এইবাৰ ইজৰাইলে ইৰাণৰ ওপৰত প্ৰত্যক্ষ আক্ৰমণ আৰম্ভ কৰিছে। শনিবাৰে পুৱাৰে পৰা ৰাজধানী তেহৰাণলৈ কেইবাটাও ক্ষেপণাস্ত্ৰ নিক্ষেপ কৰা হৈছে। এই আক্ৰমণৰ দায়িত্ব স্বীকাৰ কৰি ইজৰাইলে কয় যে বিগত কেইমাহমানৰ পৰা ইৰাণৰ অবিৰত আক্ৰমণৰ তেওঁলোকে প্ৰত্যুত্তৰ দিবলৈ আৰম্ভ কৰিছে।
কোৱা হৈছে যে তেওঁলোকৰ প্ৰধান লক্ষ্য হৈছে ইৰাণৰ সামৰিক ঘাটি। ইয়াৰ উপৰিও টেল আভিভে ইৰাক আৰু ছিৰিয়াতো একাধিক বিস্ফোৰণ সংঘটিত হৈছে।
ইজৰাইলৰ প্ৰতিৰক্ষা বাহিনীয়ে শনিবাৰে কয় যে তেওঁলোকে ইৰাণৰ সামৰিক ঘাটিত কিছু “নিৰ্দিষ্ট” আক্ৰমণ চলাই আছে। শনিবাৰে পুৱাৰ পৰা তেহৰাণ আৰু কাষৰীয়া অঞ্চলত কমেও দুটাকৈ ক্ষেপণাস্ত্ৰ আক্ৰমণ সংঘটিত হৈছে।
ইৰাণৰ ওপৰত ইজৰাইলৰ প্ৰত্যক্ষ আক্ৰমণে পশ্চিম এছিয়াত যুদ্ধ তীব্ৰতৰ কৰি তুলিছে। ইজৰাইলৰ সেনাই এক বিবৃতিত কয় যে ইৰাণৰ পৰা ইজৰাইলৰ বিৰুদ্ধে কেইবামাহো ধৰি অবিৰত আক্ৰমণৰ প্ৰতিক্ৰিয়া স্বৰূপে ইজৰাইলৰ সেনাই এতিয়া ইৰাণৰ কিছুমান সামৰিক ঘাটিক লক্ষ্য কৰি নিৰ্দিষ্ট আক্ৰমণ চলাইছে।
লগতে পঢ়কঃ নাবালিকাক নিৰ্যাতন চলোৱাৰ অভিযোগত গুৱাহাটীত গ্ৰেপ্তাৰ আৰক্ষী উপ-পৰিদৰ্শক
ইৰাণে ১ অক্টোবৰত ইজৰাইলৰ বিৰুদ্ধে ক্ষেপণাস্ত্ৰ আক্ৰমণ চলাইছিল। টেল আভিভত কমেও ১৮০টা ক্ষেপণাস্ত্ৰ নিক্ষেপ কৰা হৈছিল। সেই সময়ত ইজৰাইল সেনাই লেবাননত ‘স্থল অভিযান’ আৰম্ভ কৰিছিল। ইয়াৰ প্ৰতিক্ৰিয়া স্বৰূপে ইৰাণে ইজৰাইললৈ মিছাইল নিক্ষেপ কৰিছিল। অৱশ্যে ইজৰাইলে দাবী কৰিছিল যে তেওঁলোকে আকাশমাৰ্গত এই আক্ৰমণক সফলতাৰে প্ৰতিহত কৰে।
প্ৰথমবাৰৰ বাবে পশ্চিম এছিয়াৰ কোনো শক্তিয়ে ইজৰাইলক প্ৰত্যক্ষভাৱে লক্ষ্য কৰি লৈছিল। এইবাৰ ইজৰাইলে ইৰাণক পোনপটীয়াকৈ আক্ৰমণ কৰে। এইদৰে পশ্চিম এছিয়াত যুদ্ধৰ পৰিসৰ বৃদ্ধি পাইছে।
উল্লেখ্য যে ২০২৩ চনৰ ৭ অক্টোবৰত ইজৰাইলক আক্ৰমণ কৰিছিল পেলেষ্টাইনৰ সশস্ত্ৰ সংগঠন হামাছে। ইয়াৰ পিছত ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে হামাছৰ বিৰুদ্ধে যুদ্ধ ঘোষণা কৰে। তেতিয়াৰ পৰাই যুদ্ধ চলি আছে।
লগতে পঢ়কঃ অসমীয়া সাহিত্য-সংবাদ জগতত ‘বিস্ময়’ যুগৰ স্ৰষ্টা শশী ফুকনৰ দেহাৱসান
তাৰপিছত এটা এটাকৈ লেবাননৰ সশস্ত্ৰ সংগঠন হিজবুল্লাহ আৰু য়েমেনৰ হাউথী বিদ্ৰোহী ইজৰাইলৰ বিৰুদ্ধে সংঘৰ্ষত লিপ্ত হয়। এই বিদ্ৰোহী সংগঠনসমূহৰ আঁৰত ইৰাণৰ সমৰ্থন থাকিলেও তেহৰানে ইমান দিনে পোনপটীয়াকৈ যুঁজত নমা নাই। অক্টোবৰৰ আৰম্ভণিতে লেবাননত ইজৰাইলে আক্ৰমণ কৰাৰ পিছত টেল আভিভত আঘাত কৰি যুদ্ধৰ সৈতে তেওঁলোক প্ৰত্যক্ষভাৱে জড়িত হৈ পৰে। এইবাৰ ইজৰাইলৰ পৰাও প্ৰত্যুত্তৰ আহিবলৈ আৰম্ভ কৰিছে।
