আৰব বিশ্বত পুনৰ যুদ্ধৰ দামামা। শনিবাৰে পুৱা ইৰাণৰ ৰাজধানী তেহৰাণত একাধিক বিস্ফোৰণৰ শব্দ শুনা যায়। ইয়াৰ পিছত ইজৰাইলে ঘোষণা কৰে যে ইৰাণৰ বিৰুদ্ধে সম্ভাৱ্য ভাবুকি বিফল কৰিবলৈ তেওঁলোকে ‘প্ৰি-ইম্পটিভ’ বা আগতীয়া আক্ৰমণ চলাইছে।
ইজৰাইলৰ প্ৰতিৰক্ষা মন্ত্ৰী ইজৰাইল কাটজে কয় যে দেশৰ নিৰাপত্তা নিশ্চিত কৰাৰ বাবে এই পদক্ষেপ গ্ৰহণ কৰা হৈছে। তেওঁৰ ভাষাত, “ইজৰাইল ৰাষ্ট্ৰৰ প্ৰতি ভাবুকি দূৰ কৰি বলৈ ইৰাণৰ বিৰুদ্ধে আগতীয়া আক্ৰমণ চলোৱা হৈছে।”
এই ঘোষণাৰ পিছত সমগ্ৰ ইজৰাইলত উত্তেজনা বিয়পি পৰে। টেল আভিভত চাইৰেন বাজিবলৈ ধৰে। সম্ভাৱ্য ক্ষেপণাস্ত্ৰ আক্ৰমণৰ আশংকাত সতৰ্কবাণী জাৰি কৰা হয়। প্ৰত্যক্ষদৰ্শীয়ে জনোৱা মতে, মহানগৰীৰ বিভিন্ন প্ৰান্তত একেলগে চাইৰেন শুনা যায়।
ইজৰাইলৰ প্ৰতিৰক্ষা বাহিনীয়ে এক বিবৃতিত কয় যে কেইমিনিটমানৰ ভিতৰতে সমগ্ৰ দেশতে সতৰ্কবাণীমূলক চাইৰেন বজোৱা হয়। মোবাইল ফোনতো নাগৰিকলৈ আগতীয়াকৈ সতৰ্কবাণী প্ৰেৰণ কৰা হয়। আপাততঃ নিৰাপদ আশ্ৰয় শিবিৰৰ ওচৰত থাকিবলৈ নিৰ্দেশ দিয়া হয়। এই ব্যৱস্থাৰ জৰিয়তে জনসাধাৰণক সম্ভাৱ্য ক্ষেপণাস্ত্ৰ নিক্ষেপণৰ বাবে সাজু কৰি ৰখা বুলি কোৱা হৈছে।
কূটনৈতিক বিশ্লেষকসকলৰ মতে এই পৰিস্থিতিয়ে আৰব বিশ্বত নতুন সামৰিক সংঘাতৰ ইংগিত দিয়ে। দীৰ্ঘদিন ধৰি ইৰাণৰ পাৰমাণৱিক কাৰ্যসূচীক লৈ পশ্চিমীয়া বিশ্বৰ সৈতে উত্তেজনা বৃদ্ধি পাইছে। সেই অচলাৱস্থা দূৰ কৰিবলৈ কূটনৈতিক সমাধানৰ সম্ভাৱনাৰ বিষয়েও আলোচনা চলি আছিল। কিন্তু শেহতীয়া এই সামৰিক পদক্ষেপে সেই সম্ভাৱনাক আৰু অধিক অনিশ্চিত কৰি তুলিছে।
তেহৰাণৰ বিস্ফোৰণ আৰু টেল আভিভৰ সতৰ্কবাণী ছাইৰেনে – দুয়োটা পৰিঘটনাই প্ৰমাণ কৰে যে পৰিস্থিতি দ্ৰুতগতিত সলনি হৈছে। এতিয়া প্ৰশ্ন হয় এই প্ৰতি-উত্তেজনা সীমিত হৈ থাকিব নে বৃহত্তৰ সংঘাতলৈ পৰিণত হ’ব। সেয়ে, বিশ্বৰ চকু এতিয়া আৰব বিশ্বৰ ওপৰত।
শেহতীয়াকৈ জেনেভাত আমেৰিকা আৰু ইৰাণৰ মাজত চলি থকা পাৰমাণৱিক আলোচনাত ‘উল্লেখযোগ্য অগ্ৰগতি’ হোৱা বুলি প্ৰকাশ পাইছিল। এই বৈঠকৰ মধ্যস্থতাত ওমানৰ বৈদেশিক মন্ত্ৰী বদৰ আলবুছৈদিয়ে অংশগ্ৰহণ কৰে। তেওঁ কয় যে দুয়োখন দেশে নিজ নিজ ৰাজধানীৰ সৈতে আলোচনা কৰি অতি সোনকালে পুনৰ আলোচনা আৰম্ভ কৰিবলৈ সন্মত হৈছে। অহা সপ্তাহত ভিয়েনাত কাৰিকৰী পৰ্যায়ৰ বৈঠক অনুষ্ঠিত হ’ব বুলিও তেওঁ কয়। ইয়াৰ মাজতে ইজৰাইলে ইৰাণত আক্ৰমণ কৰিলে।
