আজি হেঙেৰাবাৰীস্থিত বিজেপিৰ ৰাজ্যিক কাৰ্য্যালয়ত দলটোৰ পঞ্চায়ত নিৰ্বাচনৰ ইস্তাহাৰ উন্মোচন কৰা হয়। ইস্তাহাৰ উন্মোচন কৰে মুখ্য মন্ত্ৰী সোণোৱাল, ৰাজ্যিক সভাপতি ৰঞ্জিত দাস আৰু বিত্ত তথা স্বাস্থ্য মন্ত্ৰী ড০ হিমন্ত বিশ্ব শৰ্মাই।
ইস্তাহাৰ উন্মোচন কৰি সভাপতি ৰঞ্জিত দাস আৰু মুখ্য মন্ত্ৰী সোণোৱালে নিজৰ নিজৰ বক্তব্যত ৰাজ্যখনত বিজেপিৰ চৰকাৰৰ দিনত হোৱা পৰিৱৰ্তন আৰু উন্নতিৰ কথা দোহাৰে।
ইয়াৰ বিপৰীতে আজিৰ সভাত উপস্থিত থাকিও একো নক’লে মন্ত্ৰী হিমন্ত বিশ্ব শৰ্মাই। ফলত মন্ত্ৰীজনে বিৰোধী দলক আৰু কিছু ব্যক্তি বিশেষক লক্ষ্য কৰি নিয়মীয়াকৈ কৰি অহা স্বভাৱগত কটাক্ষপূৰ্ণ বাক্যবাণৰ সোৱাদৰ পৰা বঞ্চিত হ’ল সাংবাদিক আৰু অন্যান্য উপস্থিতসকল।
বিশ্বাস কৰিবলৈ টান যদিও, সদা সৰৱ মন্ত্ৰীজনক আজি মঞ্চত থকা গোটেই সময়খিনি নীৰৱ আৰু বিমৰ্ষ ৰূপত থকা দেখা গ’ল। যেন নিজৰ মাজতে চলি থকা কিবা অংকত ব্যস্ত। কথা পতা বাদেই, আনকি এবাৰো কাষতে বহি থকা মুখ্য মন্ত্ৰী সোণোৱালৰ চকুলৈও নাচালে মন্ত্ৰী হিমন্তই।
বাকপটুতাৰ বাবেই সদায়ে চৰ্চা আৰু মনোযোগৰ কেন্দ্ৰ হৈ থকা, প্ৰতিখন সভাত সৰৱ আৰু উদাত্ত ভাষণ দিয়া মন্ত্ৰীজনে একো নোকোৱাকৈ মোলান বদনেৰে বহি থকা দৃশ্য আছিল অতিকে বিৰল আৰু উৎসুকতাৰ কাৰণ।
মন কৰিব লগীয়া যে মন্ত্ৰী হিমন্তক অসমৰ ৰাইজে ৰাজনীতিক হিচাপে যোৱা প্ৰায় বিচ বছৰ সদায়ে সৰৱ ৰূপতেই দেখি আহিছে। কংগ্ৰেছ এৰি বিজেপিলৈ যোৱাৰ পিছত মন্ত্ৰীজনৰ আনন্দ, উৎসাহ আৰু সক্ৰিয়তাই যেন নতুন মাত্ৰ লাভ কৰিছিল, তেনে ভাব তেওঁৰ চাল-চলন, বক্তৃতা, মন্তব্যত সদায়ে দেখি আহিছে অসমৰ জনগণে।
কিন্তু এতিয়া তাত যেন কিবা পৰিৱৰ্তন আহিছে। বিশেষকৈ এটা নিৰ্বাচনৰ প্ৰাক মুহূৰ্তত এই কথাই মনোযোগ কাঢ়িছে ৰাজনৈতিক বিশ্লেষকৰ।
অপ্ৰিয় সত্যটো হ’ল, যোৱা বেচ কিছুদিন মন্ত্ৰীজনৰ স্বাভাৱিক সৰৱ স্বভাৱ দেখাৰ পৰা বঞ্চিত হৈ আছে অসমৰ জনগণ। এই নীৰৱতা, বিমৰ্ষতাৰ যথেষ্ট ৰাজনৈতিক তাৎপৰ্য্য থাকিব পাৰে বুলি সন্দেহ কৰিছে ৰাজনৈতিকভাৱে সচেতন একাংশ ৰাজনৈতিক বিশ্লেষকে।
“যিকোনো নিৰ্বাচনৰ সময়ত এয়া একেবাৰে অস্বাভাৱিক কথা”, এজন ৰাজনৈতিক টিপ্পনীকাৰে কয়।
“সৰৱতাই যাৰ বৈশিষ্ট্য তেওঁৰ মৌনতাই স্বাভাৱিকতেই মানুহক ভাবিবলৈ বাধ্য কৰে।” আন এজনৰ মন্তব্য।
