ক্ৰিকেটৰ সকলো ফৰ্মৰ পৰা অৱসৰ ঘোষণা কৰা ভাৰতীয় দলৰ প্ৰাক্তন অলৰাউণ্ডাৰ ইৰফান পাঠানে এইবাৰ মুখ খুলিছে ভাৰতীয় দলৰ প্ৰাক্তন প্ৰশিক্ষক গ্ৰেগ চেপেলৰ সমৰ্থনত।
সুদীৰ্ঘ বিৰতিৰ পাছত মুখ খুলি ইৰফানে এক প্ৰকাৰ ক্লিনশ্বীটহে দিলে গ্ৰেগক।
ইৰফানে তেওঁৰ কেৰিয়াৰৰ পতনৰ বাবে গ্রেগ চেপেলক দায়ী কৰিবলৈ প্রস্তুত নহয়। ইয়াৰ বিপৰীতে তেওঁ তদানীত্বন টীম মেনেজমেন্ট তথা নিৰ্বাচকসকলকহে লক্ষ্য কৰি লৈছে।
ইৰফানে দাবী কৰে যে কেৰিয়াৰৰ তুংগত থকা সময়খিনিতো তেওঁক সময় তথা সুযোগ দিয়া নহ’ল।
ইৰফানে কয়,’’যিসকলে গ্ৰেগ চেপেলক দায়ী কৰিব খোজে তেওঁলোকে প্ৰকৃত কথাটো লুকুৱাব বিচাৰিছে। মই ছুইং হেৰুৱাই পেলোৱাৰ কথা ইমানকৈ কোৱাৰ অৰ্থ নাই। মই ছুইং ঠিকেই পাইছিলো। জনা উচিত যে ১০ অভাৰ একেই ধৰণে ছুইং পোৱাটো সম্ভৱ নহয়।‘’
‘’বহুতেই মোৰ প্ৰদৰ্শনক লৈ ক’ব খোজে। কিন্তু মোৰ কামটো আছিল অন্য ধৰণৰ। মই প্ৰথম চেইঞ্জ বলাৰ হিচাপে আহিছিলো। মোৰ কামটো আছিল ৰাণ কৰাত বাধা দিয়া,’’-পাঠানে কয়।
ইৰফানে লগতে উল্লেখ কৰে,’’মোৰ মনত পৰে ২০০৮ চনত শ্ৰীলংকাত এখন খেল জয়ী হোৱাৰ পাছত মোক বাদ দিয়া হৈছিল। কওকচোন, খেল জিকাৰ পাছত কোনোৱে বাদ পৰে?’’
দেশৰ প্ৰতিভাবান বলাৰ সকলৰ মাজৰ এজন ইৰফান পাঠান বেটিঙতো যথেষ্ট আক্ৰমণাত্মক আছিল। এগৰাকী দুৰ্দান্ত ৰূপত কল্পনা কৰা অলৰাউণ্ডাৰ হিচাপে ইৰফানৰ প্ৰতিভাই সম্পূৰ্ণ বিকশিত হোৱাৰ সুযোগ নাপালে।
আন্তৰ্জাতিক ক্ৰিকেটত ইৰফান পাঠানৰ কেৰিয়াৰ দীঘলীয়া নহ’ল। বেটিঙত অধিক মনোযোগ দিবলগীয়া হোৱা বাবে বলিঙত ছুইং হেৰোৱা দেখা গৈছিল।
পাঠানৰ কেৰিয়াৰ অৱনমিত হোৱাৰ বাবে বহুতেই প্ৰাক্তন প্ৰশিক্ষক গ্ৰেগ চেপেলক দায়ী কৰে। কিয়নো চেপেলে পাঠানক এগৰাকী সম্পূৰ্ণ অলৰাউণ্ডাৰ বনাব বিচৰাৰ বাবেই হেনো পাঠানৰ বলিং ক্ষতিগ্ৰস্ত হৈছিল।
কিন্তু এই সকলো ৰহস্যৰ ভেদ ভাঙি ইৰফান পাঠানে আন এক দিশৰ কথাহে উন্মোচিত কৰিলে।
