীয়াসকল কোভিডত আক্ৰান্ত হ’লেও তেওঁলোকৰ বাবে উন্নত চিকিৎসাৰ ব্যৱস্থা সদায় মজুত থাকে।
