বুধবাৰে মুখ্যমন্ত্ৰী ডঃ হিমন্ত বিশ্ব শৰ্মাই এটা টুইট কৰে। টুইটত তেওঁ কৈছিল যে, দিল্লীৰ পৰা ডুবাইলৈ এমিৰেটছ ফ্লাইটত যাত্ৰা কৰিছিল। মুখ্যমন্ত্ৰীয়ে ডুবাই হৈ আমষ্টাৰডামলৈ যাত্ৰা কৰিছিল। সেই যাত্ৰাতে তেওঁৰ সৈতে এটা ঘটনা সংঘটিত হয়।
ঘটনাটো সন্দৰ্ভত মুখ্যমন্ত্ৰীয়ে এক্স হেণ্ডলত টুইট কৰি লিখিছে, “আজি পুৱা মই দিল্লীৰ পৰা ডুবাইলৈ এমিৰেটছৰ বিমানেৰে যাত্ৰা কৰিলোঁ। বিমানত এজন ভদ্ৰ যুৱকে মোক তেওঁৰ আন্তঃৰাষ্ট্ৰীয় প্লাগ আৰু চাৰ্জিং কেবল ধাৰলৈ দিলে। দুৰ্ভাগ্যজনকভাৱে মই শুই থাকোঁতে তেওঁ ডুবাইত নামিল, আৰু মই সেইবোৰ ঘূৰাই দিব নোৱাৰিলোঁ৷ মই এই মাত্ৰ আমষ্টাৰডামত উপস্থিত হৈছো আৰু তেওঁৰ বস্তুবোৰ ঘূৰাই নিদিয়াৰ বাবে ক্ষমা বিচাৰিছো৷ যদি এই টুইটটো পাইছে, অনুগ্ৰহ কৰি মোলৈ এটা মেচেজ পঠাওক যাতে মই চাৰ্জাৰ আৰু কেবল তৎক্ষণাত ঘূৰাই দিয়াৰ ব্যৱস্থা কৰিব পাৰো। আপোনাৰ দয়াৰ বাবে ধন্যবাদ, আৰু আপোনাৰ যিকোনো অসুবিধাৰ বাবে মই অনুশোচনা কৰিছো।”
মুখ্যমন্ত্ৰীৰ এই টুইটৰ পিছতে বিভিন্নজনে বিভিন্ন মতপোষণ কৰা দেখা গৈছে। তাৰ মাজৰে কবীৰা নামৰ এজন লোকে মুখ্যমন্ত্ৰী ডঃ শৰ্মাৰ টুইটটো ৰিটুইট কৰি এমিৰেটছ ফ্লাইটৰ পৰা স্পষ্টীকৰণ বিচাৰে। তেওঁৰ অভিযোগ হ’ল যে দিল্লীৰ পৰা একেখন বিমানেৰে আমষ্টাৰডামলৈ যাত্ৰা কৰিব নোৱাৰি। ডুবাইত অৱতৰণ কৰাৰ পাছত ৩ ঘণ্টা ৰৈ হে তাৰ পৰা অন্য এখন বিমানেৰেহে আমষ্টাৰডামলৈ যাত্ৰা কৰিব পাৰি। গতিকে দিল্লীৰ পৰা আমষ্টাৰডামলৈ যোৱা সকলো যাত্ৰীয়ে ডুবাইত অৱতৰণ কৰাৰ পাছত অন্য এখন বিমানেৰে যাব লাগিব। ভাৰতৰ পৰা আমষ্টাৰডামলৈ যোৱা এজন যাত্ৰীয়ে ডুবাইত নানামি বিয়লি তিনি বজালৈকে বিমানতে শুই থাকিব পাৰে নেকি? এই প্ৰশ্ন কৰি লোকজনে এমিৰেটছ ফ্লাইটৰ স্পষ্টীকৰণ বিচাৰে।
এমিৰেটছ ফ্লাইটে এই লোকজনৰ টুইটৰ উত্তৰো দিছে। এমিৰেটছ ফ্লাইটৰ এমিৰেটছ চাপ’ৰ্টৰ এক্স হেণ্ডেলে টুইট কৰি কৈছে যে এমিৰেটছৰ সকলো বিমানেই ডুবাই বিমানবন্দৰৰ টাৰ্মিনেল ৩ ৰপৰা যাত্ৰা কৰে লগতে আৰু অৱতৰণো কৰে। ডুবাইত ট্ৰেনজিটৰ সময়ত যাত্ৰীসকলে টাৰ্মিনেল ৩ত নামিব লাগে।
দিল্লীৰ পৰাই পোনপতীয়াকৈ আমষ্টাৰডামলৈ একেখন বিমানে যাত্ৰী কঢ়িয়াই নিনিয়ে নেকি? কবীৰা নামৰ লোকজনৰ মতে একেখন বিমানেৰে দিল্লীৰ আমষ্টাৰডামলৈ যাব নোৱাৰি। এমিৰেট চাপ’ৰ্টে ইয়াৰ পোনপতীয়া উত্তৰ নিদিলেও কয় যে দিল্লীৰ পৰা যোৱা যাত্ৰীসকলে ডুবাই টাৰ্মিনেল ৩ত নামিব লাগে।
এতিয়া প্ৰশ্ন হৈছে মুখ্যমন্ত্ৰী ডঃ হিমন্ত বিশ্ব শৰ্মাই ডুবাই বিমানবন্দৰৰ টাৰ্মিনেল ৩ত বিমানৰ পৰা নমা নাছিল নেকি? যদি নামিছিলেই তেনে তেওঁ কেনেকৈ বিমানখন ডুবাইত অৱতৰণ কৰাৰ পাছতো শুই থাকিব পাৰিলে?এতিয়া এইবোৰ প্ৰশ্নৰ উদয় হৈছে। লগতে মুখ্যমন্ত্ৰীয়ে কোৱা ঘটনাটো সত্য নে কবীৰাই কৰা দাবী সত্য? মুখ্যমন্ত্ৰীয়ে চৰ্চাত থাকিবলৈ এনে কাহিনী প্ৰচাৰ কৰিছে নেকি? এইবোৰ প্ৰশ্নও এতিয়া চৰ্চা চলিবলৈ ধৰিছে।
