আন্তঃৰাষ্ট্ৰীয় আইন উলংঘা কৰি লেবাননৰ আৱাসিক এলেকাত ব্যৱহাৰ কৰা হৈছে মাৰাত্মক বগা ফছফৰাছ অস্ত্ৰ! ইজৰাইলৰ বিৰুদ্ধে এনে চাঞ্চল্যকৰ অভিযোগ উত্থাপন কৰিছে আমেৰিকাৰ মানৱ অধিকাৰ সংগঠনে।
নিউয়ৰ্কস্থিত হিউমেন ৰাইটছ ৱাচে তেওঁলোকৰ হাতলৈ অহা সাতখন ফটোৰ সত্যাসত্য নিৰূপণ কৰি এই দাবী কৰিছে। তেওঁলোকৰ অভিযোগ যে বেঞ্জামিন নেতানিয়াহুৰ দেশখনে ৩ মাৰ্চত দক্ষিণ লেবাননৰ ইয়োহম’ৰ চহৰৰ আৱাসিক এলেকাত এই মাৰাত্মক ৰাসায়নিক অস্ত্ৰ ব্যৱহাৰ কৰিছিল।
হিউমেন ৰাইটছ ৱাচৰ গৱেষক ৰামজী কাইছে কয়, ‘এটা আৱাসিক এলেকাত এই অবৈধ অস্ত্ৰ ব্যৱহাৰে তাত থকা বাসিন্দাসকলৰ জীৱন বিপদত পেলাইছে। ইয়াৰ ফলত ভয়ংকৰ জুইৰ সৃষ্টি হ’ব পাৰে। ফলত বহু লোকৰ মৃত্যু হ’ব পাৰে।’
এই ৰাসায়নিক অস্ত্ৰৰ প্ৰভাৱত অঞ্চলটোৰ দুটা ঘৰত জুই লাগিছিল বুলিও জনা গৈছে। এই বগা ফছফৰাছ অতি জ্বলনশীল ৰাসায়নিক পদাৰ্থ। এই ৰাসায়নিক পদাৰ্থ অক্সিজেনৰ সংস্পৰ্শলৈ আহিলে সহজেই জুই লাগে। ফলত এই অস্ত্ৰ ব্যৱহাৰ কৰিলে বৃহৎ অঞ্চলৰ ঘৰ-দুৱাৰ, খেতি পথাৰত জুই লাগিব পাৰে। এই ৰাসায়নিক পদাৰ্থৰ সংস্পৰ্শলৈ আহিলে শ্বাস-প্ৰশ্বাসজনিত সমস্যা আৰু অংগ বিকলতাও হ’ব পাৰে।
আন্তঃৰাষ্ট্ৰীয় আইন অনুসৰি কিছুমান ক্ষেত্ৰত বগা ফছফৰাছ ব্যৱহাৰ কৰিব পাৰি যদিও এই ৰাসায়নিক পদাৰ্থটো কোনোমতে এয়াৰবাৰ্ষ্ট (বায়ুৰ মাজত বিস্ফোৰণ) কৰিব নোৱাৰি।
অৱশ্যে ইজৰাইলে বগা ফছফৰাছ ব্যৱহাৰ কৰাৰ অভিযোগ এইটো প্ৰথম নহয়। ২০২৩ চনতো নেতানিয়াহুৰ দেশখনে গাজা আৰু লেবাননত এই অস্ত্ৰ ব্যৱহাৰ কৰাৰ অভিযোগ উত্থাপন হৈছিল। যদিও ইজৰাইলৰ প্ৰতিৰক্ষা বাহিনীয়ে সেই অভিযোগ অস্বীকাৰ কৰিছিল।
