ইজৰাইলে তেহৰাণত পুনৰ বিমান আক্ৰমণ চলায়। সোমবাৰে মাজ নিশা একেলগে ৰাজধানীৰ একাধিক অঞ্চলত আক্ৰমণ সংঘটিত হয়। ইয়াৰ ভিতৰত আছিল ইৰাণৰ চৰকাৰী সংবাদ মাধ্যম ইছলামিক ৰিপাব্লিক অৱ ইৰাণ ব্ৰডকাষ্টিঙৰ মুখ্য কাৰ্যালয়।
এই আক্ৰমণৰ কেইবাটাও ভিডিঅ’ ফুটেজ ছ’চিয়েল মিডিয়াত বিয়পি পৰিছে। দেখা গৈছে যে মিডিয়া অফিচটো ক’লা ধোঁৱাই আৱৰি ধৰিছে। অৱশ্যে এই ক্ষয়-ক্ষতিৰ পৰিমান এতিয়াও জানিব পৰা হোৱা নাই। হতাহতৰ সংখ্যাও জানিব পৰা হোৱা নাই।
নিশা ইজৰাইল সেনাই হঠাতে তেহৰাণ খালী কৰাৰ নিৰ্দেশ জাৰি কৰে। এঘণ্টাৰ ভিতৰতে আৰম্ভ হয় বিমান আক্ৰমণ। ইৰাণৰ ৰাজধানী তেহৰাণৰ একাধিক অঞ্চলত তীব্ৰ বিস্ফোৰণেৰে ক্ষেপণাস্ত্ৰই আঘাত কৰে। আক্ৰমণৰ পিছত ইজৰাইলী সেনাই এক বিবৃতিত কয় যে নিৰ্দিষ্ট চোৰাংচোৱা তথ্যৰ ভিত্তিত তেহৰাণৰ ওপৰেৰে যুদ্ধ বিমানৰ পৰা কেইবা ডজনো ক্ষেপণাস্ত্ৰ নিক্ষেপ কৰা হৈছে।
চৰকাৰী ইছলামিক ৰিপাব্লিক অৱ ইৰাণ ব্ৰডকাষ্টিঙৰ মুখ্য কাৰ্যালয় তেহৰাণৰ মাজমজিয়াত অৱস্থিত। খবৰ অনুসৰি, সংবাদ মাধ্যমৰ কাৰ্যালয়ৰ উপৰিও বহুমহলীয়া অট্টালিকাটোত কেইবাটাও চৰকাৰী কাৰ্যালয়ো আছে। আক্ৰমণৰ পিছত অট্টালিকাৰ পৰা ক’লা ধোঁৱা ওলাই অহা দেখা গৈছে। বহুতে আতংকিত হৈ দৌৰিবলৈ ধৰে। অট্টালিকাটোৰ কাষতে দুটাকৈ প্ৰচণ্ড বিস্ফোৰণৰ শব্দও শুনা গ’ল।
ইৰাণেও চৰকাৰী সংবাদ সংস্থাটোৰ কাৰ্যালয়ত আক্ৰমণৰ কথা নিশ্চিত কৰিছে। অৱশ্যে সংস্থাটোৰ সঞ্চালক জেমান জেবেলিয়ে কয় যে এই আক্ৰমণত কোনো লোক নিহত হোৱা নাই। তেওঁ কয় যে, “কোনো ধৰণৰ হতাহতৰ খবৰ পোৱা নাই। সম্প্ৰচাৰৰ কামত কোনো ধৰণৰ ব্যাঘাত জন্মা নাই।”
কিন্তু ইজৰাইলী সেনাই দাবী কৰে যে চৌহদটোৰ ভিতৰৰ কেইবাটাও কাৰ্যালয় সম্পূৰ্ণৰূপে ধ্বংস হৈছে। একে সময়তে ভৱিষ্যতে ইৰাণ চৰকাৰৰ আন্তঃগাঁথনিত আক্ৰমণ চলোৱা হ’ব বুলিও সকীয়াই দিছে।
ইপিনে, যুদ্ধ ক্ৰমাৎ বিপদজনক হৈ পৰাত ৰাছিয়াই যুদ্ধবিৰতিৰ দাবী জনাইছে। ৰাছিয়াৰ ৰাষ্ট্ৰপতি ভ্লাদিমিৰ পুটিনে সংযুক্ত আৰব আমিৰশ্বাহী আৰু কুৱেইটৰ ৰাষ্ট্ৰপতিৰ সৈতে কথা পাতিছে।
আনহাতে, চীনে আলোচনাৰ জৰিয়তে সমস্যা সমাধানৰ বাৰ্তাও দিছে। আয়াতুল্লাহ আলী খামেনেইৰ হত্যাকাণ্ডক গৰিহণা দি চীনৰ বৈদেশিক মন্ত্ৰী ৱাং য়িয়ে কয় যে, “সৰ্বোচ্চ নেতাক হত্যা কৰি শাসন ব্যৱস্থা বলপূৰ্বকভাৱে সলনি কৰাৰ এই প্ৰচেষ্টা গ্ৰহণযোগ্য নহয়।”
