সোমবাৰে পুৱা ইজৰাইলৰ বাহিনীয়ে আন্তঃৰাষ্ট্ৰীয় জলসীমাত পেলেষ্টাইনৰ এখন সাহায্যবাহী নাও আটক কৰে। নাওখনত ছুইডেনৰ জলবায়ু কৰ্মী গ্ৰেটা থুনবাৰ্গ আৰু ফ্ৰান্সৰ ইউৰোপীয় সংসদৰ সদস্য ৰিমা হাছানৰ লগতে আন ১২ জন লোক আছিল।
ব্ৰিটিছ পতাকাবাহী মেডেলিন নামৰ ইয়টখনে ৬ জুনত চিচিলিৰ পৰা যাত্ৰা আৰম্ভ কৰিছিল আৰু পেলেষ্টাইনৰ গাজা ষ্ট্ৰিপৰ দিশে গৈ আছিল। ফ্ৰিডম ফ্লটিলা মিত্ৰজোঁটৰ উদ্যোগত কৰা হৈছিল এই যাত্ৰা।
ইজৰাইলৰ বৈদেশিক মন্ত্ৰালয়ে জনোৱা মতে, ক্ৰু মেম্বাৰসকলক উদ্ধাৰ কৰি নিৰাপদে ৰখা হৈছে আৰু খাদ্য আৰু পানীৰ ব্যৱস্থা কৰা হৈছে। নাওখনত চাউল আৰু কেঁচুৱাৰ খাদ্যকে ধৰি প্ৰতীকী মানৱীয় সাহায্য আছিল। ইজৰাইল কৰ্তৃপক্ষই সমগ্ৰ অভিযানক “সংবাদ মাধ্যমৰ প্ৰৰোচনা” বুলি অভিহিত কৰিছে।
অৱশ্যে মানৱ অধিকাৰ কৰ্মীসকলে কয় যে এই অভিযানৰ মূল উদ্দেশ্য আছিল গাজাত চলি থকা মানৱীয় সংকটৰ প্ৰতি দৃষ্টি আকৰ্ষণ কৰা। গাজা অৱৰোধক “সামূহিক শাস্তি” বুলি অভিহিত কৰি আহিছে ফ্লটিলা সংগঠনটোৱে।
ইয়াৰ পূৰ্বে আন্তঃৰাষ্ট্ৰীয় জলসীমাত ড্ৰ’ন আক্ৰমণৰ ফলত পেলেষ্টাইন অভিমুখী এখন নাও ক্ষতিগ্ৰস্ত হৈছিল, যাৰ বাবে সংগঠনটোৱে ইজৰাইলক দোষাৰোপ কৰিছিল। ২০০৭ চনত হামাছে ইয়াৰ নিয়ন্ত্ৰণ লোৱাৰ পিছৰে পৰা ইজৰাইল আৰু ইজিপ্তই এই ভূখণ্ডত কঠোৰ অৱৰোধ আৰোপ কৰিছে, যিটো এতিয়াও চলি আছে।
