পাকিস্তানৰ ৰাজধানী ইছলামাবাদত আজি ১১ নৱেম্বৰত এক ভয়ংকৰ বোমা বিস্ফোৰণ সংঘটিত হয়। ইছলামাবাদৰ জিলা আদালতৰ মূল প্ৰবেশদ্বাৰৰ বাহিৰত ৰখা আৰক্ষীৰ এখন বাহনক লক্ষ্য কৰি এই আক্ৰমণ কৰা হৈছিল বুলি জানিব পৰা গৈছে। এই আক্ৰমণত এতিয়ালৈকে ১২ জন লোক নিহত হৈছে আৰু ২৭ জন আহত হৈছে।
পাকিস্তানৰ অভ্যন্তৰীণ মন্ত্ৰী মহসিন নকভীয়ে এই ঘটনাক আত্মঘাতী আক্ৰমণ বুলি নিশ্চিত কৰিছে। অৱশ্যে কোনো সংগঠনে এতিয়ালৈকে আক্ৰমণৰ দায়িত্ব গ্ৰহণ কৰা নাই, কিন্তু এই আক্ৰমণৰ সৈতে পাকিস্তানী তালিবান (TTP) জড়িত থকাৰ সন্দেহ প্ৰকাশ কৰা হৈছে।
আজি দুপৰীয়া প্ৰায় ১২.৩০ বজাত এই ঘটনা সংঘটিত হয়। আদালতৰ প্ৰৱেশদ্বাৰৰ সামান্য দূৰত্বত ৰখা এখন গাড়ীত বিস্ফোৰক পদাৰ্থ লৈ আত্মঘাতী বোমাৰোৱে এই বিস্ফোৰণ ঘটায় বুলি জানিব পৰা গৈছে।
বিস্ফোৰণৰ শব্দ প্ৰায় ৬ কিলোমিটাৰ দূৰলৈ বিয়পি পৰিছিল। বিস্ফোৰণৰ ফলত কেইবাখনো গাড়ী পুৰি যায় আৰু আশে-পাশাৰ দোকান-ব্যৱসায়িক প্ৰতিষ্ঠানসমূহৰ বিস্তৰ ক্ষতি হয়। নিহতসকলৰ ভিতৰত অধিকাংশই অধিবক্তা আৰু আদালতৰ কৰ্মচাৰী বুলি জানিব পৰা গৈছে।
খবৰ পোৱাৰ লগে লগে ঘটনাস্থলীত আৰক্ষী, নিৰাপত্তা বাহিনী আৰু বোমা নিষ্কাশন দল উপস্থিত হৈ তদন্ত আৰম্ভ কৰে। আহতসকলক পাকিস্তান ইনষ্টিটিউট অৱ মেডিকেল চাইন্সেছ (PIMS) হাস্পতাললৈ প্ৰেৰণ কৰা হৈছে।
ইয়াৰ এদিন পূৰ্বে, ১০ নৱেম্বৰত খাইবাৰ পখতুনখোৱা প্ৰদেশৰ ৱানা চহৰত পাকিস্তান নিৰাপত্তা বাহিনীয়ে পাকিস্তানী তালিবানৰ ছয়জন সন্ত্ৰাসবাদীৰ এটা ডাঙৰ আক্ৰমণৰ চেষ্টা বিফল কৰিছিল।
আন্তৰ্জাতিক স্তৰত পাকিস্তান আৰু আফগানিস্তানৰ মাজত সীমান্ত সন্ত্ৰাসবাদৰ সমস্যাই পৰিস্থিতি উত্তপ্ত কৰি ৰাখিছে। ইয়াৰ বাবে পাকিস্তানে আফগান চৰকাৰক TTP সন্ত্ৰাসবাদীসকলক আশ্ৰয়দাতা বুলি অভিযোগ কৰিছে।
উল্লেখযোগ্য যে, ১০ নৱেম্বৰত ভাৰতৰ ৰাজধানী নতুন দিল্লীতো এক বিস্ফোৰণৰ ঘটনা সংঘটিত হৈছিল, য‘ত পাকিস্তানী সন্ত্ৰাসবাদী সংগঠনৰ জড়িত থকাৰ সন্দেহ প্ৰকাশ কৰা হৈছে। এই ঘটনাই প্ৰতিবেশী দেশসমূহৰ মাজত উত্তেজনা বৃদ্ধি কৰিছে।
পাকিস্তানৰ ৰাষ্ট্ৰপতি আসিফ আলী জাৰ্দাৰীয়ে এই ঘটনাৰ নিন্দা কৰি দোষীসকলক কৰায়ত্ত কৰাৰ বাবে কঠোৰ ব্যৱস্থা গ্ৰহণৰ প্ৰতিশ্ৰুতি দিছে।
