টীম ইণ্ডিয়াৰ টেষ্টত বিশেষজ্ঞ ফাষ্ট বলাৰ ইশান্ত শৰ্মাই আজি ২ ছেপ্টেম্বৰত ৩১ বছৰত ভৰি দিলে।
ভাৰতীয় ক্ৰিকেট দলৰ চলিত শৃংখলাত তেওঁ এগৰাকী অভিজ্ঞ বলাৰ হিচাপে অন্তৰ্ভুক্ত হৈছে।
ইশান্তে তেওঁৰ জন্মদিনৰ ঠিক এদিন পূৰ্বে ৱেষ্টইণ্ডিজৰ বিৰুদ্ধে জামাইকা টেষ্টত এক ডাঙৰ অভিলেখ তেওঁৰ নামত লিপিবদ্ধ কৰিবলৈ সক্ষম হ’ল।
ইশান্তে প্ৰাক্তন ভাৰতীয় অধিনায়ক কপিল দেবৰ এক ডাঙৰ অভিলেখ ভংগ কৰে।
ইশান্ত শৰ্মাই এছিয়াৰ বাহিৰত আটাইতকৈ অধিক টেষ্ট উইকেট দখল কৰা খেলুৱৈৰ ক্ষেত্ৰত কপিল দেবক অতিক্ৰম কৰে।
এতিয়া এছিয়াৰ বাহিৰত টেষ্ট ক্ৰিকেটত ইশান্তৰ উইকেটৰ সংখ্যা হ’লগৈ ১৫৬ টা। এইদৰে ইশান্ত এছিয়াৰ বাহিৰত টেষ্টত সৰ্বাধিক উইকেট দখল কৰা ফাষ্ট বলাৰ হিচাপে পৰিগণিত হ’ল।
কপিল দেবে এছিয়াৰ বাহিৰত ৪৫ খন টেষ্টত ১৫৫টা উইকেট দখল কৰিছিল।
এছিয়াৰ বাহিৰত সামগ্ৰিকভাৱে সৰ্বাধিক টেষ্ট উইকেট দখল কৰা খেলুৱৈৰ তালিকাৰ শীৰ্ষত আছে অনিল কুম্বলে। তেওঁ ২০০ টা উইকেট দখল কৰি শীৰ্ষ স্থানত আছে যদিও তেওঁ এগৰাকী লেগ স্পীনাৰ আছিল।
এছিয়াৰ বাহিৰত সামগ্ৰিকভাৱে সৰ্বাধিক টেষ্ট উইকেট দখল কৰা ফাষ্ট বলাৰৰ ভিতৰত জাহিৰ খানৰ স্থান ইশান্ত শৰ্মা আৰু কপিল দেবৰ পাছতেই আছে।
জাহিৰ খানে এছিয়াৰ বাহিৰত ৩৮খন টেষ্টত ১৪৭টা উইকেট দখল কৰিছিল।
ইশান্তৰ কাৰণে জামাইকা টেষ্ট অত্যন্ত সুখকৰ হিচাপে পৰিগণিত হৈছে। তেওঁ প্ৰথম ইনিংছত বেটিঙত ৫৭ ৰাণৰ ইনিংছ খেলি টেষ্ট কেৰিয়াৰৰ প্ৰথমটো অৰ্দ্ধশতক অৰ্জন কৰে।
ইশান্ত শৰ্মাই ১৯৮৮ চনৰ ২ ছেপ্টেম্বৰত দিল্লীত জন্মগ্ৰহণ কৰে। ২০০৬-০৭ত দক্ষিণ আফ্ৰিকাৰ বিৰুদ্ধে মাত্ৰ ১৮ বছৰ বয়সত ভাৰতীয় দলৰ হৈ খেলাৰ সুযোগ লাভ কৰিছিল ইশান্তে।
ইশান্তে ২০১৬ৰ ১০ ডিচেম্বৰ ভাৰতীয় মহিলা বাস্কেটবল দলৰ খেলুৱৈ প্ৰতিমা সিঙৰ সৈতে বিবাহপাশত আৱদ্ধ হয়।
